Prezidente Autoridade Nasionál Komunikasaun (ANC), João Oliveira Freitas, partisipa iha julgamentu primeiru interrogatóriu iha Tribunál Distritál Dili, domingu (29/11/2020). Imajen TATOLI/Nelson de Sousa.

DILI, 29 Novembru 2020 (TATOLI)–Tribunál Distritál Dili (TDD), ohin, kontinua halo julgamentu primeiru interrogatóriu ba  Prezidente Autoridade Nasionál Komunikasaun (ANC), João Olivio Freitas, iha Tribunál Distritál Dili (TDD).

Notísia Relevante: Prezidente ANC submete ba primeiru interrogatóriu iha Tribunál

Prosesu julgamentu ne’ebé prezide hosi  juiza, Ercila da Silva, Ministéiru Públiku (MP) nu’udar na’in ba asaun penál reprezenta hosi prokuradór Matias Soares, akuza arguidu  João Oliveira Freitas ho krime lima hanesan administrasaun danosa previstu iha artigu 274, korrupsaun pasiva iha artigu 292, brankamentu kapitais ne’ebé previstu iha artigu 313, burla informátika agravadu ne’ebé previstu no punidu iha artigu 296, no krime fraúde fiskál iha artigu 314, hotu-hotu hosi  kódigu penál Timor-Leste.

Audénsia julgamentu ne’ebé hahú ohin (domingu, 20 novembru 2020) iha tuku 15:00 lorokraik to’o tuku 18:14 kalan ne’e, parte Ministéiru Públiku iha nia alegasaun husu Tribunál atu aplika prizaun preventiva ba arguidu maibé parte defeza husu atu aplika de’it termu identidade rezidensia (TIR).

Kona-ba desizaun ikus seida’uk rona tanba juiza prosesu adia fila-fali julgamentu refere ba iha segunda  (30 novembru 2020) aban, iha tuku 11:30 otl hodi rona desizaun.

Polisia Nasionál Timor-Leste (PNTL) liuhosi Servisu Investigasaun Kriminál (SIC), kinta (26/11) ne’e, purvolta  tuku 11:00 halo detensaun ba Prezidente ANC, João Oliveira Freitas, tanba deskonfia iha relasaun ho ligasaun internete ilegál ne’ebé durante ne’e komete hosi operadór Telekomunikasaun Telemor no  konpañia  Elite Komputer.

Autoridade  Polísia  Timor-Leste hamutuk ho ekipa konjunta diretamente tama ba edifísiu ANC nian iha Minsitéiru Transporte no Komunikasaun (MTK)  iha Caicoli, Dili hodi halo buska no detensaun ba prezidente ANC hodi  kumpre mandadu  buska, detensaun no apreensaun hosi Tribunál Distritál Dili (TDD) ho NUK 0166/20/PNSIK, nune’e bele submete ba investigasaun no aprezenta ba primeiru julgamentu iha TDD.

Tuir dokumentu ne’ebé sai baze ba SIC hodi halo detensaun  ba Prezidente ANC ne’e tanba deskonfia halo koordenasaun servisu ho arguidu jestór prinsipál Elite Komputer ho inisál DP no arguidu jestór prinsipál Telemor ho inisiál TVB, hodi halo fornesimentu internet ilegál foti hosi rede Indonézia ba instituisaun Governu Timor-Leste inklui Komandu Jerál PNTL.

Prosesu julgamentu ne’e arguidu hetan asisténsia legál hosi advogadu privadu Manuel Tilman ho  Rui António Mendonça.

Jornalista: Nelson de Sousa

Editór: Cancio Ximenes

 

PUBLISIDADEiklan

HAKEREK NO HATÁN

Please enter your comment!
Please enter your name here