Presidente Institutu Nasionál Seguransa Sosiál (INSS) Longuinhos Armando. Imajen/Tatoli Egas Cristovao

DILI, 12 juñu 2020 (TATOLI)–Prezidente Konsellu Administrasaun Institutu Nasionál Seguransa Sosiál (INSS), Longuinhos Armando Leite, informa to’o agora INSS rejistu ona funsionáriu ka traballadór tantu empreza privadu sira hamutuk 7.000-resin no tama ona tinan 2020 parese sa’e ona ba 100.000 ona.

Notísia Relevante: INSS Rejista Ona Traballadór Rihun 90

“Ita husu nafatin para empregadór sira mai rejistu ninia traballadór sira atu asegura ba futuru. Tanba ita lakohi ita-nia traballadór ida servisu hela maibé depois tinan ida laprodutiivu ona entaun moris ne’e la dignu. Iha 2020 ne’e, Funsionáriu ka traballadór tantu empreza privadu sira hamutuk 7.000-resin no tama ona tinan 2020 parese sa’e ona ba 100.000 ona,” dehan Longuinhos Armando Leite, ba ajénsia via telefónika, sesta ne’e.

Tanba,  nia hatutan, objetivu hosi Seguransa Sosiál mak atu oinsá asegura traballadór iha futuru bainhirala servisu ona, tenke iha rendimentu nafatin nune’e nia bele moris ho dignu nafatin.

Nia haktuir, INSS iha hanoin ka planu atu halo koordenasaun ho liña ministeriais hotu iha Timor-Leste hodi garante, nune’e iha empreza ida tenke rejistu ninia traballadór sira bainhira la rejista mak sei iha sansaun maibé agora seidauk implementa.

“Ita hanoin ona atu iha sansaun bainhira empreza ida mak la rejistu nia traballadór sira, sei fó sansaun empreza ne’e rasik,” nia dehan.

Notísia Relevante: Semana Rua Tan, Governu Sei Halo Pagamentu Subsídiu 60% ba Traballadór Sira

Kona-ba funsionáriu sira ne’ebé servisu iha Governu, nia esplika, automatikamente rejistu ona maibé bainhira hakarak atu konfirma Seguransa Sosiál tenke lori kartaun eleitorál tanba sira kontribui osan iha rezjime kontribuitivu.

“Maski ita seidauk iha lei fundu rezerva maibé agora iha ona maibé seidauk aprova. Osan ne’ebé ita kontribui ne’e Seguransa Sosiál mak bele jere,” Prezidente ne’e dehan.

Tuir nia, osan ne’ebé mak jere hosi seguransa sosiál hodi benefisía ona ba ema barak. Agora iha Timor-Leste ita fó ona subsídiu neen (6), primeiru maternidade, paternidade, morte,  no seluk tan.

Aleinde subsídiu, nia dehan, iha mós pensaun hanesan sobrevivente, pensaun invalidéz no velhices (idozu).

Aleinde ida ne’e, Prezidente INSS mós haktuir, dekretu-lei Númeru 47 hatete kontribui ba Seguransa Sosiál (SS) ne’e hamutuk pursentu 10, pursentu haat (4) ne’e mai hosi traballadór no pursentu neen (6) mai hosi empregadór. Bainhira fulan-fulan saláriu tama ona mak SS foti osan pursentu haat hosi traballadór no pursentu neen hosi empregadór.

“Fulan-fulan Seguransa Sosiál  foti osan pursentu 10 hosi traballadór no empregadór,” dehan Prezidente Konsellu Administrasaun INSS.

Liga ho Seguransa Sosiál, Polítika Governu nian mak hakarak husu nafatin ba empregadór sira atu rejistu ninia traballadór sira para kompañia sira tenke asegura nia traballadór sira bainhira idade reforma.

Notísia Relevante: Governu Aprova Rezolusaun Ba ANK Ho INSS

Jornalista : Osória Marques

Editór      :  Cancio Ximenes

HAKEREK NO HATÁN

Please enter your comment!
Please enter your name here