Ekipa Servisu Investigasaun Kriminál Nasionál (SIC) hamutuk tékniku kompañia Telemor no IT Timoroan-sira sobu sistema koneksaun rede internet ilegál hosi Atambua, Indonézia mai Timor-Leste iha foho-leten Postu Administrativu Balibo, Munisípiu Bobonaro, 24 novembru 2020.Imajen Tatoli/Eugénio Pereira

BALIBO, 24 novembru 2020 (TATOLI)– Polisia Nasional Timor-Leste liuhosi ekipa Servisu Investigasaun Kriminál (SIC) hamutuk ho tékniku kompañia Telemor no IT Timoroan-sira, ohin, sobu  ona  sistema koneksaun rede internet ilegál hosi Atambua-Indonézia mai Timor-Leste ne’ebé monta iha  foho-leten Postu Administrativu Balibo, Munisípiu Bobonaro.

Notísia Relevante : Polísia tesi rede koneksaun internet Elite Computer ba liña ministériu balun

Tore Telemor nian ne’ebé Elite Computer utiliza hodi halo koneksaun rede internet hosi Atambua-Indonézia, ne’ebé monta iha foho-leten Postu Administrativu Balibo, Munisípiu Bobonaro. Imajen Tatoli/Eugénio Pereira

Ekipamentu-sira ne’ebé SIC sobu hanesan microwave ida no access point ida ne’ebé kompañia Elite Computer monta iha tore kompañia Telekomunikasaun Telemor  nian.

Access Point ne’e maka asesória (perangkat) rede ne’ebé akumula transceiver ho antena atu halo transmisaun no simu signal hosi no ba kliente.  Ho access points (AP) clients wireless bele ho lalais no fasil atu halo koneksaun ba rede kabu LAN iha wireless.

SIC sobu mós ekipamentu microwave no ekipamentu swihic metrolink, siterouters ne’ebé liga direita rede koneksaun internet ne’ebé parte-rua halo koneksaun ilegál  hodi fó prejuizu ba Estadu Timor-Leste.

Ekipamentu hirak ne’e, kompañia Elite Computer monta iha tinan 2019 utiliza tore Telemor nian hodi halo koneksaun rede internet.

Sobu tiha ekipamentu hirak-ne’e, SIC halo kedas apreensaun ba ekipamentu hanesan, router hirak-ne’e nu’udar evidénsia ne’ebé sei aprezenta ba Ministériu Públiku.

Prosesu identifikasaun hodi sobu ekipamentu hirak-ne’e akompaña direita hosi Komandante SIC, Superintendente Xefe José Maria Neto Moc no marka prezensa hosi suspeitu DP nu’udar jestór prinsipál  iha Elite Computer hodi fó informasaun kona-ba prosesu ne’ebé nia parte ho tékniku- sira monta ba koneksaun rede internet.

Tuir observasaun  Agência Tatoli nian iha terrenu  nota katak durante halo identifikasaun ba tore Telemor ne’e akompaña mós hosi Manager Téknika Kompañia Telemor Munisípiu Bobonaro, Jaime Soares ne’ebé durante hala’o servisu kontrola ba tore no rede internet ne’ebé pertense ba Munisipiu Bobonaro.

Tuir informasaun iha Bobonaro, Telemor durante hala’o investimentu harii ona tore hamutuk 21 no fó servisu ba Timoroan hamutuk ema na’in-sia (9) ne’ebé servisu iha área téknika, marketing no parte seguransa nian.

Notísia Relevante : SIC detein jestór prinsipál Telemor ho Elite Computer

Jornalista: Eugénio Pereira

Editór: Francisco Simões

HAKEREK NO HATÁN

Please enter your comment!
Please enter your name here