Primeiru-Ministru, Taur Matan Ruak. Imajen Tatoli/ Egas Cristovão

DILI, 15 juñu 2020 (TATOLI)–Primeiru-Ministru (PM), Taur Matan Ruak, no Konsellu Ministru to’o oras ne’e seidauk simu esbosu-lei Kriminaliza Difamasaun tanba Xefe Governu ne’e rasik hakarak atu fó tempu ba sosiedade hodi diskute.

Primeiru-Ministru, Taur Matan Ruak, hato’o asuntu ne’e hafoin hala’o enkontru semanál ho Prezidente Repúblika, Francisco Guterres “Lú Olo”, iha Palásiu Prezidensiál Nicolau Lobato, Bairru Pité, Dili.

Notísia Relevante: Kriminaliza Difamasaun Atu Eduka Sosiedade

“Ha’u seidauk simu esbosu-lei ne’e. Gabinete Primeiru-Ministru seidauk simu no Konsellu Ministru mós seidauk simu. Ha’u hanoin, ita husik ba sosiedade mak diskute lai,” Taur Matan Ruak hateten ba jornalista sira, segunda ne’e. 

Xefe Governu ne’e hateten, respeitu ho demokrasia hanesan buat rua ne’ebé la hanesan, tanba ne’e mak nia hakarak atu sosiedade diskute esbosu-lei kriminaliza difamasaun ne’e.

“Kestaun rua ne’ebé mak ita tenke distinge entre Liberdade espresaun, direitu ema nian atu ko’alia no mós kona-ba insultus, dezrespeitu ba ema nia naran. Ida ne’e, buat rua ne’ebé la hanesan.  Purtantu, entre respeitu ho demokrasia ne’e buat rua ne’ebé la hanesan. Tanba ne’e, ha’u hakarak atu sosiedade diskute lai, depois mak ita haree,” Taur hateten. 

Notísia Relevante: Governu Presiza Define Didi’ak Esbosu-Lei Kriminaliza Difamasaun

Antes ne’e, Ministru Justisa (MJ), Manuel Cárceres da Costa, klarifika katak intensaun Governu da-ualu prodús esbosu-lei Kriminaliza Difamasaun ne’e, hanesan meiu-ida atu eduka sosiedade Timor-Leste hodi respeita malu no respeita ema seluk nia onra no integridade pesoál.

Aleinde ne’e, nia dehan, ezbosu Lei ne’e  hanesan inisiativa ida atu husu sosiedade sivíl, igreja no matenek timoroan sira-nia hanoin ne’e oinsá tanba Lei ne’e rasik seidauk aprova no Ministériu Justisa seidauk lori ba Konsellu Ministru.

Ministru Manuel Cárceres hatutan, Lei ne’e la’ós kriminaliza hahalok no laiha lei ida mak atu kastigu ema maibé Lei ne’e mai atu halo prevensaun.

Notísia Relevante: CI Konsidera Lei Kriminaliza Difamasaun Kontra Espíritu Konstituisaun RDTL

Jornalista : Cipriano Colo

Editór     : Cancio Ximenes

HAKEREK NO HATÁN

Please enter your comment!
Please enter your name here