Eis Ministru Saúde, Sergio Lobo. Imajen/Egas Cristovao

DILI, 17 setembru 2020 (TATOLI)-Tribunál Distritál Dili (TDD) kontinua rona sasin ba kazu ró Ambulánsia husi Ministériu Saúde (MS) ne’ebé deskonfia hamosu infrasaun iha prosesu konkursu públiku  (tenderizasaun).

Notísia Relevante : TDD rona sasin eis governante na’in-rua ba kazu ró ambulánsia

Liuhusi kontinuasaun julgamentu, kuarta ne’e, Tribunal Distritál Dili aprezenta sasin eis Ministru Saúde, Sergio Lobo , ne’ebé asume nu’udar Ministru Saúde    iha fulan agostu 2012 to’o 2014.

Ró ambulánsia  ne’e Governu liuhosi Ministériu Saúde sosa iha 2012, maibé la konsege utiliza ho di’ak tanba avaria tiha de’it, tanba ne’e fó prejuizu ba Estadu lakon osan purvolta $ 414,876.64.

Iha prosesu konkursu públiku ba ró ambulánsia MS nian ne’e, Ministériu Públiku (MP) notifika arguidu nain-ualu (8) mak deskonfia komete irregularidade, kompostu husi arguidu AMPM, LB, EJA, AC, JFOC, JCS, JCM ho DG.

Arguidu sira-ne’e mesak dirijente importante hodi foti desizaun administrativu, finansa no aprovizionamentu iha Ministériu Saúde.

MP akuza arguidu sira ba krime partisipasaun ekonomia no negósiu, borla agravadu no falsifikasaun dokumentu ne’ebé previstu iha artigu 299, 266,267 husi kódigu penál Timor-Leste, relasiona ho projetu fornesimentu ró ambulánsia tuir planu (MS) nian iha tinan 2012.

Iha  audiénsia julgamentu  ne’e sasin   Sergio Lobo, konfesa  ba Tribunál katak, kna’ar ne’ebé nia kompeténsia atu hala’o  mak supervizaun ba servisu hotu-hotu iha MS nian, no iha momentu ne’ebá  nia parte delega kompeténsia ba vise ministra/ministru  na’in-rua, mak haree kona ba servisu nutrisaun nian no étika instituisaun.

Nia dehan, antes nia parte seidauk asume kargu hanesan ministru  kona-ba prosesu tenderizasaun ba konstrusaun ró ambulánsia ne’e la’o antes tiha ona.

Sergio Lobo deklara, nia parte  iha koñesimentu ofisiál ida mak  simu karta ida hosi Diresaun Lojístika MS nian, hodi aprova fundu viajen ba inspesaun ró ambulánsia ne’e iha Indonézia, ne’ebé dirije husi ekipa Komisaun Aprovizionamentu Ministériu Saúde (KAMS).

“Ema sira ne’ebé mak hamutuk ba halo inspesaun ne’e na’in-lima, kompostu husi pesoál balun husi Ajénsia Dezenvolvimentu Nasional (ADN), maibé sira nia naran ha’u la lembra” nia haktuir ne’e.

Nia  hatutan, kona-ba pedidu estensaun konstrusaun ne’ebé hato’o husi empreza PT Samudra Indoraya Perkasa, nia parte la lembra no ladún iha koñesimentu.

Kona-ba informasaun dehan, konstrusaun ró ambulánsia ne’e atinje ona 50%, Sergio Lobo lia tun dehan, la lembra se mak fó hatene, maibé kona-ba inaugurasaun  nia partisipa.

Sergio Lobo mós konfesa tan, tuir nia koñesimentu bainhira iha inaugurasaun ró refere to’o iha Timor-Leste kona-ba sasán sira jerálmente iha laran ne’e kompletu, tanba akompaña hosi tékniku sira hosi empreza nian.

“Iha inaugurasaun ró ne’e ha’u ba  partisipa no koko sa’e hala’o viajen to’o tasi klaran ho di’ak, maibé depois ida ne’e kleur iha tempu seluk rona ró ne’e hetan avaria tuir tékniku sira katak enxe olio mak sala, nune’e hetan avaria, nune’e parte inspesaun husi MS ba halo inspesaun kona-ba rezultadu tékniku  husi inspesaun ha’u ladún iha koñesimentu tanba parte tékniku nian, no agora mós ladún hatene tanba dokumentu sira relatóriu kleur ona,” Sergio Lobo tenik.

Hafoin rona tiha deklarasaun eis governante ne’e, Tribunál deside adia fila-fali julgamentu bao ja  loron 28  setembru  2020, tuku 09:00 OTL, hodi rona sasin nu’udar eis governante balun tan.

Audiénsia julgamentu ne’e prezide husi Juiz koletivu Sribuna da Costa, Antonio do Carmo, Albertina Neves, no Ministériu Públiku reprezenta hosi Prokuradór Rogério Viegas, arguida no arguidu sira hetan asisténsia legal husi Defensor Públiku ho advogadu privadu.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here