Primeiru-Ministru, Taur Matan Ruak, lidera enkontru Konsellu Ministru, kuarta, (21/9). Imajen António Goncalves

DILI, (TATOLI) – Governu liuhosi enkontru Konsellu Ministru, ohin aprova rezolusaun rua hodi halo nomeasaun ba membru Konsellu Administrativa Autoridade Nasionál Komunikasaun (ANK) nomos membru Konsellu Administrasaun Institutu Nasionál Seguransa Sosiál (INSS).

Governu hili João Olivio Freitas, nu’udar Prezidente Konsellu Administrasaun Autoridade Nasionál Komunikasaun, Diretóra Finansa, Jorgina da Silva Garcia, enkuantu Diretór Ezekutivu sei hili iha semana oin.

Longuinhos Armando Leite maka asume kna’ar nu’udar Prezidente Konsellu Administrasaun Institutu Nasionál Seguransa Sosiál, Vogais hanesan Cornelio Barros no Givedo Marçal, Alberto Araújo representa empregadór no Ramalho da Costa representa traballadór.

“Ohin konsellu ministru halo desizaun ona no halo jestaun fundu iha OJE 2018 no OJE tinan tinan ba asisténsia sosiál“, dehan Ministru Presidensia Konsellu Ministru, Agio Pereira, ba jornalista sira iha Palásiu Governu, ohin.

Ministériu Transporte Komunikasaun (MTK) no Ministériu Solidaridade Sosiál no Inkluzaun (MSS) maka apresenta rezolusaun rua ne’e.

Konsellu administrasaun rua ne’e sei jere instituisaun tuir mandatu Governu nian.

Ministru Transporte no Komunikasaun, José Agostinho da Silva, hateten nomeasaun ne’e hodi jere autoridade nasionál komunikasaun ba periodu tinan lima.

“Ita espera sira sei hala’o sira responsabilidade ho rigorozu hodi rekolla reseita ba kofre Estadu”, afirma.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here