Ambiente diskusaun Lei Antí Korrupsaun (LAK) iha Hotel Uma Liurai, Ailok Laran, Babulo Same-Manufahi, kuarta (24/06/2020). Imajen Tatoli/Cipriano Colo.

DILI, 26 juñu 2020 (TATOLI)–Deputadu sira husi komisaun A, ohin, hamutuk ho entidade relevante sira kontinua halo diskusaun kona-ba titulu I Medidas Kombate Korrupsaun, kapitulu II kona-ba Rejime Deklarasaun Bens no Interese Sira ne’ebe iha sesaun VIII, ho nia artigu hamutuk 39.

Hosi artigu 39 ne’e, deputadu sira hosi Komisaun A Parlamentu Nasionál (PN), hamutuk ho entidade relevante sira konsege diskute to’o iha artigu 33 ne’ebé ko’alia kona-ba konteúdu deklarasaun.

Notísia Relevante: Opozisaun Vota A-Favór ba LAC “Medida Jerál Prevensaun”

“Ohin, deputadu sira hosi komisaun A hamutuk ho entidade relevante sira kontinua halo diskusaun kona-ba titulu I Medidas Kombate Korrupsaun, kapitulu II kona-ba Rejime Deklarasaun Bens no Interese Sira ne’ebe iha sesaun VIII, ho nia artigu hamutuk 39. Tuir loloos diskusaun ne’e kontinua to’o Sábadu no Komisaun A mós husu ona ba Prezidente Parlamentu Nasionál atu fó lisensa ba ami labele partisipa plenária iha Segunda ho Tersa, hodi kontinua halo dikusaun to’o sábadu atu aselera artigu sira ne’ebé presiza halo diskusaun kle’an,” Vise Prezidente Komisaun A, Francisco de Vasconcelos, halo rezumu ba diskusaun ba loron datolu iha Otél Uma Liurai, Ailok Laran, Babulo Same-Manufahi, sesta ne’e.

Maibé, nia hatutann, tanba rejimentu la fó dalan entaun diskusaun termina de’it iha artigu 33. Tuir ajenda, nia dehan, diskusaun sei kontinua hikas iha Kuarta loron 01 fulan jullu tinan 2020, ne’ebé tuir planu sei realiza iha munisipíu Aileu.

Nia esplika, Lei Anti Corrupção (LAC) ne’e hamutuk artigu  120 no Komisaun A halo tiha ona dispozisaun jerál, iha artigu 21 ne’ebé mak aprova tiha ona iha tinan 2019 no semana ne’e diskute uluk kona-ba medida sira prevensaun nian ne’ebé ramata tiha ona ho artigu hamutuk 25 iha kinta (25/06/2020) ne’e. 

“Tanba deputadu sira mós sei hala’o resesu iha loron 15 fulan jullu to’o 15 fulan Setembru, nune’e hakarak aselera diskusaun ne’e liuliu ba artigu sira kona-ba Rejime Deklarasaun de Bens no Interese sira, atu nune’e iha fulan Janeiru bele loke ona diskusaun ba artigu sira ne’ebé koa’lia kona-ba penais nian ne’ebé sei partisipa mós hosi parte Ministériu Públiku. Ekuantu, iha fulan Setembru-Outubru deputadu sira mós sei konsentra ba iha diskusaun Orsamentu Jerál Estadu (OJE) tinan 2020-2021,” nia hateten.

Vasconcelos mós promete katak, Komisaun A sei esfrosu atu halo diskusaun lalais nune’e bainhira diskute hotu, bele submete ba plenária atu bele halo aprovasaun finál globál.

“Tanba ita diskute ona to’o artigu 33, nune’e iha diskusaun tuir mai ne’ebé sei hala’o iha Aileu, iha Kuarta loron 01 fulan Jullu tinan ne’e, sei diskute kona-ba titulu I medidas kombate korrupsaun, kapítulu II kona-ba Rejime Deklarasaun Bens no Interese Sira, artigu 34 kona-ba Deklarasaun Agregadu Familiár,”  nia hateten tan.

Nune’e mós peskizadór hosi Programa Monitorizasaun ba Sistema Judisiáriu (JSMP), Mateus Xavier hateten, durante ninia akompañamentu ba diskusaun ne’e haree katak diskusaun ba artigu pur artigu hosi parte prevensaun nian kle’an tebes, involve direta hosi entidade relevante sira ne’ebé aban bainrua sei sai implementadór ba lei ne’e rasik.

Nune’e mós iha diskusaun ohin nian, tuir nia, ne’ebé ko’alia kona-ba rejime deklarasaun de bens no interese sira, maski la hotu, no sei kontinua iha semana oin, nune’e hein katak sei diskute di’ak liután, tanba Lei ne’e rasik importante tebes atu bele regula buat hotu ne’ebé durante ne’e sai preokupasaun públiku, liga ho prevensaun Korrupsaun nian.

Diskusaun ne’e, partisipa hosi entidade relevante sira hanesan CAC, PSIK, PDHJ, no parte Ministériu Justisa no Sosiedade Sivíl, hanesan JSMP-FONGTIL.

Iha diskusaun antes, Deputadu sira hosi Komisaun A Asuntu Konstitusionál no Justisa aprova ona Proposta Projetu Lei númeru 1/V/I-Lei Anti Korrupsaun kapítulu Primeiru (I), kona-ba medida Jerál Sira Prevensaun Nian, ho nia sesaun hitu (VII), ne’ebé kompostu husi artigu 25.

Jornalista : Cipriano Colo

Editór        :  Cancio Ximenes

HAKEREK NO HATÁN

Please enter your comment!
Please enter your name here