Ministru Ensinu Superiór, Siénsia no Kultura, Longuinhos dos Santos. Imajen/Egas Cristovão

DILI, 08 maiu 2020 (TATOLI)-Governu liuhosi Ministériu Ensinu Superiór Siénsia no Kultura (MESSK) kansela ona planu atu oferese kreditu ba dosente sira durante implementasaun estadu emerjénsia.

Ministru Ensinu Superiór Siénsia no Kultura, Longuinhos dos Santos, hateten maski MInistru sira iha reuniaun konsellu ministru iha loron 22 fulan-abríl 2020 liubá, aprova ona proposta Klibur Instituisaun Ensinu Superiór Privadu Timor-Leste (KIESP-TL) nian atu oferese kreditu ba dosente sira maibé kansela tanba Banku Sentrál la apoiu desizaun ne’e.

Notísia Relevante :Governu Diskute Ona Proposta KIESP-TL

“Ha’u hasoru malu ona ho Governadór Banku Sentrál nian maibé iha tempu agora ne’e defisil atu asesu ba kreditu, posiblidade kreditu ne’e bele prepara ba futuru,” informa Governante ba Jornalista sira iha Edifísiu Ministériu Finansa, Ai-Tarak-Laran Dili, sesta ohin.

Maski nune’e, Governu orienta dosente sira atu rejistu iha Ministériu Solidaridade Sosiál no Inkluzaun (MSSI) hodi asesu subsídiu porsentu 70 husi seguransa sosiál nian.

Notísia Relevante :Governu Aprova Kreditu ba Dosente

Atu esklarese desizaun ne’e ba KIESP-TL, Governate ne’e hateten, sei konvoka enkontru ida ho Reitór universidade sira hodi esplika kestaun ne’e iha tempu badak.

Husi sorin seluk, Reitór Universidade da Paz (UNPAZ) Adolmando Amaral, hateten nia parte aprezenta ona dadus husi dosente no funsionáriu universidade nian ba MSSI atu bele asesu subsídiu iha seguransa sosiál.

Notísia Relevante :Universidade Privada Husu Subsídiu ba Governu

“Ami hein rona de’it informasaun husi sira kona ba rejultadu husi verifikasaun ba dokumentu ne’ebé mak ami hatama ona iha MSS,”katak Adolmando, ba TATOLI, via telefone ohin.

Jornalista : Tomé Amado

Editór      : Agapito dos Santos

HAKEREK NO HATÁN

Please enter your comment!
Please enter your name here