Membru Bankada CNRT, Carmelita Caetano Moniz. Imajen/Tatoli Egas Cristovao

AILEU, 07 jullu 2020 (TATOLI)–Deputadu sira hosi komisaun A Parlamentu Nasionál hamutuk ho entidade relevante sira kontinua halo diskusaun ba Projetu Lei Númeru 1/V/2019-Lei Anti Corrupção (LAC) kona-ba Lei Krime Korrupasaun nian, ne’ebé kompostu hosi  kapitulu neen (VI) ho nia artigu hamutuk 47.

Notísia Relevante: Komisaun A Hahú Diskute Lei Krime Korrupsaun

Diskusaun ne’ebé hala’o iha Mukit Guest House Aisirimou, Aileu, iha loron Tersa, 07 jullu tinan ne’e, deputadu sira elimina tiha artigu 21 hosi Lei Krime Korrupsaun nian ho nia konteúdu, falta deklarasaun bens, rendimentus no intereses.

Razaun eliminasaun ne’e, tanba komtempla ona iha testu anteriór kona-ba rejime deklarasaun de bens no intereses ne’ebé arova tiha ona iha diskusaun semana kotuk.

Deputadu proponente ba eliminasaun artigu 21 mak hanesan deputada Carmelita Caetano Moniz, deputadu Francisco Miranda Branco no deputadu Dário Madeira, ho proposta númeru 35 data 07/07/2020.

Iha votasaun, deputadu sira aprova unanimidade hosi deputadu Komisaun A prezente hamutuk na’in sia (9) ho votus a-favór 9, abstensaun 0 kontra 0.

Molok deputadu sira halo votasaun atu elimina artigu ne’e, Prezidente Meza Deputadu Joaquim dos Santos Boraluli fó tempu ba proponente sira hodi halo justifikasaun ne’ebé reprezenta hosi deputada Carmelita Caetano Moniz.

“Ami propoin atu elimina artigu ida-ne’e, tanba hanesan de’it ho artigu ida-ne’ebé tuir justifikasaun sumária ida-ne’ebé kontempla tiha ona iha Rejime Deklarasaun Bens no Rendimetu, Intereses ne’ebe ita aprova tiha ona,” Deputada proponente Carmelita Moniz halo leitura.

Hafoin elimina artigu 21, deputadu sira Komisaun A no entidade relavante sira kontinua deskute no aprova artigu 22 kona-ba Pose Rikeza  Injustifikada.

Deputadu sira husi Komisaun A Parlamentu Nasionál Asuntu Konstitusionais no Justisa ne’ebé partisipa iha dikusaun ne’e mak hanesan Prezidente Joaquim dos Santos, Vise Prezidente Francisco de Vasconcelos, Sekretáriu José Pacheco Soares, Membru Francisco Miranda Branco, Dário Madeira, Patrocíno Fernandes, Carmelita Moníz, Óscar de Araújo no António Nobre Amaral Tilman.

Entidade relevante sira ne’ebé partisipa mós iha diskusaun ne’e mak hanesan Adjuntu Prokuradór Jerál Repúblika Alfonso Lopez,  Estrutura CAC kompostu husi komisáriu Sérgio Hornai, Komisáriu Adjuntu Augusto Castro, ho Luis Sampaio, Komisáriu Adjuntu CAC ba asuntu Servisu Apoiu no Kooperasaun (SAC), Alexandre Freitas, akompaña husi Asesora Jurídika Mariman Oliveira, Diretór Polisia Sientifika Investigasaun Kriminál (PSIK), Vicente F. Brito, adjunta defensora jerál públika Olga Berreto Nunes no Asessór Jurídiku Komissaun A Parlamentu Nasionál, Anildo da Cruz ho Pedro Andrade.

Notísia Relevante: Governu Konsidera LAC Sei Fó Poder ba CAC Kombate Korrupsaun

Jornalista : Cipriano Colo

Editór        :  Cancio Ximenes

HAKEREK NO HATÁN

Please enter your comment!
Please enter your name here