Funsionáriu Edukasaun Joventude no Desportu Baucau partisipa sosializasaun lei númeru 12/2016 de 14 de Novembru, Rejime Kontributivu Seguransa Sosiál, husi tékniku INSS iha salaun Infordepe, Baucau, dia 26/08/2019. Imajen husi pájina FacebookSeguransa Sosiál

DILI, 29 agostu 2019 (TATOLI) – Institutu Nasionál Seguransa Sosiál (INSS) iha Ministériu Solidaridade Sosiál no Inkluzaun (MSSI) rejista ona traballadór rihun 90 resin ne’ebé kontribui ba rejime kontributivu seguransa sosiál.

Kontribuisaun ne’e koa saláriu servisu na’in sira, tantu setór públiku no privadu porsentu haat kada fulan.

Prezidente INSS, Longuinhos Armando, katak hosi totál aplikanke rihun 90 resin ne’e, kompostu hosi funsionáriu públiku porsentu 67 no restu porsentu 33 hosi setór privada.

Nia informa to’o agora sei iha  instituisaun barak seidauk rejista, tanba ne’e insituisaun ne’e iha ona planu atu kontinua halo sosializasaun ba públiku.

“Ami iha planu no pedidu barak mak tama ona husi nivel ministeriál, distritál, kada diresaun husi ministériu no entidade privada balun hodi halo sosializasaun kona-ba rejime kontribuitivu seguransa sosiál”, hatete Longuinhos Armando ba TATOLI iha ninia kna’ar fatin Kaikoli, ohin.

Tuir kritéria instituisuan públiku no privada sira presiza estabelese uluk nota entendimentu (MoU) ho INSS hodi bele hetan formuláriu rejistrasaun.

“Husu ba entidade públika no privada ne’ebé seida’uk rejista atu hakbesik ba Intitutu Nasionál Seguransa Sosiál  hodi rejista”, realsa.

Setór privadu no públiku ne’ebé emprega traballadór liu ema 10, tuir lei  tenke rejistu hodi kontribui ba polítika ne’e.

Entretantu, Kada fulan traballadór ida tenke kontribui porsentu haat hosi sira ninia saláriu no Estadu aumenta porsentu neen.

Jornalista: Nelson de Sousa

Editora: Rita Almeida

HAKEREK NO HATÁN

Please enter your comment!
Please enter your name here