Dr Rajesh Pandav, Reprezentante OMS ba Timor-Leste.

Hosi :

Dr Rajesh Pandav

Reprezentante OMS ba Timor-Leste

Tinan-tinan, iha loron 31 Maiu, Organizasaun Mundiál ba Saúde (OMS) no parseiru globál hotu selebra Loron Mundiál Sein Tabaku (Sigla Inglés: World No Tobacco Day) hodi bolu atensaun hosi mundu tomak kona-ba epidemia tabaku nian. Tinan ida ne’e Loron Mundiál Sein Tabaku mai ho objetivu atu proteje labarik no adolexente sira hodi manipulasaun industria no prevene uzu tabaku no nikotina entre sira liuhosi estratejia fo’er fó servisu ba adolexente sira iha industria tabaku hodi promove tabaku nia produdu liu-liu iha adolexente sira-nia leet.

Produtu tabaku ne’e hamate ema liu hosi milliaun 8 kada tinan. Tabaku no industria relasionadu sira tenki kontinua buka konsumidór foun hodi troka fali ho sira ne’ebé mate ona tanba kauza hosi sira-nia produtu, atu nune’e sira mantein sira-nia rendimentu.

Kompañia tabaku gasta osan liuhosi billiaun 8 iha marketing no publisidade no mundu mós lakon ema milliaun 8 nia moris tanba kauza relasiona ho uzu tabaku no fuma pasivu.

Utiliza tabaku ne’e fó dezafiu grave iha Timor-Leste. Timor oan sira tama iha kategoria ema ne’ebé uzu tabaku aas iha mundu. Entre ema adultu sira, iha mane 71% no feto 29% mak uza tabaku iha kualkér forma – fuma (e.z. sigarru) no/ka la fuma (e.zsongketabaku). Iha adultu nain 9 hosi nain 10 mak sofre hosi fuma pasivu iha uma. Moras La Hada’et inklui moras kardiovaskular, no moras obstrutiva pulmonáriu kroníku (sigla inglés: chronic obstructive pulmonary disease (COPD) mak entre kauza principal sanulu ba mortalidade. Timor-Leste mós tama iha lista nasaun ho todan maka’as ba moras TB.

Peskiza Global kona-ba Tabaku iha Foinsa’e sira 2019 (sigla inglés: Global Youth Tobacco Survey) ne’ebé hala’o entre labarik eskola oan ho idade hosi 13 – 15, hatudu katak total prevalénsia ba uzu tabaku aas tebes entre adolexentesira ho 30.9%, hosi total ne’e iha 42% ba foinsa’e mane no 21% ba foinsa’e feto sira. Iha estudante 67% mak sofre hosi fuma pasivu iha uma. Kuaze 71% mak sofre hosi fuma pasivu iha fatin públiku. Foinsa’e sira iha asesu fasil ba sigarru. Maizumenus fumadór 63% sosa sigarru hosi supermerkadu, loja, vendedór ambulante, ka kios. Maske sira ho menoridade tuir dadus iha 49.2% la hetan prevensaun bainhira sosa sigarru.

Peskiza Global kona-ba Tabaku iha Foinsa’e sira 2019 (sigla inglés: Global Youth Tobacco Survey) hatudu mós indikasaun ne’ebé enkoraja tebes. Prevalénsia total hosi uzu produtu tabaku ne’e tun hosi 42.2% iha 2013 ba 30.9% iha 2019, no prevalénsia total hosi fumadór atuál mós tun hosi 35% iha 2013 ba 22.5% iha 2019. Liután, persentajen estudante ne’ebé relata katak sira nota publisidade kona-ba tabaku nian iha fatin faan sigarru tun kuaze hosi 80% iha 2013 ba 60% iha 2019. Sira ne’e hotu, estudante liuhosi nain 7 entre nain 10 ne’ebé fuma sigarru, relata katak sira iha intensaun atu para hosi fuma. Enkuantu estudante nain 7 hosi nain 10 mak koko atu para hosi fuma iha fulan 12 kotuk liubá.

Timor-Leste liu ona progresu ida ne’ebé merese ita hotu atu louva iha luta hasoru epidemia tabaku. Iha 2016, lei anti-tabaku ne’ebé rigorozu pasa ona. Iha lei ne’e bandu atu halo promosaun no publisidade kona-ba tabaku; bandu fuma iha fatin públiku, iha eventu halibur ema lubun boot, eskritóriu, fatin enkontru no iha transporte públiku nia laran hanesan taxi no mikrolet. Lei foun ne’e mós bandu atu faan produtu tabaku ba labarik ho idade menus hosi 16. Agora daudaun, Timor-Leste okupa primeiru lugar iha mundu tanba implementa gráfiku boot liu kona-ba avizu saúde nian iha sigaru masu nia-lolon.

Maibé, atu aselera liután asaun ida ne’e presiza ba implementasaun lei anti-tabaku. Ida ne’e inklui bandu faan tabaku ba labarik idade menor no fó suporta ho diagnóstiku, akonsellamentu, para hosi fuma, no tratamentu dependénsia ba tabaku. Ida ne’e importante hodi proteje adolexente sira hodi uzu tabaku liuhosi hasa’e konxiensia kona-ba efeitu perigu ne’ebé kauza no asegura atu sira la monu ba lasu sira no tátika sira relasiona ho industria tabaku liuhosi tau iha produtu tabaku no nikotina.

Timor-Leste mós iha populasaun joven liu iha rejiaun Ázia-Pasifiku nia laran. Totál populasaun 74% mak iha idade menus hosi 35, ida ne’e indika katak maioria fumadór sira tama iha kategoria idade refere. Emporeda no hasa’e foinsa’e sira-nia kapasidade ho abilidade atu kontra kompañia tabaku ne’ebé forte no sira-nia produtu maka estratejia investimentu ba saúde no dezenvolvimentu Nasaun nian. Prevalénsia fumadór ne’ebé aas, adultu no adolexente sira ne’ebé ezije apoiu hodi para hosi fuma. Servisu apoiu para hosi fuma ne’ebé apropriadu maka komponente esensiál ida iha estratejia kontrolu tabaku ne’ebé kompreensivu. Nikotina iha natureza visiante (ka halo ema hakarak fuma beibeik) no ida ne’e difikulta ema atu para hosi fuma sein hetan asisténsia ruma.

Foinsa’e sira tenki hamutuk kontra tátiku agresivu no manipulasaun hodi industria tabaku no industria sira seluk, ne’ebé inklui:

  • Uza sabór liuhosi 15,000, ne’ebé maka halo labarik no adolexente sira iha interese makaas.
  • Promosaun produtu tabaku no distribuisaun produtu gratuita iha eventu popular ba foinsa’e sira.
  • Importante tebes atu hanoin katak:
    • E-cigarette aumenta risku ba moras fuan no moras pulmaun. Nikotina iha e-cigarette ne’e aditivulos no bele muda labarik sira-nia dezenvolvimentu kakutak.
    • Fuma shisha ne’eperigozu mós hanesan fuma tabaku sira seluk.
    • Fuma tabaku laiha suar (e.z. songke tabaku) ne’e mós perigu hotu ba saúde.

OMS apela ba foinsa’e sira atu hamutuk hodi sai jerasaun ida ne’ebé livre hosi tabaku Uzu tabaku ne’e responsavel ba mortalidade kankru mate iha mundu ho pursentu 25%. Uzu produtu tabaku no nikotina aumenta risku ba moras kankru, kardiovaskular no moras pulmonáriu. Tinan-tinan ema liuhosi milliaun1 mate tanba fuma pasivu.

Uzu tabaku mós kontribui ba kiak – uma kain vulneravel sira dezvia sira-nia gastu hosi nesesidade báziku, hanesan ai-han, edukasaun, no saúde, ba tabaku. Nasaun no individual sira mós lakon ekonomia boot hosi produtividade tanba moras kauza hosi tabaku no mate sedu (e.z. ema ne’ebé fornese nesesidade uma-laran nian), no kustu aas hodi jere morbidade relasiona ho tabaku. Liután, estudu hatudu ona katak fumadór sira iha risku aas liu atu hetan moras grave no mate tanba COVID-19.

Ita bele halakon epidemia tabaku ne’e bainhira komunidade hotu hamutuk ho aselera esforsu hodi kombate kontra tabaku. Família no komunidade sira tenke fó hanoin beibeik ba foinsa’e sira kona-ba tabaku nia efeitu perigu. Governu tenke haforsa implementasaun lei tabaku nian liuhosi kolaborasaun inter-setorál.

Apoiu hosi komunidade ne’e importante tebes atu bele susesu iha implementasaun lei tabaku ne’ebé rigorozu. Foinsa’e tenke alerta nafatin no labele monu ba tentasaun ne’ebé fornese hosi marketing produtu tabaku nian. Profisionál saúde sira tenke utilize sira-nia influensia liuliu ho foinsa’e, labarik no adolexente sira liuhosi fó hanoin ba sira kona-ba efeitu perigozu hosi tabaku. Ministériu Saúde presiza fó apoiu ho diagnóstiku, akonsellamentu, apoiu hodi para fuma, no tratamentu dependénsia tabaku nian. (*)

HAKEREK NO HATÁN

Please enter your comment!
Please enter your name here