Deputadu hosi Komisaun A hamutuk ho entidade relevante sira kontinua diskute artigu 34 ne’ebé ko’alia kona-ba deklarasaun agregadu familiar, iha Mukit Guest House, Aisirimou Munisipiu Aileu. Imajen Tatoli/Cipriano Colo.

AILEU, 01 jullu 2020 (TATOLI)-Deputadu sira hosi komisaun A hamutuk ho entidade relevante sira, kontinua halo diskusaun ba Lei Anti Corrupção (LAC) titulu I medida kombate korrupsaun, kapitulu II kona-ba “Rejime Deklarasaun Bens no Interese Sira” ne’ebé iha sesaun VIII ho nia artigu hamutuk 39.

Notísia Relevante: Diskusaun LAC ba Rejime Deklarasaun Bens no Interese to’o Ona Artigu 33

Deputadu sira kontinua diskute artigu 34 ne’ebé ko’alia kona-ba deklarasaun agregadu familiar, iha Mukit Guest House, Aisirimou Munisipiu Aileu, tanba antes ne’e (loron 24-26 fulan juñu 2020) diksute ona to’o iha artigu 33 ne’ebé ko’alia kona-ba konteúdu deklarasaun iha Otél Uma Liurai, Ailok Laran, Babulo Same-Manufahi semana kotuk ba.

Prezidenti Komisaun A Parlamentu Nasionál (PN), Deputadu Joaquim dos Santos ‘Boraluli’ ne’ebé lidera diskusaun ne’e, ho ‘minuto silêncio’ hodi fó omenajen ba martir sira ba libertasaun nasionál.

Nune’e, diskusaun iha loron ohin to’o meiudia, konsege diskute artigu sira mak hanesan artigu 34 ko’alia kona-ba deklarasaun agregadu familiares, artigu 35 ko’alia kona-ba moeda, artigu 36 ko’alia kona-ba formuláriu, artigu 37 ko’alia kona-ba aprezentasaun, artigu 38 ko’alia kona-ba autorkorresaun, artigu 39 ko’alia kona-ba arrolamentu deklarantes, artigu 40 ko’alia kona-ba verifikasaun formál, kontinua  ho sesaun dalima (V) artigu 41 ne’ebé ko’alia kona-ba finalidade husi verifikasaun, artigu 42 ko’alia kona-ba Obrigatoridedade husi verifikasaun.

Vise Prezidente Komisaun A, Francisco de Vasconcelos, kontinua promete katak Komisaun A sei esfrosu atu halo diskusaun lalais, nune’e bainhira diskute hotu, bele submete ba plenária atu bele halo aprovasaun finál globál.

Notísia Relevante: Komisaun A Aprova LAC Kapítulu Primeiru “Medida Jerál Sira Prevensaun Nian”

Deputadu sira hosi Komisaun A Parlamentu Nasionál Asuntu Konstitusionais no Justisa ne’ebé partisipa iha dikusaun ne’e mak hanesan Prezidente Joaquim dos Santos, Vise Prezidente Francisco de Vasconcelos, Sekretáriu José Pacheco Soares, Membru Francisco Miranda Branco, Dário Madeira, Patrocíno Fernandes, Carmelita Moníz, Óscar de Araújo, António Nobre Amaral Tilman, no  Francisco David Xavier Carlos, eseptu Adriano do Nascimento la marka prezensa tanba  kondisaun saúde.

Entidade relevante sira ne’ebé partisipa mós iha diskusaun ne’e mak hanesan Vise Ministru Justisa, José Edmundo Caetano ho diretór Nasionál Assessoria Jurídika no Lejislasaun (DNAJL) Ministériu Justisa, Adjuntu Prokuradór Jerál Repúblika Alfonso Lopez,  Estrutura KAK kompostu husi komisáriu Sérgio Hornai, Komisáriu Adjuntu Augusto Castro, ho Luis Sampaio, Diretór Jerál Prevensaun no Sensibilizasaun Rosário de Araújo, akompaña husi Asesora Jurídika Mariman Oliveira, Diretór Polisia Sientifika Investigasaun Kriminál (PSIK), Vicente F.Brito, provedora Provedoria Direitus Umanus no Justisa Jesuinha Gomes, Asessór Jurídiku Komissaun A Parlamentu Nasionál, Anildo da Cruz ho Pedro Andrade, Diretora Ezekutiva Organizasaun Naun Governamentál Programa Monitarizasaun ba Sistema judisiária (JSMP), Ana Paula Marçal, Reprezentante Grupu Feto Parlamentár Timor-Leste (GMPTL sigla Portugés).

Tuir planu, diskusaun ne’e sei la’o durante loron haat (4), hahú ohin, to’o sábadu loron 4 fulan jullu tinan ne’e.

Notísia Relevante: CAC Kongratula Komisaun A Aprova Ona Dispozisaun Legál Medida Preventiva LAC

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here