Jenerál Lere Louva Karidade Hosi Xanana no Governu ba Vítima Inundasaun

DILI, 16 marsu 2020 (TATOLI) –Xefe Estadu Maiór Jenerál FALINTIL-Forsa Defeza Timor-Leste, Majór Jenerál Lere Anan Timur, louva ba karidade ne’ebé halo hosi  komandante ein-Xefe FALINTIL, Kay Rala Xanana Gusmão ho mós Sekretáriu Estadu Protesaun Sivíl, Alexandrino de Araújo no membru governu balun, ne’ebé tun diretamente ajuda povu hamoos fo’er ba komunidade afetadu nia uma no bairru afetadu-sira.

Notísia Relevante :  Inundasaun Estraga Eskola Tolu iha Dili

Oportunidade ne’e, Jenerál Lere Anan Timur, mós husu ajuda ba kompañia nasionál no internasionál sira atu oferese sira nia apoiu transporte hodi ajuda F-FDTL tula fo’er no rai-henek ne’ebé forsa defeza kee sai hosi povu nia-uma.

Lere dehan, F-FDTL tun ajuda halo limpeza iha área afetadu sira hodi kee no lori sai tahu  ho o fo’er barak hosi komunidade nia-uma no estrada ibun. Maibé, transporte la sufisiente atu tula fo’er lubun ne’e.

“Hanesan Timoroan, ha’u sei kontaktu ita nia emprezáriu nasionál no internasionál, karik sira oferese  transporte para ajuda ami ra’ut lisuk fo’er ne’e ba soe iha,” hateten Lare Anan Timur ba jornalista, ohin, hafoin organiza F-FDTL halo limpeza iha área Santa Krús, Dili.

Notísia Relevante : Governu Deside Fó Toleránsia Pontu Loron-Rua Halo Limpeza Jéral

Nia dehan, ekipa F-FDTL rasik aluga ona karreta baskulante-boot lima (5) hodi ra’ut fo’er hale’u Dili, maibé la sufisiente.

Lere dehan, dezastre ne’ebé akontese iha Dili nu’udar dezastre ba Timoroan, tanba ne’e, hotu-hotu iha obrigasaun organiza-malu halo limpeza jerál iha bairru ne’ebé afetadu.

Notísia Relevante : Jenerál Lere Mobiliza Forsa 500-resin Hamoos Fo’er iha Dili

Jornalista : Eugénio Pereira

Editór       : Francisco Simões