Imajen Espesiál.

DILI, 09 juñu 2020 (TATOLI)—Prezidente Conselho de Imprensa (CI), Virgílio Guterres, konsidera esbosu alterasaun lei kódigu penal hodi kriminaliza difamasaun ne’ebé Governu liuhosi Ministériu Justisa prodús daudaun ona ne’e hanesan atake ba iha liberdade espresaun no mós kontra espíritu Konstituisaun Repúblika Demokrátika Timor-Leste nian.

Notísia Relevante: Governu Presiza Rona Komunidade Mídia-Sosiedade Sivíl ba Lei Kriminaliza Difamasaun

“Conselho de Imprensa mós hakarak fó hanoin katak aleinde proposta lei ne’e atake ba iha liberdade espresaun no mós kontra espíritu Konstisaun Repúblika Demokrátika Timor-Leste (RDTL) rasik. Tanba ita-nia konstitisaun iha artigu 1, hateten katak estadu Timor-Leste ne’e estadu direitu no demokrásia,” dehan Virgílio Guterres liuhosi koneferénsia imprensa iha salaun Coselho de Imprensa (CI), Mascarinhas, tersa ne’e.

Nia esplika, “direitu: katak Lei rekoñese sidadaun hotu-hotu ninia direitu no tratamentu justu ba sidadaun ne’ebé perante lei no “demokrasia” katak sidadaun hotu-hotu iha diretu no opiniaun ho meiu saida de’it ba asuntu ne’ebé relasiona ho sira-nia moris.

“Proposta lei ne’e kontra mós konstituisaun tanba ita-nia lei iha artigu 9, iha konstiuisaun RDTL hateten momoos katak orden jurídiku Timor-Leste adapta prinsípu direitu internasionál jerál. Katak, iha ne’ebá ita la’os ratifika rekoñese de’it prinsípiu konvensaun ne’ebé ita ratifika ona tuir rezolusaun Parlamentu Nasionaá ninian númeru 3/2003/22 jullu, ratifika paktu internasionál kona-ba dereitu polítiku no sivíl. Maibé, ita adapta mós prinsípiu sira ne’e hanesan orden jurídiku ida parte internál nian, katak ita bele aplika hanesan Lei ba ita-nian. Bainhira faktu sira-ne’e hetan ratifikasaun ona hosi ita-nia orgaun soberánia sira,” nia dehan.

Ho espíritu ida ne’e, nia esplika,Conselho de Imprensa nia hanoin katak tentativa ne’ebé Ministériu Justisa foti ne’e kontra Konstituisaun RDTL no mós prinsípiu intrenasionál sira ne’ebé Timor-Leste hanesan membru hosi komunidade internasionál iha obrigasaun atu kumpre no halo tuir.

Tanba ne’e, Prezidente CI mós husu ba institisaun Governu hotu-hotu bainhira iha inisiativa atu halo lei la’os dehan labele kopia refárensia hosi rai seluk. Maibé, nia dehan, se bele buka buat di’ak ne’ebé hosi rai seluk ne’e mak lori mai atu halo referénsia, labele buka mak referensia ne’ebé liu tiha ona.

“Husu ba ministeriu relevante sira kualker Lei ne’ebé implika dezenvolvimentu ba estadu demokrátiku ninian, se bele buka referénsia sira hosi rai seluk, la’os labele. Maibé, se ita bele buka buat di’ak ne’ebé hosi rai seluk ne’e mak lori mai atu halo referénsia no labele buka mak referénsia ne’ebé liu tiha ona,” nia hateten.

Tuir nia, Conselho de Imprensa ninia posizaun mak ho inisiativa sei luta ba liberdade imprensa no luta nafatin, nune’e iha Timor-Leste kona-ba lei kriminalizasaun difamasaun ne’e, labele sidadaun ida tama kadeia tanba de’it ho hanoin diferensa.

“Husu ba govenante sira atu garante buka lei ruma ne’ebé mosu atu regula no garante liberdade sidadaun ninian, atu nune’e iha Timor-leste ne’ebé indepedente, labele tan iha sidadaun ida tama kadeia tanba de’it nia hanoin diferensa. Iha preokupasaun hosi públiku mós hateten katak liberdadede espresaun no liberdade imprensa la’os liberdade atu defama ema ka trata ema,” nia dehan.

Nia hateten, Conselho de Imprensa nia posizaun no reasaun ba inisiativa ne’ebé Ministériu Justisa hala’o daudaun atu halo alterasaun ba kódiku penál Timor-Leste ninian ne’ebé foka liu atu kriminaliza difamasaun ne’ebé iha kodiku sivíl iha tiha ona.

“Conselho de impensa hanesan instuituisaun ne’ebé mosu atu promove liberdade espresaun iha responsabilidade no fundamentu forte. Tanba esbosu proposta lei ida ne’e hanesan atake ida ba liberdade espresaun ne’ebé ho razaun buka atu penaliza no kriminaliza sidadaun sira ne’ebé hato’o sira nia espresaun kritika hasoru governante sira,” Virgílio Guterres esplika.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here