Ministru Justisa, Manuel Cárceres da Costa. Imajen/António Gonçalves

DILI, 10 juñu 2020 (TATOLI) – Ministru Justisa (MJ), Manuel Cárceres da Costa, klarifika katak, intensaun Governu da-ualu prodús ezbosu Lei Kriminaliza Difamasaun, hanesan meiu-ida atu eduka sosiedade Timor-Leste hodi respeita malu no respeita ema seluk nia onra no integridade pesoál.

Notísia Relevante : Kriminaliza Difamasaun, Lori Derrota ba Demokrasia TL

“Governu iha konsiderasaun tebetebes ba sosiedade sivíl, konviksaun relijiozu no Concelho Imprensa. Tanba ne’e mak Governu fahe ezbosu Lei ne’e husu sira nia opiniaun ba ezbosu lei ne’e oinsá. Ministru to’o agora seidauk simu resposta ida, ne’ebé ha’u hein hela de’it sira nia opiniaun ne’e oinsá,” hateten Ministru Manuel Cárceres, hodi responde Agência Tatoli iha Palacio do Governu, ohin.

Nia argumenta, Ezbosu Lei ne’e  hanesan inisiativa ida para husu sosiedade sivíl, igreja no matek timoroan sira-nia hanoin ne’e oinsá. Ne’ebé, Lei ne’e seidauk aprova no Ministériu Justisa seidauk lori ba Konsellu Ministru atu aprova hodi hein, ema hotu nia hakarak ne’e saida.

“Liberdade Espresaun no Liberdade Imprensa ne’e garantidu ona iha Konstituisaun RDTL artigu 40 ho 41. Agora prinsípiu ezbosu lei kriminaliza difamasaun ne’e  mai la’ós atu kastigu ema, favor ida. Lei ne’e atu prevene ita la bele halo sala,” Ministru Manuel Cárceres aprofunda tan.

Notísia Relevante : CI Konsidera Lei Kriminaliza Difamasaun Kontra Espíritu Konstituisaun RDTL

Nia fó ezemplu ida. Se jornalista ida liu ho motor to’o iha kruzamentu (lampu merah) hateten dehan motorista la bele ultra pasa no bainhira ultra pasa maka viola ona regra estrada.  Tanba ne’e, Ministru Manuel Cárceres, lia-tun tan, Lei ne’e la’ós atu kastigu maibé prevene ema la bele halo sala.

“Halo lei ne’e mai para atu rezolve situasaun ida. Só Bíblia mak ita la bele altera. Ha’u rona opiniaun la’ós sala, maibé ha’u hein opiniaun eskrita husi ema hotu. Ita sei la halo konferénsia imprensa no ita sei la halo grandee entrevista atu responde, ha’u presiza dokumentu eskrita ida hodi responde mai atu ha’u mós bele rai hanesan dokumentu ida, katak organizasaun sosiedade sivíl sira nia hanoin no sira nia hakarak hanesan ne’e no ita konjuga hamutuk no tetu hamutuk atu bele iha desizaun ida hotu ita hotu opta,” nia hateten.

Ministru Manuel Cárceres hatutan, Lei ne’e la’ós kriminaliza hahalok no la iha lei ida mak atu kastigu ema, maibé Lei ne’e mai atu halo prevensaun.

Notísia Relevante : HAK: La Nesesáriu Kriminaliza Difamasaun

Molok ne’e, liuhusi entrevista ida ho Agência Tatoli iha Munisípiu Manatuto, foin lalais ne’e, Ministru Manuel Cárceres da Costa, aprofunda liu tan, razaun kriminaliza difamasaun ho intensaun  oinsá atu  eduka sosiedade ho  nia komportamentu.

Manuel Cárceres hatutan, ida ne’e sei la hamate liberdade espresaun, maibé ho pensamentu ida atu regula liberdade.

“Agora hanesan Timoroan, ema pinta katuas Xanana nia oin ko’alia aat iha Facebook, Ida-ne’e liberdade espresaun? hanoin ida- ne’e la’ós liberdade espresaun tanba  hakanek ema nia dignidade,” Manuel Cárceres hateten.

Manuel Cárceres hatutan, iha liberdade  atu krítika konstrutiva,  la’ós krítika destrutiva, satan tolok iha mídia sosiál.

Governante ne’e afirma, krítika la hanesan ho tolok. Kritika konstrutivu   atu ajuda  hadi’a, maibé laiha lei no deklarasaun universal no konvensaun internasionál iha artigu ida mak dehan  tolok ne’e bele, tanba ne’e lei sira ne’e iha atu regula.

Ministru Justisa Manuel Cárceres da Costa, hateten reasaun barak katak  kriminaliza difamasaun ne’e atu hamosu ditadura, maibé la’e ho pensamentu ida  atu rezolve situasaun  tanba  iha konstituisaun la permite atu tolok ema.

 Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here