Imajen/Espesiál

DILI, 02 juñu 2020 (TATOLI)-Tuir relatóriu husi Ministériu Saúde iha tinan 2019 halo ona peskiza global tabaku ho tulun husi Organizasaun Mundiál Saúde (OMS) iha Timor-Leste, ne’ebé rejista fumadór Timoroan ho idade 13-15 ninia pursentajen tuun ona ba 30 (%) kompara ho dadus iha tinan 2013 hamutuk pursentu 42.

Durante komemorasaun loron mundiál tabaku segunda ne’e, Ministériu Saúde no OMS ninia esperansa sei hafanun konsensia Timoroan liliu joven sira atu para fuma tabaku hodi prevene moras la hada’et sira hanesan kankru, kurasaun, respiratóriu respiratoriu hamenus fertilidade no sai perigu boot ba inan isin-rua no bebé sira.

Notísia Relevante :Kada Tinan, Fumadór Sira Mate 600.000

“Iha tinan 2019 ne’e hatudu katak labarik idade 13-15 ne’ebé mak fuma iha 30% kompara ho 2013 iha 42% nune’e iha redusaun katak kuaze 12%, ida ne’e progresu ida ne’ebé mak di’ak tebes,” relata Reprezentante Diretóra Jerál Prestasaun Saúde, Ministériu Saúde, Celia Gusmão durante komemorasaun loron mundiál tabaku ne’ebé maka hala’o iha Otél Turizmu, Lecidere, tersa ohin.

“Tuir estimasaun Timor-Leste hatudu katak moras króniku la hada’et mak responsavel ba 44 % husi kauza mate sira hotu iha Timor-Leste no peskiza ba fatores sira husi moras la hada’et iha tinan 2014 hatudu katak Timoroan adultu mane 70% no ema na’in sia ka na’in 10 mak horon sigaru suar iha sira nia uma laran,”tenik tan.

Notísia Relevante :Loron Mundiál Sein Tabaku 2020: Hatene Ona Tabaku Nia Segredu Foer

Iha fatin hanesan Diretora Nasionál Kontrolu Moras, Josefina Clarinha João, reforsa loron mundiál saúde ne’ebé maka mundu tomak komemora iha loron 31 fulan-maiu kada tinan ne’e bolu atensaun ba Timoroan hotu atu luta kontra hasoru tabaku tanba akontese iha mundu kada tinan ema tokon neen maka mate tanba impaktu husi fuma sigaru.

Notísia Relevante :Tabaku Risku Liu Ba Kankru Pulmaun

Timoroan ne’ebé uza tabaku timor, tabaku importadu no eletróniku to’o tinan 2019 tuun ona ba pursentu 30%, kompara ho dadus 2013 nian hamutuk pursentu 42.

No fumadór tabaku iha tinan 2019 hamutuk pursentu 22, kompara dadus 2013 hamutuk 35(%). Fumadór uza tabaku laiha suár iha tinan 2019 hamutuk pursentu 13, no dadus 2013 iha pursentu 8. Nune’e mós dadus Ministériu Saúde iha tinan 2014, fumadór adultu ho pursentu 70.

“Fumadór tabaku atuál ne’ebé koko para fuma sigaru iha fulan-12 liubá totál hamutuk 66%, Mane 65% feto 71%,” nia relata.

Tanba ne’e, tuir nia katak Ministériu Saúde, Parseiru Dezenvolvimentu hanesan Organizasaun Mundiál Saúde, no Mídia iha papel importante atu luta kombate tabaku hodi nune’e bele redúz pursentajen ema fuma to’o pursentu 10 husi total populasaun Timor-Leste milaun 1.2-resin.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here