Diretór Asosiasaun HAK, Manuel Monteiro

DILI, 08 juñu 2020 (TATOLI) – Diretór Asosiasaun HAK, Manuel Monteiro, afirma Timor-Leste hanesan nasaun estadu direitu demokrátiku la nesesáriu atu kriminaliza difamasaun.

Manuel Monteiro hato’o lia hirak ne’e relasiona  ho esforsu oitavu governu nian, liuhusi Ministériu Justisa (MJ) ne’ebé  hahú prodús  ezbosu alterasaun kódigu penal kona-ba atu kriminaliza difamasaun.

Manuel Monteiro, hateten difamasaun ne’e kazu sivíl, tanba ne’e, se mak sente afetadu husi ema ruma nia privasidade bele prosesa ba parte justisa, la’ós kria fali lei hodi kriminaliza.

Ba Agência Tatoli via telefónika, ohin, Manuel Monteiro, afirma, Timor-Leste hanesan estadu direitu demokrátiku, tane-as prinsípiu demokrasia no lei garante  ema hotu iha  liberdade fó nia hanoin hanesan haktuir iha artigu 40 ho 41 (liberdade espresaun ho liberdade imprensa), inklui retifika konvensaun internasionál lubun kona-ba direitu fundamentu no liberdade ema nian.

Nia hatutan, kuandu kriminaliza difamasaun maka ema nia hanoin liberdade atu hato’o buat ruma bele limita, embora kritika ho étika no moral la’ós insulta ema nia privasidade.

Manuel Monteiro, hatutan, kuandu altera lei iha kódigu penal hodi kriminaliza difamasaun, vantajen ba sosiedade mak sei hata’uk sidadaun atu hato’o nia hanoin ligadu atu labele iha kritika ba desizaun ukun nain sira nian no dezvantajen mak sei proteje ukun nain sira duke próteze povu.

“Dala barak ita preokupa ema tolok arbiru, insulta ema nia privasidade arbiru iha media sosiál, maibé ida ne’e la’ós rezolve husi dalan halo Lei Kriminaliza Difamasaun, maibé halo lei cyber netiku,” esplika Manuel Monteiro.

Jornalista Agência Tatoli rasik, segunda dadeer ne’e, tenta halo konfirmasaun ho Ministru Justisa, Manuel Cárceres, maibé nia parte seidauk bele fó komentáriu, tanba elaborasaun ba ezbosu alterasaun kódigu penal kona-ba kriminaliza difamasaun ne’e  sei iha faze ezbosu no presiza atu halo lai audiénsia públiku .

Jornalista : Nelson de Sousa

Editór       : Francisco Simões

 

1 KOMENTÁRIU

  1. Hanesan Ativista Foin Sa’e, sujere atu halo Analiza didiak Relasiona ho estadu De Direitu no Demokratiku. Tamba Ita Nia Nasaun Determina husi Povu. Tamba ne’e Nain ba Estadu maka Povu. No Reprezentasaun tenke konvoka Uluk Audensia Povo Nia hanoin Kona ba Kodigo nebe sei Hela esbosu.

HAKEREK NO HATÁN

Please enter your comment!
Please enter your name here