Prezidente FFTL, Francisco Jerónimo fahe hela tasa ba klube vensedór kopa FFTL, Lalenok United FC iha Estádiu Café Ermera, domingu (25/10).Imajen Tatoli/Hortencio Sanchez.

DILI, 11 novembru 2020 (TATOLI) – Treinadór prinsipál Lalenok United FC Simón Elissetche hateten, tasa 12 de Novembru, epoka ne’e, jogu ida ne’ebé la’ós halimar tanba ekipa ne’ebé lakon tenke sai. Ho nune’e, Lalenok sei joga ho kuidadu.

Treinadór Lalenok United FC, Simón Elissetche. Imajen/Espesiál

“Ami nia preparasaun ba tasa 12 de Novembru la’o di’ak tebes. Ami hatene iha jogu ne’e se mak lakon tenke sai tanba uza “sistim gugur” ami sei joga ho kuidadu nune’e bele manan,” Simón hateten ba jornalista sira, ohin, iha edifísiu Liga Futeból Timor – Leste (LFTL) Bairru Formosa.

Nia dehan, kada loron treinamentu ba jogadór Lalenok hotu la’o hanesan entre jogadór estranjeiru no lokál.

Tuir oráriu ne’ebé anunsia ona hosi LFTL loron hira liu-ba ekipa jigante Lalenok sei kontra Nagardjo FC hanesan mós jogu abertura ba tasa 12 de Novembru iha sesta (13/11).

“Ami hasoru Nagardjo hakarak lakohi ami tenke manan. La’ós manan Nagardjo de’it ekipa sira iha jogu tuir mai mós ami tenke manan hodi hakat ba oin,” Simón afirma.

Iha fatin hanesan kapitaun Lalenok, Elias Mesquita dehan, jogu hasoru Nagardjo maski abertura ba tasa 12 de Novembru, maibé nia konsidera hanesan jogu finál.

“Hasoru Nagardjo ami sei esforsu para manan, jogu ne’e ami mak abertura maibé konsidera hanesan jogu finál tanba lakon tenke sai, entaun ami sei esforsu para manan,” Elias hateten.

Iha jogu ne’e fó prioridade liubá klube sira ne’ebé hamahan an iha LFTL mak hanesan, AD. SLB, Assalam FC, Lalenok United FC, FC Porto Taibessi, Kablaki FC, Zebra FC, AS Ponta Leste, AS Marca FC, FIEL FC, FC Nagardjo, Lika-Lika Lemorai FC, Aitana FC, DIT FC, Boavista FC Timor, Karketu Dili FC, Academica FC, Sporting Clubo de Timor, Emanuel FC no Santa Cruz FC.

Klube Atletico Ultramar mak sei la partisipa iha jogu ne’e tanba hetan hela sansaun hosi LFTL iha tinan kotuk bainhira jogu kontra Lalenok United FC ekipa ne’e lamenta ho desizaun árbitru no boikota kampu.

Orsamentu ne’ebé ba jogu ne’e total  $27,000,00 apoiu hosi Sekretáriu Estadu Juventude no Desportu (SEJD) hosi orsamentu ne’e klube ne’ebé sai kampiaun sei simu $15,000,00.

Jornalista   : Hortencio Sanchez

Editór        : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here