Komísariu CAC, Sergio Hornai. Imajen/António Gonçalves

MANUFAHI, 25 juñu 2020 (TATOLI)–Komisáriu Comissão Antí Corrupção (CAC), Sérgio Hornai, kongratula deputadu sira hosi Komisaun A Parlamentu Nasionál (PN) ne’ebé hala’o votasaun no aprova  Titulu Espesialidade Dispozisaun Legál sira kona-ba Medida sira Preventiva nian, ba Projetu Lei Númeru I/V/2019 Lei Antí Corrupção (LAC).

Nia hatutan, ho deputadu sira-nia matenek, sabedoria no esforsu durante diskusaun intensivu ba espesialidade no jeneralidade, durante loron rua hahú hosi loron 24-25 fulan juñu, hodi aprova lei refere iha Otél Uma Liurai, Ailok Laran, Babulo Same-Manufahi.

Notísia Relevante: Komisaun A Aprova LAC Kapítulu Primeiru “Medida Jerál Sira Prevensaun Nian”

“Ha’u  lori CAC nia naran hato’o parabéns ba distintu deputadu sira hosi Komisaun A Parlamentu Nasionál ba esforsu ne’ebé ohin ho sira ninian matenek, sabedoria, kolaborasaun ida di’ak tebe-tebes iha diskusaun ida dinámiku, konsege konklui títulu no kapítulu sira ne’ebé mak iha relasionamentu ba prevensaun ninian,” Komisáriu CAC Sérgio Hornai hateten.

Líder másimu CAC ne’e konsidera progressu ida-ne’e hanesan espasu boot ida ba istória nasaun Timor-Leste nu’udár nasaun joven iha luta sagradu kontra korrupsaun, hafoin projetu LAC suspende iha tempu balun tanba situasaun polítika Timor-Leste nian rasik.

Maski ho diverjénsia polítika ne’ebé iha, Sérgio mós apresia tanba deputadu sira hosi partidu politiku sira ne’ebé iha Komisaun A, iha vontade polítika ne’ebé boot tebes hodi hola desizaun importante konta mós ho entidade relevante sira.

“Ohin, ita hatudu ita-nia vontade politika ida-ne’ebé boot tebe-tebes hosi partidu sira ne’ebé iha bankada parlamentar sira hotu ne’ebé mak konstitui iha Komisaun A hodi halo desizaun ida estremamente importante iha koordenasaun ho instituisaun relevante sira hanesan CAC, PSIC, PDHJ, Ministeriu Justisa no ONG balun ne’ebé mak hola parte iha ne’e, hodi kontribui sira ninia hanoin ba iha diskusaun kada artigu ho sesaun ne’ebé mak ohin ita ninia Deputadu sira konsege halo apresiasaun no aprovasaun ba artigu sira hamutuk 25,” Komisáriu Sérgio louva.

Estrutura CAC ne’ebé partisipa ativamente iha diskusaun hamtuk ho Komisaun A Parlamentu Nasionál ba Titulu Espesialidade Dispozisaun Legál Kona-ba Medidas Preventivas Projetu Lei Númeru I/V/2019-LAK ne’e mak hanesan Komisáriu KAK Sérgio Hornai, Komisáriu Adjuntu Augusto Castro ho Luis Sampaio, Diretór Jerál Prevensaun no Sensibilizasaun Rosário de Araújo, no akompaña hosi Asesora Jurídika Mariman Oliveira.

Entretantu Deputadu proponente hamutuk na’in 10 husi Komisaun A Asuntu Konstitusionais no Justisa mak hanesan Prezidente Joaquim dos Santos, Vise Prezidente Francisco de Vasconcelos, Sekretáriu José Pacheco Soares, Membru Francisco Miranda Branco, Dário Madeira, Patrocíno Fernandes dos Reis, Carmelita Moníz, Óscar de Araújo, António Nobre Amaral Tilman, no  Francisco David Xavier Carlos.

Tuir ajenda, aban deputadu sira hosi komisaun A hamutuk ho entidade relevante sira sei kontinua halo diskusaun kona-ba titulu I medidas kombate korrupsaun, kapitulu II kona-ba Rejime Deklarasaun Bens no Interese Sira ne’ebe iha sesaun VIII, ho nia artigu hamutuk 39.

Jornalista : Cipriano Colo

Editór       :  Cancio Ximenes

HAKEREK NO HATÁN

Please enter your comment!
Please enter your name here