Prezidente FFTL, Francisco Jerónimo fahe hela tasa ba klube vensedór kopa FFTL, Lalenok United FC iha Estádiu Café Ermera, domingu (25/10).Imajen Tatoli/Hortencio Sanchez.

GLENO,25 outubru 2020 (TATOLI)—Ekipa Lalenok United FC, iha domingu lokraik ne’e ho susesu sai kampiaun ba Kopa Federasaun Futeból Timor-Leste hafoin halakon ninia adversáriu AD.SLB Laulara ho golu mihis 2-1 iha Estádiu Munisipál Café Gleno, Ermera.

Ho kampiaun ne’e maka klube AD.SLB Laulara obrigadu tenki tenki tuur iha pozisaun daruak, Boavista FC Timor okupa pozisaun datoluk no pozisaun dahaat maka Assalam FC.

Notísia Relevante :SLB Ho Lalenok Impata 0-0

Durante jogu ne’e la’o, ekipa rua hatudu jogu ne’ebé bonitu tebes tanba parte rua lansa kontra no atake ba malu, no to’o iha minutu ualu (8) jogadór SLB Laulara, Cornelio Portela uza kedas oportunidade hodi fura baliza Lalenok United FC ho valór 1-0.

Ho golu dahuluk ne’e halo jogu ne’e manas liután tanba jogadór Lalenok ne’ebé lidera hosi treinadór Simón Elissetche, iha nafatin vontade hodi halo esforsu no to’o iha minutu 28 Jogadór Lalenok Elias Mesquita responde kedas golu ida ba iha baliza SLB Laulara hodi muda eskore 1-1 to’o primeiru jogu nian ramata.

Hakat ba jogu parte daruak nian, ekipa rua halo esforsu maka’as liután tanba idaidak buka atu sai kampiaun iha Kopa FFTL époka 2020.

AD.SLB Laulara halo esforsu atu hatama tan golu ba baliza Lalenok maibé la konsege tanba jogadór defensivu Lalenok nian la fó fatin ba SLB atu ultrapasa ninia objetivu.

Ho esforsu husi Lalenok nian maka iha minutu 84 jogadór SLB Filipe Oliveira halo erru iha grande área SLB nia oin hasoru jogadór Lalenok Daniel Adadi. Husi erru ne’e maka árbitru deside fó kedas penalidade ba Lalenok no Jogadór  Fabio Christian Cotinho maka tiru penalidade ba baliza SLB no ikus konsege hatama golu hodi muda valór 2-1 hodi termina joga ne’e iha minutu 93.

Hafoin jogu ne’e termina komisaun organizadora Kopa FFTL époka 2020 fahe kedas prémiu ba klube sira ne’ebé maka sai vensedór iha eventu ne’e maka Lalenok United FC simu prémiu hanesan tasa no osan ho montante $ 15.000, AD.SLB Laulara simu prémiu osan ho valór $10.000.

Enkuantu, Boavista FC Timor okupa pozisaun datoluk hodi simu osan ho valór $ 7.500 no pozisaun dahaat maka Assalam FC ho valór osan $ 2.500.

 Notísia Relevante :AD SLB Sei Hasoru Lalenok United FC iha Finál Tasa 12 Novembru

Jornalista:Hortencio Sanchez

Editór:Agapito dos Santos

HAKEREK NO HATÁN

Please enter your comment!
Please enter your name here