Presidente Institutu Nasionál Seguransa Sosiál (INSS) Longuinhos Armando. Imajen/Egas Cristovão

DILI, 11 juñu 2020 (TATOLI)–Prezidente Konsellu Administrasaun Institutu Nasionál Seguransa Sosiál (INSS), Longuinhos Armando Leite, informa INSS husu proposta orsamentu ba Governu hamutuk millaun $15 hodi fó subsídiu 60% ba traballadór sira inklui ho kompañia hamutuk 766, maibé INSS halo verifikasaun hetan de’it ema na’in-340 mak prenxe kritéria.

Nia hatutan, INSS halo fali tan verifikasaun ba osan millaun $15 ne’e, to’o presiza de’it osan millaun $11 atu selu ba traballadór sira. Tuir planu, nia dehan, pagamentu subsídiu 60% ba traballadór sira ne’e, sei hala’o iha semana rua oin mai, tanba INSS hatama ona proposta ba Governu.

Notísia Relevante: Kondutór Transporte Públiku 6000-Resin Sei Hetan Subsidiu hosi Governu 

“Pagamentu pursentu 60 (60%) ba traballadór sira, ha’u rona informasaun katak Governu hanoin ona. Ne’ebé, ita husu Na’in Maromak para semana rua mai ne’e, bele halo pagamentu ba traballadór sira. Ita hatama ona proposta ba ita-nia Governu,” dehan Longuinhos Armando Leite ba Agência TATOLI liuhosi telefónika, kinta ne’e.

Tuir planu, nia dehan, osan hirak ne’ebé traballadór sira atu simu sei transfere ba Ministériu Finansa ho faze rua mak hanesan faze dahuluk transfere uluk $6.000 no faze daruak mak kompleta ho $5.000.

Nia hateten, prosesu pagamentu ba traballadór taxista no empreza privadu sira ne’e, sei halo transferénsia osan direta ba benefisiáriu sira-nia konta bankária tanba sira hatama ona sira-nia konta bankária no mós ho kritéria sira seluk tan.

“Bainhira halo pagamentu, ita transfere osan direta ba traballadór ka empreza privadu sira-nia konta bankária de’it,” nia hateten.

Governu hakarak tulun nia povu hodi fó subsídiu 60% ba traballadór sira ne’e, nia esplika, tanba iha situasaun pandemia COVID-19 no Estadu Emerjénsia ne’e traballadór barak mak empreza sira hapara sira-nia servisu no kua sira-nia saláriu.

“Ho ida-ne’e mak Governu prontu ajuda traballadór sira iha buat rua. Primeiru Governu ajuda pursentu 60 (60%) ba traballadór no segundu Governu mós ajuda liuhosi Seguransa Sosiál ba traballadór sira atu estende lai 6% ne’ebé durante ne’e kompañia hatama fulan-fulan iha seguransa sosiál,” dehan Prezidente Konsellu Administrasaun INSS ne’e.

Nia dehan, ba kompañia ne’ebé mak iha kbiit la presiza husu pedidu no ba kompañia ne’ebé mak atu hetan pursentu hosi Governu ne’e tenke komprende ida ne’ebé mak rejistu ona iha seguransa sosiál.

Notísia Relevante: Salariu $500 Bele Simu Subsídiu Tanba Hakerek Nanis Ona iha Dekretu-Lei

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here