Jogadór Lalenok United FC, kamizola mean-kinur, kontrola hela bola bainhira joga kontra Nagardjo FC iha Tasa 12 Novembru 2020 iha Estadiu Munisipál Dili, sesta (13/11). Imajen Tatoli/António Gonçalves

DILI, 13 novembru 2020 (TATOLI) – Klube futeból  Lalenok United FC prova dala ida tan ba nia adeptu sira, ohin, iha abertura Tasa 12  Novembru, katak Lalenok United FC  la’ós klube futeból ida ne’ebé fraku.

Notísia Relevante : Lalenok sai kampiaun ba kopa FFTL

Iha abertura Tasa 12 Novembru, epoka ne’e, Lalenok hatudu nia kualidade hodi “tebe-sai” Nagardjo FC ho golu 5-0. Nune’e, hamate kedas Nagardjo nia mehi ka ambisaun atu hakat ba jogu tuir mai.

Jogador Lalenok United FC domina bola bainhira joga kontra Nagardjo FC iha Tasa 12 Novembru 2020 iha Estadiu Munisipál Dili, sesta (13/11). Imajen Tatoli/António Gonçalves

Nagardjo FC obrigadu  tenke “katik sai” ona hosi jornada Tasa 12 Novembru epoka ne’e, hafoin Paulo Gally (21), Daniel Adadi (77), Elias Mesquita (10), Fabio Chirstian Cotinho (93) no nia kolega sira “fura” sira ho golu 5-0 iha Estádiu Munisipál Dili.

Mezmu jogadór Nagardjo FC nian ne’ebé reforsa hosi José da Costa (26), Armindo Sarmento (77) no sira-seluk tan  “koko” halo presaun atu bele “lees” guarda rede (baliza) Lalenok FC, Fortunato Gomes (46),  maibé Paulo Gally ho nia kolega sira la fó oportunidade no nunka fó tempu atu José da Costa (26) ho nia kolega sira bele prodús golu ruma para duni tuir derrota ne’ebé sira enfrenta.

Notísia Relevante : Nagardjo prontu enfrenta Lalenok iha tasa 12 de Novembru

Iha minutu 42 sorte di’ak ba Lalenok tanba Paulo Gally konsege fura baliza  Nagardjo, Celestino Pinto (33), hosi jogu indivíduu ne’ebé nia halo, nune’e muda kedan rezultadu ba 1-0. Hosi Gally nia golu ne’e mak termina jogu primeira parte.

Hafoin deskansa tiha minutu 15 nia laran, jogu hahú fali Nagardjo kontinua halo presaun ba Lalenok hodi buka empata, maibé laiha nafatin dalan atu sobu defeza Lalenok ne’ebé satan metin no forte tebes hosi Gumario Morreia (5), Francisco Xavio (24) no Julião Mendonça (17).

Iha minutu 64, Gumario Morreira (5)  hanesan defeza aproveita bola barullu iha rede Nagardjo nia oin hodi halo tan golu segundu hodi fó prova ba Nagardjo ho nia adeptu-sira 2-0.

Iha minutu 81, Elias Mesquita (10) lansa golu terseiru hodi lori rezultadu do’ok tan ona hosi Nagardjo. Lalenok domina liután jogu no halo jogadór Nagardjo atrapalla.

Ho Nagardjo sira nia “frustrasaun” ne’e, Lourenço Freitas (19) iha minutu 87  lansa tan golu ba dala hat hodi lori score ba 4-0.

Mai fali iha minutu 90 hanesan minutu ikus Daniel Adadi (77) halo golu ba ikus hodi hatuur loloos vitória Lalenok nian ho golu 5-0. Nune’e, Nagardjo tenke sai ona hosi kampu laran hodi hein fali tasa 12 Novembru iha tinan oin.

Notísia Relevante : Lalenok sei joga ho kuidadu iha tasa 12 de Novembru

Jornalista   : Hortencio Sanchez

Editór         : Francisco Simões

HAKEREK NO HATÁN

Please enter your comment!
Please enter your name here