Ministru Ensinu Superiór, Siénsia no Kultura, Longuinhos dos Santos. Imajen/TATOLI Egas Cristovao

DILI, 22 abríl 2020 (TATOLI)-Governu liuhosi Ministériu Ensinu Superiór Siénsia no Kultura (MESSK) daudaun ne’e diskute ona proposta husi Klibur Instituisaun Ensinu Superiór Privadu Timor-Leste ne’ebé husu apoiu subsidíu orsamentu hodi selu dosente.

MESSK Longuinhos dos Santos hateten asuntu ne’e diskute ona ho Ministru Koordenadór ba Asuntu Ekonómiku (MKAE) Fidelis Magalhães maibé parte rua haree liu atu oinsá oferese kreditu ba dosente sira.

Notísia Relevante :Universidade Privada Husu Subsídiu ba Governu

“Ita halo ona diskusaun entre parte rua bazeia ba proposta ne’ebé mak KIESP-Timor Leste aprezenta mai ita, proposta ne’e iha hela prosesu diskusaun nia laran kuandu iha ona rejultadu mak ita sei públika,” informa nia ba Jornalista Sira hafoin ramata reuniaun Konsellu Ministru, iha Edifísiu Ministériu Finansa, Ai-Tarak-Laran, kuarta (22/04/2020).

Governante ne’e esplika tuir proposta KIESP-TL nian ne’ebé governu simu ona foka ba asuntu rua, ida maka subsídiu no kreditu. 

Maibé, Govenru prefere liu oferese kreditu ba dosente sira depois devolve fila-fali.

Notísia Relevante :UNPAZ Laiha Osan Selu Dosente

“Ha’u seidauk bele garante bainhira mak diskusaun ne’e bele hetan ninia rejultadu tanba parte rua sei diskute hela kuandu iha ona desizaun ha’u sei informa fali,” tenik tan.

Tuir proposta KIESP-TL antes ne’e haruka ba Governu ho montante orsamentu $ 2, 473,744.50 hodi suporta universidade sanulu maka hanesan IOB, DIT, IPDC, ISC, INPAZ, UNDIL, UNITAL, ETCI no ICFP.

Jornalista : Tomé Amado

Editór      : Agapito dos Santos

HAKEREK NO HATÁN

Please enter your comment!
Please enter your name here