Logotipu Tribunál Distritál

DILI, 22 juñu 2020 (TATOLI)-Tribunál Distritál Dili (TDD), ohin, kontinua halo audiénsia julgamentu ba kazu sosa ró ambulánsia husi Ministériu Saúde, ne’ebé deskonfia hamosu infrasaun iha prosesu tenderizasaun.

Notísia Relevante : TDD Julga Kazu Ró Ambulánsia

Ró ne’e Governu liuhosi Ministériu Saúde sosa iha tinan 2012, maibé la konsege utiliza ho di’ak tanba at tiha de’it, tanba ne’e, fó prejuízu ba Estadu lakon osan purvolta $414,876.64.

Liuhusi audiénsia julgamentu ne’e, sasin  CDCG  konfesa ba Tribunál katak iha 2010-2012 asume kna’ar hanesan Xefe Departamentu Ambulánsia ba Diresaun Nasionál Ospitál, momentu ne’ebá nia parte  hetan despaxu hosi superiór hodi halo pedidu kona-ba  atu sosa ró refere, maibé kona-ba  prosesu akizisaun ró ambulánsia ne’e nia  parte laiha koñesimentu.

Sasin seluk ho inisiál NFS  mós lia-tun dehan iha  tinan 2007-2014 hanesan funsionáriu apoiu gabinete jurídiku MS nian hodi   hala’o kna’ar  fó paresér servisu relasaun ho asuntu jurídiku nian iha ministériu, tanba ne’e, kona-ba prosesu kontrasaun sosa ró ambulánsia  nia parte so iha koñesimentu momentu ne’ebé halo de’it paresér kona-ba rekomenda ba parte sira  antes halo pagamentu atu halo uluk inspesaun, enkuantu envolvimentu ba paresér estensaun kontratu seluk nia parte la lembra ona.

Ministériu Públiku (MP) notifika arguidu na’in-ualu (8) mak deskonfia komete irregularidade iha prosesu tenderizasaun ba ró ne’e,  kompostu husi arguidu AMPM, arguido LB,  arguida EJA, AC, JFOC, JCS, JCM ho DG. Arguido sira ne’e mesak dirijente importante hodi foti desizaun administrativa, finansa no aprovizionamentu iha Ministériu Saúde.

MP akuza arguidu sira ba krime partisipasaun ekonomia no negósiu, borla agravadu no falsifikasaun dokumentu ne’ebé previstu iha artigu 299, 266, 267 hosi kódigu penál Timor-Leste, relasiona ho projetu fornesimentu ró ambulánsia tuir planu Ministériu Saúde (MS) iha tinan 2012.

Iha tinan 2012 hosi dirasaun nasionál servisu ospitalares no Enkaminhamentu (DNSHE) iha planu atu sosa ró ambulánsia hodi fasilita tula moras hosi Atauro no Oe-Cosse mai Dili, maibé husi dirasaun ne’e rasik la halo estudu viabilidade la iha dezeñu no BoQ.

Arguida AMPM haruka arguidu JM ne’ebé nu’udar motorista maka prepara dezeñu ho espesifikasaun ba ró ambulánsia nian.

Ho koñesimentu ne’ebé mukit liu kona-ba dezeñu ró ambulánsia, arguidu JM ba iha Unidade Polísia Marítima (UPM) husu dezeñu no espesifikasaun ró nian.

Bainhira hetan tina dezeñu espesifikasaun ró nian husi UPM, arguidu JM entrega dezeñu espesifikasaun ba iha arguida AMPM, nune’e AMPM la halo rekomendasaun ba iha Ministru Saúde atu nomea tékniku sira ne’ebé iha koñesimentu ba ró nian hodi halo estudu viabilidade ba dezeñu espesifikasaun tanba Ministériu Saúde la iha tékniku pesoál ba ró nian.

Arguida AMPM foti dezeñu espesifikasaun husi UPM hodi haruka arguidu CV ne’ebé momentu ne’e nu’udar diretór DNHSE ein- ezersísiu tanba arguida AMPM lisensa partu halo pedidu ba Vise Ministra Saúde atura ne’ebá atu aprova orsamentu ba sosa ró ambulánsia.

Bainhira simu tiha pedidu ne’e iha loron 2 marsu 2012, Vise Ministra Saúde altura ne’ebá hatún despaixu ba arguida EJA nu’udar diretora finansas atu prepara CPV ho PR.

Depoimentu ne’ebé  arrola hosi Ministériu Públiku katak, dezeñu ho espesifikasaun laiha, maibé iha loron 8 marsu 2012, arguidu AMPM prepara CPV ho montante $500,000,00 ne’ebé halo uluk sertifikasaun husi arguidu LB iha loron 12 marsu 2012, foin hetan autorizasaun husi arguidu JRM iha loron 19 marsu 2012 hetan aprovasaun husi Vise Ministra Madalena Hanjam.

Antes Ministra Saúde aprova CPV no PR, iha loron 10 marsu 2012, dirasaun nasionál administrasaun lojístika no aprovizionamentu hahú lansa konkursu públiku ba projetu fornesimentu no instalasaun ba ró ambulánsia iha ho tipu International Competitive Bidding ka konkursu internasionál.

Iha membru Komisaun Aprovizionamentu Ministériu Saúde (KAMS) kompostu husi arguidu LB nu’udar prezidente KAMS, arguidu AC nu’udar sekretáriu KAMS, arguidu JFOK nu’udar membru permanente KAMS, arguidu EJAM nu’udar membru permanente KAMS, arguidu JCS nu’udar mós membru permanente KAMS, no arguidu JCM nu’udar membru variavel KAMS.

Lansamentu konkursu fornesimentu ba ró ambulánsia ne’e iha kompañia lima maka submete ba sira-nia proposta hanesan kompañia PT.Samudra Indora Perkasa (SIP) CV, Bintang Samudra Juran Jawa Unip Lda, hahú halo abertura ba proposta husi kompañia lima ne’ebé hatama ona sira-nia dokumentu konkursu nian.

Iha loron 16 marsu 2012, ekipa KAMS na’in-rua arguidu AC ho JCM ho asesór Jayendra Batta hahú abertura ba kompañia lima ne’ebé hatama dokumentu konkursu ne’e.

Husi kompañia-lima ne’ebé submete ona ba sira-nia proposta, ekipa avaliasaun KAMS fó de’it Pontus avaliasaun ba kompañia tolu  maka hanesan PT, Samudra Indoraya Perkasa (SIP) hetan valor 74, CV Bintang Samudra hetan valor 70, Joran Jawa Unip hetan valor 59. Enkuantu kompañia seluk hanesan Oceen Lda no PT Kaha Jaya Marine, ekipa avaliasaun KAMS la fó pontu avaliasaun. Ho nune’e, ekipa KAMS rekomenda kompañia PT. Bintang Samudra sai vendedór iha konkursu ida-ne’e.

Tuir mai ekipa avaliasaun deside hodi rekomenda atu halo adjudikasaun ba kompañia PT. Samudra Indoraya Perkasa, nu’udar nanán-nain ho kontratu $423,343,51 ho durasaun kontratu ba loron 90 nia-laran.

Iha loron 12 jullu 2012, Ministériu Saúde ne’ebé reprezenta husi Diretór Jerál, Agapito da Silva Soares, selebra kontratu ho kompañia PT. Samudra Indoraya Perkasa ne’ebé reprezenta husi arguidu DW tuir karta prokurasaun, ho kontratu $423,343,51, hodi fornese no instala ró ambulánsia Ministériu Saúde ho durasaun fulan-tolu, hahú husi loron 10 jullu 2012 too iha loron 09 outubru 2012.

Depois asina tiha kontratu refere, iha loron 06 too iha loron 09 agostu 2012, ekipa inspesaun ba material konstrusaun ró ambulánsia ne’ebé kompostu husi arguidu JCS, JMM, RI ho JCM nu’udar membru variavel iha KAMS, arguidu AC nu’udar tékniku jestaun ba kontratu no Jayhendra Bhatta nu’udar asesór aprovizionamentu ba halo inspesaun material konstrusaun ba ró ambulánsia iha Surabaya-Indonézia.

Rezultadu husi inspesaun hatudu katak konstrusaun ró refere nian progresu fíziku inklui material ne’ebé atinje ona ba 50% ho medida 11,97 metru. Alende ida-ne’e, ekipa inspesaun ba armazén kompañia PT Samudra Indoraya Perkasa, hodi observa katak material konstrusaun ró ambulánsia ne’e tuir duni espesifikasaun tékniku ne’ebé mensiona iha kontratu refere.

Iha loron 10 outubru 2012, Dirasaun Nasionál Administrasaun Lojistiku no Aprovizionamentu arguidu LB hato’o pedidu desizaun no aprovasaun ekipa inspesaun ró ambulánsia ba iha Surabaya ba segunda faze ne’ebé kompostu husi Jayendra Bhatta nu’udar asesór aprovizionamentu, Alvaro Abrantes nu’udar tékniku espesialista.

Hafoin rona tiha deklarasaun sasin sira, Tribunál deside adia hikas julgamentu  ba fali  loron 29 juñu,  tinan ne’e,  iha tuku 16:00 Otl, hodi kontinua rona sasin sira seluk-tan.

Audiénsia Julgamentu ne’e prezide hosi Juiz koletivu Sribuana da Costa, Antonio do Carmo, Albertina Neves, no Ministériu Públiku reprezenta hosi Prokuradór  Rogeiro Viegas, nune’e  Arguidu sira hetan asisténsia legal hosi advogadu privadu.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here