Imajen Espesiál.

DILI, 02 juñu 2020 (TATOLI)–Jestór Aliansa Nasionál Kontrollu Tabaku Timor-Leste (ANCT-TL), Sancho Fernandes, heteten tuir dadus Organizasaun Mundiál Saúde relata katak fuma tabaku no tabaku mak kauza fatór risku prinsipál ba moras lahada’et sira ne’ebé rezulta fumadór sira mate kada tinan 600.000.

Notísia Relevante: Loron Mundiál Sein Tabaku 2020: Hatene Ona Tabaku Nia Segredu Foer

Sancho Fernandes. Imajen Espesiál.

“Tuir dadus Organizsaun Mundiál Saúde (OMS) nian, kada tinan tabaku oho ema fumadór sira hamutuk 600.000 liuhosi moras hanesan kankru, diabetes, ingesaun vias respiratória kroniku, abortu, no moras kardiaku (atakasaun fuan),” dehan Jestór Aliansa Nasionál Kontrollu Tabaku Timor-Leste (ANCT-TL), Sancho Fernandes, ba jornalista sira liuhosi konferénsia imprensa iha salaun FONGTIL, Caicoli, Dili, tersa ne’e.

Bazeia ba evidénsia sira iha leten ne’e, nia husu Governu se bele ezekuta kampañia iha mídia liuhusi televizaun, rádiu no mídia sosiál hodi habelar mensajen ba fumadór sira sei hasa’e risku komplikasaun ba COVID-19 no fumantes sira tenke ‘para agora’.

“Para fuma tabaku bele ajuda diminui risku hosi sintoma COVID-19 ne’ebé króniku, redúz risku transmisaun no suporta haforsa sistema imunidade,” nia dehan.

Nia hatutan, atu garante rekursu ne’ebé mak adekuadu hodi suporta programa para fuma tenke sensibiliza liuhosi mensajen hosi mobile, apoiu internete no seluk tan. Programa hirak ne’e, nesesita operasaun ne’ebé sufisíente hodi responde ba probabilidade aumentu vontade nesesidade hapara uza tabaku iha públiku.

Asaun ne’e, nia dehan, reforsa implementasaun lei kontrola tabaku artigu 5, hanesan 100% fatin públiku livre hosi tabaku, fatin servisu, no transporte públiku. Envairomentu ne’ebé livre hosi tabaku sai hanesan meiu ne’ebé provadu hodi proteje ema sira ne’ebé kona sigaru suar (fumadór pasivu) ne’ebé ligadu ho respiratóriu no kondisaun atakasaun fuan no hasa’e vulnerabilidade ba sintomas COVID-19 ne’ebé króniku no mate.

“Implementa no aplika integralmente medida sira hosi FCTC no WHO nia pakote MPOWER, inklui hasa’e taxa no presu ba produtu tabaku, nu’udar maneira ne’ebé efektivu liu hodi redúz utilizasaun tabaku no hasae rendimentu estadu, reseitas, bele jere hodi implementa programa kontrolu tabaku,” nia esplika.

Notísia Relevante: Deputadu Sira Husu Governu Kria Konsellu Nasionál Kontrolu Tabaku

Nia dehan, tenke hametin Dekretu lei nú. 14/2016 (lei tabaku) Proíbisaun doasaun no parséria hosi indústria tabaku hodi implementa no aplika WHO’s FCTC artigu 5.3. Governnu tenke rejeita siência-pseudo finansia hosi industria tabaku no nia aliadu sira no komersializa tabaku durante pandemia COVID-19.

“Ida ne’e, tenke reforsa implementasaun lei tabaku artigu 17 no Artigu 15 kona-ba proibidu faan tabaku ba minoridade 17 mai kraik no proibidu faan sigaru rahun,” nia esplika.

Nia hatutan, surtu COVID-19 fó reflesaun no oportunidade ba ita atu hapara uza produtu tabaku hodi minimiza risku no prevene hosi moras no mate ne’ebé kauza hosi tabaku.

Imajen Espesiál.

“Pandemia COVID-19 hatudu ona mai ita katak saúde esensiál ba ema ida-idak. Tanba ne’e, sujere ba ema hotu, surtu COVID-19 fó reflesaun no oportunidade ba ita atu hapara uza produtu tabaku hodi minimiza risku no prevene hosi moras ne’ebé mak mate kauza hosi tabaku,” nia adianta.

Nia dehan, foinsa’e barak hahú uza tabaku, ne’e fó sinál ida ladi’ak ba saúde públiku iha futuru tanba opurtunidade atu hetan moras, mate no aleijaun bele ezisti nafatin ho ema.

Situasaun ne’e, tuir nia, husu responsabilidade ba ema ida-idak atu proteje foinsa’e sira hosi uza produtu tabaku tanba lei tabaku artigu 17 họ 15 fó kompeténsia ba ema atu labele faan sigaru ba minoridade no faan rahun.

“Lei tabaku proividu atu ema fuma iha fatin públiku, transporte públiku. N’e katak ema hotu iha obrigasaun atu labele fuma iha fatin públiku sira no transporte públiku hodi proteje ema sira ne’ebé la fuma. Lei tabaku artigu 8 mós fó kompeténsia ba públiku atu halo keixa ba entidade relevante sira bainhira hetan violasaun ruma,” nia hateten.

Notísia Relevante: Hahú Hosi Novembru Tabaku La Fa’an Iha Timor

Jornalista : Osória Marques

Editór     : Cancio Ximenes

HAKEREK NO HATÁN

Please enter your comment!
Please enter your name here