Logotipu TDD. Imajen/Egas Cristóvão

DILI, 13 jullu 2020 (TATOLI) – Tribunál Distritál Dili (TDD), ohin, kontinua rona sasin ka testemuña sira ba kazu sosa ró ambulánsia hosi Ministériu Saúde (MS), ne’ebé deskonfia hamosu infrasaun iha prosesu  konkursu públiku (tenderizasaun).

Notísia Relevante : Tribunál Kontinua Julga Kazu Ró Ambulánsia

Ró ambulánsia ne’e Governu liuhosi Ministériu Saúde sosa iha 2012, maibé la konsege utiliza ho di’ak tanba aat tiha de’it no la uza to’o agora. Tanba ne’e, fó prejuizu ba Estadu lakon osan purvolta $414,876.64.

Iha prosesu ne’e, Ministériu Públiku (MP)  nu’udar na’in ba asaun penál notifika arguidu nain-ualu (8) mak deskonfia komete irregularidade, kompostu hosi arguidu AMPM, LB, EJA, AC, JFOC, JCS, JCM no DG.

Arguidu lubun ne’e mesak dirijente importante hodi foti desizaun administrativu, finansa no aprovizionamentu iha Ministériu Saúde.

Ba kazu ne’e, MP akuza arguidu sira komete krime partisipasaun ekonomia no negósiu, borla agravadu no falsifikasaun dokumentu ne’ebé previstu iha artigu 299, 266, 267 hosi kodigu penal Timor-Leste.

Liuhusi audiénsia julgamentu, sasin ho inisiál JM konfesa ba Tribunál katak, nia parte iha tinan 2012 até 2013 asume kna’ar nu’udar Diretór Nasionál Planu no Finansa iha MS no nia iha koñesimentu liuhosi despaxu hosi superior (membru Governu tutela) haruka pedidu kona-ba prosesu pagamentu ba kompañia ne’ebé halo konstrusaun ró refere ho karakter urjénsia.

JM hatutan, hafoin verifika buat hotu la’o tuir regra no prosedimentu, nune’e nia parte submete de’it ba iha Ministériu Finansa hodi bele halo pagamentu iha altura ne’ebá.

Iha julgamentu ne’e parte defeza husu Tribunál atu adia hikas julgamentu ne’e ba tempu seluk, tanba razaun sei iha prosesu seluk iha lokraik ne’e. Ho nune’e, sasin sira seluk hanesan eis membru Governu nai- rua Sergio Lobo ho Madalena Hanjan ne’ebé marka mós prezensa iha Tribunál la konsege rona sira nia deklarasaun, tanba audiénsia julgamentu adia hikas ba fali loron 29 jullu, tinan ne’e, tuku 16:30 Otl.

Julgamentu ne’e prezide hosi Juis koletivu Sribuna da Costa, António do Carmo, Albertina Neves, no Ministériu Públiku reprezenta hosi Prokuradór Rogério Viegas. Arguidu sira hetan asisténsia legál hosi Defensor Públiku no advogadu privadu.

Jornalista   : Nelson de Sousa

Editór        : Francisco Simões

 

HAKEREK NO HATÁN

Please enter your comment!
Please enter your name here