Diskusaun ba projetu Lei Númeru 1/V/2019-Lei Anti Corrupção (LAC), durante loron rua (01-02 jullu 2020), iha Mukit Guest House Aisirimou Aileu. Imajen/Mídia CAC.

AILEU, 08 jullu 2020 (TATOLI)–Iha diskusaun ba Lei Antí Corrupção (LAC), ohin, deputadu sira hosi komisaun A Parlamentu Nasionál hamutuk ho entidade relevante sira kontinua halo diskusaun ba Projetu Lei Númeru 1/V/2019-Lei Antí Corrupção (LAC) kona-ba Lei Krime Korrupasaun nian, ne’ebé kompostu hosi  kapitulu neen (VI) ho nia artigu hamutuk 47.

Notísia Relevante: Komisaun A Elimina Artigu 21 hosi Lei Krime Korrupsaun

Iha loron 7 fulan jullu tinan ne’e, hafoin elimina artigu 21, deputadu sira no entidade relavante sira kontinua diskute no aprova artigu 22 kona-ba Pose Rikeza Injustifikada.

Artigu 22 ne’e, obriga servidór Estadu no povu Timor-Leste hosi nivel Xefia to’o Prezidenti Repúblika atu deklara no halo justifikasaun ba sira-ninia rikusoin ba CAC, tuir LAC Kapitulu III.

Prezidente meza diskusaun, Deputadu Joaquim Boraluli, iha intervensaun husu ba deputadu sira hosi Komisaun A katak, presiza rona apresiasaun hosi konvidadu sira ba artigu 22.

Tanba, nia dehan, tuir ninia rasosínu katak deputadu proponente sira-nia hakarak introdús norma ida-ne’e, foka de’it ba iha entidade sira-ne’ebé hetan fiar hosi Estadu hodi hala’o knaar públiku hosi nível Xefe Departamentu to’o Prezidenti Repúblika.

“Komisaun presiza rona apresiasaun sira-ne’e. Tanba lei ne’e bainhira tama vigór sei kona hotu ita, hahú hosi Prezidente Repúblika to’o xefe  departamentu sira,” Prezidente Komisaun A introdús iha dikusaun. 

Entretantu, Komisáriu Adjuntu ba Asuntu Investigasaun, Augusto Castro, konsidera artigu ida-ne’e importante tebes tanba ilustra ukun-na’in hamutuk ho povu Timor-Leste nia vontade no seriedade ba luta kontra korrupsaun iha rai-ne’e.

“Artigu ida-ne’e ninia ezijénsia atu oinsá autoridade sira halo esforsu hamutuk kombate korrupsaun. Timor-Leste labele save-aan iha sistema ida-ne’ebé fó fatin ba iha haburas korrupsaun,” Komisáriu adjuntu ne’e argumenta.

Nia mós konsidera artigu ida-ne’e, ajuda tebes servisu CAC nian iha faze investigasaun ba efeitu pena (represivu) no prevensaun (korrupsaun) nian.

Notísia Relevante: CAC Kongratula Komisaun A Aprova Ona Dispozisaun Legál Medida Preventiva LAC

Hosi ideia sira iha diskusaun ne’e, ikus mai deputadu sira konkorda ho konsensu halo pasa ba artigu 23 kona-ba Brankeamentu ne’ebé mós kontempla iha artigu 313 Kódigu Penál Timor-Leste.

Esbosu LAC ne’e importante tebes atu kompleta Lei Númeru 8/2009 15 de Jullu kona-ba Estabelesimentu Comissão Anti-Corrupção (CAC) no Kódegu Penál Timor-Leste nian, hodi Komisaun hala’o servisu represivu iha esforsu luta kontra korrupsaun iha rai ne’e.

Diskusaun ne’ebé hala’o iha Mukit Guest House Aisirimou, Aileu, iha loron Tersa, 07 jullu tinan ne’e, partisipa husi Deputadu sira husi Komisaun A Parlamentu Nasionál Asuntu Konstitusionais no Justisa mak hanesan Prezidente Joaquim dos Santos, Vise Prezidente Francisco de Vasconcelos, Sekretáriu José Pacheco Soares, Membru Francisco Miranda Branco, Dário Madeira, Patrocíno Fernandes, Carmelita Moníz, Óscar de Araújo no António Nobre Amaral Tilman.

Entidade relevante sira ne’ebé partisipa mós iha diskusaun ne’e mak hanesan Adjuntu Prokuradór Jerál Repúblika Alfonso Lopez,  Estrutura CAC kompostu husi komisáriu Sérgio Hornai, Komisáriu Adjuntu Augusto Castro, ho Luis Sampaio, Komisáriu Adjuntu CAC ba asuntu Servisu Apoiu no Kooperasaun (SAC), Alexandre Freitas, akompaña husi Asesora Jurídika Mariman Oliveira, Diretór Polisia Sientifika Investigasaun Kriminál (PSIK), Vicente F. Brito, adjunta defensora jerál públika Olga Berreto Nunes no Asessór Jurídiku Komissaun A Parlamentu Nasionál, Anildo da Cruz ho Pedro Andrade.

Notísia Relevante: Komisaun A Aprova LAC Kapítulu Primeiru “Medida Jerál Sira Prevensaun Nian”

Jornalista   : Cipriano Colo

Editór            :  Cancio Ximenes

HAKEREK NO HATÁN

Please enter your comment!
Please enter your name here