Xefe Saúde PNTL, Marcelina Ximenes (lima loos), Diretór Nasionál ba Gabinete Polítika no Kooperasaun, Ministériu Saúde, Reprezentante OMS iha Timor-Leste, Rajesh Pandav (klaran), Sekretáriu Estadu Juventude no Desportu, Nélio Isaac Sarmento, hasai foto hamutuk iha selebrasaun loron mundiál ho tema “Promove Pulmaun Saudavel”. Imajen Egas Cristovão

DILI, 31 maiu 2019 (TATOLI) – Ministériu Saúde (MS) ho ninia parseiru sira, ohin komemora loron mundiál ba tabaku. Hosi selebrasaun ne’e fó hanoin ba públiku katak, hosi tabaku nia suar fó risku ba kankru pulmaun.

Reprezentante OMS iha Timor-Leste, Rajesh Pandav. Imajen Egas Cristovão

“Fuma tabaku kauza moras ne’ebé fó ameasa ba moris hanesan kankru, moras respiratóriu, kankru ibun no ezófagu (kakorok talin)”, reprezentante Organizasaun Mundiál ba Saúde (OMS), Rajesh Pandav, durante selebrasaun ne’ebé hala’o iha Sekretaria Estadu Juventude no Desportu, ohin.

Pandav hatutan: “Tabaku mós hamenus fertilidade, hamate ema kada segundu haat hosi ema milliaun 56.9 ne’ebé mate tinan-tinan, iha milliaun ualu mate tanba kauza husi tabaku. Mate milliaun ida tanba fuma pasivu”.

Nia akresenta moras respiratóriu relasiona ho tabaku maka responsavel ba sofrimentu ne’ebé kauza mate barak, moras no efeitu debilidade (halo fraku) iha kualidade moris ba ema hotu iha idade saida de’it iha mundu, tanba ne’e pulmaun iha papél importante ba ema hotu nia saúde no moris di’ak.

Reprezentante WHO ne’e esplika fuma pasivu, suar ne’ebé mai husi sunu sigarru ka husi produtu tabaku seluk, baibain kombinasaun ho suar ne’ebé fumadór sira husik sai, maka fatór risku boot ba kankru pulmaun, no moras pulmonár obstrutiva krónika (chronic obstructive pulmonary disease), tuberkuloze (TB) no azma.

Pandav hatutan tan tabaku nia suar mós kontribui ba poluisaun ár iha uma laran, ne’ebé maka sai ameasa boot ba saúde pulmaun nian.

Bebé, labarik, adolexente no adultu sira ne’ebé sofre husi fuma pasivu iha tendénsia atu sofre husi kreximentu no funsaun pulmaun ne’ebé la di’ak. Pulmaun kontinua dezenvolve ho di’ak to’o idade adultu, maibé bainhira dada iis venenu ne’ebé mai husi tabaku nia suar sei hamenus prosesu ida ne’e no iha potensialidade atu kauza estragu ba pulmaun, realsa tan.

Tuir faktu katak ema Timor oan mak entre ema fumadór aas liu iha mundu mane porsentu 71 no feto porsentu 29.

Katak tan, ne’e hatudu dezafiu grave kauza husi fuma tabaku. Ida ne’e aumenta tan ho faktu katak adultu na’in sia husi na’in  10 maka fuma pasivu, tanba suar iha uma. Moras la kontajioza inklui moras kardiovaskulár (moras fuan) no pulmonár obstrutiva krónika mak tama iha kauza prinsipál ba taxa mortalidade. Timor-Leste mós entre nasaun sira ne’ebé iha moras TB aas liu.

Fuma ho hemu tua, nia subliña aumenta risku ba moras no mate kuaze dobru. Fuma sigarru no abuzu alkol fó ameasa dezenvolvimentu Nasaun hodi impoin todan makaas ba saúde, sosiál no ekonómiku.

Hemu tua barak kauza moras no kanek, kondisaun kanek, notavel liu mak dependénsia ba tua, problema mentál no hahalok, moras aten (liver cirrhosis), kankru no kanek.

Ida mós relasaun kauza ne’ebé eziste entre konsume tua no insidénsia husi moras infesiozu hanesan tuberkuloze no HIV/AIDS.

“Mate no moras tanba tua mak sai kauza prinsipál ba ki’ak, halo uma-kain laiha ema ne’ebé servisu, halo rekursu uma-kain ne’ebé limitadu hodi sosa produtu tabaku no tua duké sosa ai-han no materiál eskola, no obriga ema barak atu selu ba despeza médiku”, katak.

Timor-Leste halo ona progresu ne’ebé di’ak hodi kombate epidemia tabaku. Iha 2016, lejizlasaun rigorozu ba anti-tabaku pasa ona. Lei ne’e bandu halo publisidade no promosaun tabaku; bandu fuma iha fatin públiku, eventu públiku, eskritóriu, fatin enkontru no iha transporte públiku nia laran hanesan taxi no mikrolete.

Lei foun ne’e mós bandu fa’an produtu tabaku ba labarik ho idade menus husi 16. Agora daudaun, Timor-Leste iha fatin primeiru iha mundu, tanba implementa ona avizu gráfiku boot liu kona-ba saúde iha embalajen sigarru.

Maske nune’e, tenke aselera liután asaun ne’ebé presiza ba implementasaun lejizlasaun anti tabaku. Polítika no lejizlasaun kontrolu alkol ne’ebé rigorozu hodi responde ba epidemia ne’e.

Responde ba abuzu alkol no fuma tabaku presiza asaun koletiva no kompromisu ema ida-idak nian.

Peskiza Globál Tabaku ba Foin sa’e (The Global Youth Tobacco Survey) tinan 2013 hatudu prevalénsia tabaku aas liu husi porsentu 42 entre adolexente idade 13-15.

Estudante na’in rua husi na’in tolu maka sofre husi fuma pasivu iha uma. Labarik besik porsentu 70 idade 13 to’o 15 mak kona sigarru suar iha fatin públiku. Foin sa’e sira fasil atu asesu ba sigarru. Kuaze fumadór porsentu 83 idade 13 – 15 sosa sigarru husi loja, kioske no vendedór iha estrada.

Iha Timor-Leste idade médiu hahú fuma loron-loron maka tinan 16, aumenta risku ba moras iha foin sa’e sira.

Peskiza Saúde Globál Bazeia ba Estudante Eskola tinan 2015 hatudu estudante porsentu 27.6 – 39.6 no feto porsentu 15.6 ho idade 13 to’o 17 ne’ebé maka iha tinan dahuluk ba siklu dahuluk to’o siklu datoluk uza ona produtu tabaku. Kuaze metade husi estudante porsentu 45.2  koko fuma sigarru antes kompleta tinan 14.

Timor-Leste agora daudaun enfrenta problema boot rua: fuma no hemu tua. Abuzu alkol alarmante tebes.

Peskiza Nasionál ba Fatór Risku no Kanek ba Moras La Hada’et tinan 2014 hatudu prevalénsia aas porsentu 17.4 husi konsume tua porsentu 30.

Porsentu 42 ba mane no porsentu rua ba feto. Mane adultu na’in haat husi na’in lima maka atualmente hemudór.

Peskiza Saúde Globál ba Estudante Bazeia ba Eskola (The Global School-Based Student Health Survey) tinan 2015 deskobre idade hemu tua iha Timor-Leste.

Porsentu 15.7 husi ida ne’e mak atualmente hemudór mane porsentu 21.5 no feto porsentu 9.3. Porsentu 59.7 husi estudante hirak ne’e mak tuir relatóriu hemu tua antes kompleta idade 14.

Selebrasaun tinan ne’e MS ho ninia parseiru hanesan OMS, Sosiedade Sivíl, reprezentante Komandu Polísia Nasionál Timór-Leste (PNTL) komemora ho marsa.

Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here