Logotipu TDD. Imajen Tatoli/Egas Cristóvão

DILI, 28 setembru 2020 (TATOLI)-Ministériu Públiku (MP) liuhosi prokuradór titular Rogério Viegas, iha nia alegasaun husu ba Tribunál Distritál Dili (TDD) atu aplika pena prizaun efetivu tinan-ualu (8) no selu indemnizasaun sivíl ba arguidu ho arguida hamutuk na’in-ualu (8) tanba iha faktu provadu iha envolvimentu kazu sosa ró ambulánsia ba Ministériu Saúde (MS).

Notísia Relevante : Kazu ró ambulánsia, Tribunál “bolu” Sergio Lobo

Prokuradór Rogério Viegas hateten, iha MP nia akuzasaun, akuza arguidu ho arguida hanesan AMPM, JFDOC, JCS,LB,ADC, EDJAM, JCM, nu’udar ko-autór material ho forma konsumada ba krime partisipasaun ekonomia iha negósiu, ne’ebé previstu no punidu iha art°. 2990 n°. 1 no 2, hosi Kódigu Penal, ho ninia moldura penal tinan mínimu tinan-tolu (3) no másimu tinan-15, iha prizaun.

MP mós akuza arguidu DG nu’udar autór material ba konkursu krime falsifikasaun dokumentu ne’ebé previstu no punidu iha art°. 303°, ho ninia moldura penal kastigu mínimu loron-30 to’o tinan-tolu (3) ka aplika pena multa, no krime burla agravadu, ne’ebé previstu no punidu iha art. 267 n°. 1 a1. a), husi Kódigu Penál, ho ninia moldura penal mínimu tinan-tolu no másimu tinan-10 iha prizaun.

Rogério Viegas iha nia  alegasaun deskreve katak, faktu iha faze preparasaun no planu atu sosa ró ambulánsia, perante iha julgamentu sira liu ba tuir deklarasaun hosi arguidu JCM no  arguida AMPM ho  testemuña eis Governante na’in-rua  Madalena Hanjam, Nelson Martins, ne’ebé deklara katak loos duni iha tinan 2012, Ministériu Saúde aloka duni osan ho montante $500,000,00 ba iha Dirasaun Nasional Servisu Hospitalares no Enkavementu (DNSHE), ho objetivu atu sosa ró ambulánsia.

Notísia Relevante : TDD rona sasin eis governante na’in-rua ba kazu ró ambulánsia

Provas hatudu katak arguida AMPM nu’udar dirijente iha dirasaun refere hatene katak iha dirasaun ne‘e rasik laiha pesoál tékniku ne‘ebé iha abilidade navegasaun marítima kona-ba ró ambulánsia, maibé arguida simplesmente haruka de’it arguidu JCM, ne‘ebé nu’udár motorista ambulánsia atu prepara dezeñu ho espesifikasaun ba ró ambulánsia nian.

Arguidu JCM hamutuk ho JDS ba iha Unidade Polísia Marítima (UPM), hodi husu de’it dezeñu  hafoin entrega ba arguida AMPM tuir loloos dokumentu ne‘e nu’udár de’it referénsia ba dirasaun refere atu estuda oinsá mak atu dezenvolve planu, dezeñu no BoQ própriu, maibé arguida haruka testemuña CCG, nu’udár Diretór Interinu DNSHE, hato‘o pedidu ba iha Vise Ministra Saúde Madalena Hanjam atu halo aprovasaun orsamentu ba kompras ró ambulánsia.

Notísia Relevante : Tribunál Kontinua Julga Kazu Ró Ambulánsia

Arguida AMPM la orienta funsionáriu sira no mós 1a rekomenda ba iha Vise Ministra Saúde atu halo uluk planu estudu viabilidade kona-ba ró  ambulánsia nian, hodi bele iha planu ida ne‘ebé viable no apropriadu, antes atu hato‘o pedidu ba iha Vise Ministra Saúde atu halo aprovasaun ba orsamentu Estadu ho montante $500,000,00, maibé ho de’it informasaun simples no dezeñu surat tahan ida de’it ne‘ebé kopia de’it hosi Unidade Polísia Marítima nian, ne‘ebé ikus mai hetan duni aprovasaun husi Vise Ministra iha loron 2 marsu 2012, ne‘ebé husu ba iha arguidu LB nu’udár Diretór Nasional Administrasaun Lojístika no Aprovizionamentu (DNALA) no arguida EDJAM prosesa no elabora kompras ró ambulánsia.

Maske arguidu LB no arguida E DJAM hetan ona despaxu hosi Vise Ministra Saúde atu elabora dokumentu no prosesu aprovizionamentu hodi kompras ró ambulánsia, maibé to’o iha lansamentu konkursu internasionál ba públiku, hosi DNNALA no Departamentu Aprovizionamentu nunka dezenvolve kualkér dokumentu  ruma kona-ba propria dezeñu no BoQ kona-ba tipu ró no espesifikasaun ró ida ho kualidade oinsá mak Ministériu Saúde presiza, antes atu lansa konkursu ba públiku.

DNSHE no DNALA, tenke halo uluk estudu viabilidade ida hodi rekolla informasaun sira hodi define ka identifika detalladu kona-ba espesifikasaun ba ró ambulánsia nian ho ninia estimasaun kustu ida ne‘ebé realístiku no razoavel iha merkadoria relasiona ba planu konstrusaun no instalasaun ba ró ambulánsia refere, atu nune‘e, bele ajuda arguidu sira atu halo planu ida ne‘ebé adekuadu no apropriadu ba projetu ida ne‘e, prepara dezeñu ida kompletu, halo estimasaun ba presu kada espesifikasaun ne‘ebé nesesáriu hodi asegura alokasaun orsamentu ida ne‘ebé razoavel, realístiku, efisiénsia no ekonómiku, tanba tuir esperiénsia hosi empreza PT. SIP rasik ne‘ebé PT. SIP hatama iha dokumentu tenderizasaun ba ekipa KAMS, hatudu katak PT. SIP halo ona konstrusaun ba ró patrullamentu ho medida  metru 12 ho folin tranzasaun $880,000,000 tinan fabrika 29/02/2011, ne‘e signifika katak PT. SIP rasik bele prodús ró medida hanesan metru12, hamutuk tolu to’o haat mós seidauk atinje orsamentu kontratu ne‘ebé hetan aprovasaun hosi Ministériu Saúde.

Notísia Relevante : Tribunál Kontinua Rona Sasin Ba Kazu Ró Ambulánsia

Aliende ne‘e, maioria experiénsia hosi empreza konkorrente ne‘ebé kompete iha tenderizasaun ida ne‘e mak hanesan PT. Kaha Jaya Mmarine, CV. Bintang Samudra, mostra katak konstrusaun ró ho medida metru 12  ho folin tranzasaun ne‘ebé menus hosi $300,000,00, ne‘e signifika katak montante osan ne‘ebé estabelese iha kontratu ne‘e 1a razoavel.

Tanba MS laiha dokumentu espesifikasaun no dezeñu propria, nune‘e iha selesaun dokumentu membru KAMS laiha dokumentu espesifikasaun no dezeñu ne‘ebé sai nu’udár baze hodi halo selesaun ba dokumentu empreza nian. Tanba ne‘e mak dokumentu dezeñu no espesifikasaun ne’ebé mak uza iha kontratu nia laran ne‘e, dezeñu no espesifikasaun ne’ebé mai husi empreza PT. SIP nian  no espesifikasaun ho dezeñu iha kontratu. Signifika kualidade no espesifikasaun husi ró refere depende de’it ba iha espesifikasaun ne‘ebé empreza vendedór define.

Rogério Viegas esplika, durante produsaun  prova iha audiénsia julgamentu arguidu  JCS nu’udár enjeñeira sivíl konfesa katak, nia parte nu’udár enjeñeiru sivíl la’ós tékniku ka  espesialista iha makina, arguidu ADC nu’udár sekretaria KAMS  mós deklara nia laiha koñesimentu tékniku ba espesifikasaun ró nian, tanba ne‘e, nia so haree de’it mak prosesu aprovizionamentu nian, halo selesaun ba dokumentu sira tuir cheek list ne’ebé prepara ona, ho apoiu hosi asesór Jahendra Batta, maibé arguidu JFDOC nu’udár membru permanente KAMS mós deklara katak nia rasik laiha koñesimentu tékniku kona-ba espesifikasaun ekipamentu no mákina ró nian no la partisipa iha avaliasaun dokumentu.

Arguidu JDCM, nu’udár membru variavel, hanesan ema tékniku, maibé la partisipa iha prosesu avaliasaun dokumentu, no la hatene halo prosesu avaliasaun ba dokumentu, arguida EDJAM nu’udár membru permanente KAMS deklara katak iha altura ne’ebá nia seidauk iha esperiénsia no seidauk iha koñesimentu ne’ebé kle’an kona-ba avaliasaun no la envolve másimu iha prosesu avaliasaun, no arguidu LB, nu’udár prezidente KAMS  mós la partisipa iha prosesu selesaun dokumentu.

Signifika katak hosi membru na’in-neen, iha de’it membru na’in-rua mak marka prezensa ho de’it apoiu hosi asesór Jahendra, hodi halo avaliasaun ba dokumentu, tuir esperiénsia komún, prosesu “Bid Opening Check List ne‘e diarize diretamente hosi Presidente Komisaun no hetan akompañamentu másimu hosi membru sira ne’ebé hetan ona nomeasaun.

Aktu sira ne‘e hatudu katak prezidente KAMS ho membru KAMS sira deside inísiu hatudu falta  responsabilidade hodi 1a fó importánsia no seriedade ba prosesu refere, hodi prejudika independénsia no objetividade iha prosesu selesaun dokumentu. Empreza nian no tenke loke iha perante empreza konkorrente nia oin, atu nune‘e, bele evita konflitu interese, ne’ebé ikus mai bele prejudika independénsia no objetividade iha prosesu selesaun dokumentu.

Faktu hatudu katak membru ekipa KAMS sira 1a identifika ho didi’ak no ho seriedade kona-ba falsifikasaun dokumentu hosi empreza SIP rasik, mak hanesan dokumentu balun mak hanesan, Mensiona Diretór SIP nia naran HENDRA, maibé ninia asinatura iha dokumentu hirak ne‘e 1a hanesan, balun asina uza de’it karimbu ho naran PT. SIP SHIP Yard Surabaya, no dokumentu seluk fali uza logotipu eletróniku PT SIP nian iha komputadór hafoin mak minimiza hodi kopia ba iha asinatura nia leten, hanesan karimbu.

Iha parte seluk, dokumentu deskrisaun kona-ba espesifikasaun tékniku ró nian iha proposta tékniku PT. SIP no CV Bintang Samudra nian, 100% hanesan de’it, hahú hosi lia fuan, espasu, tipu letra ne’ebé uza, formatu, konteúdu, to’o sinais lee nian hanesan pontu, vírgula no asentu, é hanesan de’it.

Dezeñu ró ambulánsia ne’ebé PT SIP aprezenta iha ninia proposta tékniku diferente ho ninia proposta finanseira, tanba iha proposta finanseira PT. SIP uza fali dokumentu dezeñu ró nian ne’ebé CV. Bintang Samudra uza iha ninia aprezentasaun proposta tékniku nian.

Signifika katak membru KAMS por omisaun la konsege identifika meius manipulasaun dadus, falsifikasaun dadus no mós konspirasaun entre empreza PT. SIP no CV Bintang Samudra, tanba ne‘e ikus mai membru KAMS deside PT. SIP hetan klasifikasaun I no CV. Bintang Samudra hetan klasifikasaun II, atu nune‘e bainhira PT. SIP 1a liu karik, CV. Bintang Samudra bele substitui hodi sai vendedór.

Ho faktu sira-ne‘e mak hamosu provas katak membru KAMS favorese ba empreza refere hodi hamosu prejuizu ba Estadu.

Kona-ba faze selebrasaun no ezekusaun kontratu, Rogério Viegas esplika, maske iha produsaun ba prova la konsege rona deklarasaun arguidu DG nian, maibé tuir dokumentu sira ne’ebé junta iha auto, mostra katak maioria dokumentu sira ne’ebé empreza SIP aprezenta asina hotu hosi Hendra nu’udár diretór no na’in ba empreza refere, maibé tanba saida mak iha asina kontratu osan ho montante $423,343.51,  Hendra fó fali prokurasaun ba iha arguidu DG mak hodi asina kontratu refere hanesan asistente  koordenadór, maske tuir deklarasaun arguidu DG nia iha investigasaun deklara katak nia la tama iha estrutura PT. SIP nian, no arguidu DG 1a okupa pozisaun ruma no la pertensia ba iha estrutura empreza SIP nian, nia so apena intermediu de’it.

Prokuradór Rogério Viegas hateten, faze inspesaun no resevimentu no termu entrega ró ambulánsia ba Ministériu Saúde, iha   janeiru 2013, ró ambulánsia ne’e to‘o ona iha Portu Dili, Timor-Leste, tanba ne‘e iha loron 16 janeiru 2013, reprezentante kompañia SIP iha Timor-Leste, arguidu DG, hato‘o pedidu inspesaun ba ró ambulánsia ne‘e ba iha Ministru Saúde  Sergio Lobo.

Nune‘e, iha loron 17 janeiru 2013, Ministru  Saúde fo despaixu ba iha Vise Ministra Saúde, Natália de Araujo, atu organiza inspesaun, no bazeia ba despaixu refere, maka iha loron 30 janeiru 2013, Vise Ministra Saúde, fo fali despaixu ba iha Dirasaun Nasional Administrasaun, Lojístika no Aprovizionamentu (DNALA), atu organiza ekipa inspesaun ró ambulánsia.

Iha loron 05 fevereiru 2013, Diretór DNALA, arguidu LB hato‘o pedidu ba iha Ministru  Saúde Sergio Lobo (altura ne’ebá), kona-ba kompozisaun ba membru komisaun inspesaun ba ró ambulánsia iha Portu Dili, ne’ebé kompostu hosi arguidu JFDOC, nu’udár Prezidente Komisaun Inspesaun, no Xefe Departamentu Lojístika Ministériu Saúde, arguidu ADC, nu’udár Sekretáriu Komisaun Inspesaun no nu’udár membru komisaun inspesaun mak hanesan arguidu JDCM hosi Hospitalar no Enkaviamentu MS, arguidu JCS hosi ISU MS, Jayendra Bhatta, nu’udár Asesór Aprovizionamentu MS, no José Antonio Sarmento, nu’udár Xefe Departamentu Jestaun Rekursu Ministériu Finansas.

Maske membru ekipa R&I sira ne‘e laiha espesialista ba navegasaun marítima, maibé arguidu LB nu’udár diretór DNALA, nafatin hato‘o pedidu ba Ministru naran membru KAMS sira nia naran atu kontinua sai komisaun ba inspesaun no resevimentu.

Iha loron 13   fevereiru 2013, Ministru Saúde Sergio Lobo, haree ba kompozisaun hosi membru komisaun inspesaun ne’ebé hato‘o husi arguidu LB, laiha ida mak espesialista kona-ba navegasaun marítima no konsidera importánsia atu garantia seguransa navegasaun nian mak Ministru Saúde fó despaixu ba iha Vise Ministra Saúde, Maria do Ceu, atu halo karta ba iha Ministériu Transportes no Portu Dili, atu husu apoiu tékniku, atu indika sira-nia ema tékniku ruma atu hola parte iha ekipa Komisaun Inspesaun no Reseptasaun (R&I) Ministériu Saúde nian. Tanba ne‘e, Vise Ministra Saúde, Maria do Ceu, hatún despaixu iha pedidu refere.

Iha loron l8  jullu   2013, mak membru komisaun R&I foin halo inspesaun ba ró ambulánsia refere iha Portu Dili, no iha tempu ne’ebá hanesan halo kedas termu entrega ba ró ambulánsia refere, hosi reprezentante kompañia PT. SIP, arguidu DG ba iha arguidu JFOC nu’udár Prezidente Komisaun, no membru komisaun seluk nu’udár testemuña de’it.

Termu entrega ne‘e, membru  Komisaun R&I rasik mak prepara ho lian Portugés, no iha kláuzula 2 no 3, deskreve katak komesa hosi  loron 18 jullu 2013, Ministériu Saúde mak toma inteira responsabilidade ba ró ambulánsia ne‘e no Kompañia PT. SIP laiha ona responsabilidade ba estragus hosi natureza no mal ezekusaun.

Maske entre MS ho PT SIP, seidauk realiza kona-ba planu atu fó formasaun ba pesoál sira ne’ebé atu lori ró refere, empreza rasik seidauk prepara livru manual ba operasaun ró refere, ne’ebé nu’udár kestaun importante ba operasaun ró nian. Maibé, arguidu JFD OC, nu’udár Prezidente Komisaun ho Departamentu Lojístika MS no JCS, nu’udár membru komisaun R&I no Koordenadór Ekipa Tékniku MS, rekomenda atu Ministériu Saúde, foin halo fali amandamentu ba kontratu, tanba kontratu mate tiha ona besik fulan-neen, no husu prosesu pagamentu 100% ho montante tuir kontratu.

Bainhira ró ambulánsia to‘o iha  Dili, husi parte Ministériu Saúde halo fali kontaktu ho tékniku kompañia PT. SIP hodi hadi’a fali masin ida ne‘ebe at, no tékniku hosi kompañia PT. SIP nian, depois hadi’a tiha ró ambulánsia refere, iha loron 12 to’o loron 15 maiu 2014, hato‘o relatóriu ba Ministériu Saúde, ne’ebé relata no rekomenda ba iha Ministériu Saúde katak husu ba MS atu tau atensaun ba operasaun ró refere liuhosi meius haruka funsionáriu ne’ebé nu’udár operadór ró refere, atu tuir formasaun iha Surabaya ho kustu ne’ebé responsabiliza hosi MS rasik.

Haree ba sirkunstánsia hotu, Prokuradór titular Rogério Viegas  perante iha julgamentu afirma katak,  krime ne’ebé  MP imputa ba arguidu DG ho konkursu krime burla agravadu no falsifikasaun dokumentu anotasaun téknika, ne‘ebe previstu no punidu iha art. 267 n° 1 no art. 303 n° 1 a1. a) no b), hosi kódigu Penal, no arguidu/a sira imputa ho krime partisipasaun ekonomia ho negósiu, ne’ebé previstu no punidu iha art. 299 n° 1 e 2, husi Kódigu Penal.

Tuir art. 299 no 1, husi Kódigu Penal hateten katak funsionáriu ne’ebé tenke intervein iha kontratu, ka Operasaun ka atividade seluk, tanba kargu públiku ne’ebé sira kaer, no aproveita kondisaun ne‘e, atu hetan ba nia aan ka ba ema seluk, diretamente ka hodi ema seluk, vantajen patrimonial, ka oin naran ida, partisipasaun ekonómika ilísita, no nune‘e hamosu prejuizu ba interese públiku, ne’ebé nia tenke administra, fiskaliza, defende ka realiza, sei hetan pena prizaun tinan-rua  to‘o tinan-ualu, no iha númeru 2 hosi artigu ida ne‘e, hateten katak kuandu konduta ka aktu ne‘e hamosu ba Estadu prejuizu aas-liu $10,000,00 sei aplika pena prizaun tinan-tolu to’o tinan-15.

Bazeia ba faktu no mós provas sira hotu ne’ebé provadu, MP konklui katak arguidu/a sira mak hanesan AMPM, JFDOC, JCS, LB, ADC, EDJAM, no JDCM, sira hotu ho ida-idak nia kontribuisaun no ho konjuga asaun esforsu, nu’udár ko-autores materiais, pratika krime partisipasaun ekonomia ho negósiu, ne’ebé previstu no punidu iha art. 299 n° 1 e 2, hosi Kódigu Penal, nune‘e, MP husu ba Tribunal Koletivu ida ne‘e atu kondena arguidu/a sira ho pena prizaun efetiva tinan-ualu iha prizaun.

Relasiona ho arguidu DG nia konduta ba krimi Burla Agravadu, MP husu Tribunal koletivu ida ne‘e atu kondena nia ho pena efetiva tinan-hitu  iha prizaun, no ba krime falsifikasaun dokumentu anotasaun téknika, MP husu atu kondena ho pena efetiva tinan-rua, komulasaun ba pena hamutuk tinan-sia iha prizaun, pena únika MP husu pena efetiva tinan-ualuiha prizaun.

Parte Defeza Pedro Aparicio Guterres, ne’ebé fó asisténsia ba arguidu na’in-tolu LB,ADC, EDJAM   iha nia alegasaun hateten, prosesu  kauza ba problema ró ne’e la’ós arguidu sira mak sai hun, tanba sira nu’udár membru KAMS haree de’it ba prosesu administrativu hala’o avaliasaun no rekomendasaun maibé kona-ba polítika atu sosa ró ne’e mai hosi Governu liuhosi Ministru tutela mak hatún despaxu.

“Deklarasaun arguidu ho sasin na’in-12 deklara ba Tribunál ida ne’e iha julgamentu sira liubá katak kona-ba prosesu tenderizasaun ró lao di’ak tuir prosesu hotu to’o ró  ne’e to’o iha Timor-Leste, agora kestaun  ró to’o Timor Leste hala’o tiha nia operasaun mak avaria la’ós  arguidu sira ne’e, hanesan iha  deklarasaun sasin sira nian katak ró ne’e hafoin hetan avaria enxe sala olio,” Advogadu Pedro Aparicio argumenta.

Nia hateten, ho nune’e ho konkluzaun katak laiha relasaun ho krime nune’e husu atu absolve arguidu sira hotu.

Parte defeza husi arguidu  AMP, JFOC, JC, JDCM husu mós ba tribunál atu absolve arguidu hotu hosi krime ne’ebé parte Ministériu Públiku imputa tanba faktu no natureza krime la relevánsia.

Hafoin rona tiha alegasaun parte sira, Tribunál deside adia fila-fali julgamentu ne’e ba iha loron  26 outubru 2020, iha tuku 9:00 dadeer, hodi rona desizaun final hosi Tribunál.

Audiénsia  julgamentu ne’e prezide husi juis koletiva Sribuna da Costa, António do Carmo, Albertina Neves no Ministériu Públika reprezenta hosi prokuradór Rogério Viegas no arguidu ho arguida sira hetan asisténsia legal hosi advogadu privadu Pedro Aparicio, Adérito Fernandes Reis, no advogadu privadu ida seluk ho Defensor Públiku Fernando Lopes Carvalho.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here