LIMPEJA-Profesór sira, estudante no membru F-FDTL, ohin, hamoos eskola sekundária 5 Maiu ne’ebé nakonu ho tahu no mós hetan estragu, bainhira udan boot monu rai iha sesta, (13-3-2020). Imajen Maria Auxiliadora

DILI, 16 marsu 2020 (TATOLI) – Udan boot ne’ebé akontese iha sesta (13/3/2020), hamosu inundasaun iha Kapitál hodi estraga eskola sekundária 5 Maiu Bekora, eskola ensinu báziku filiál Akanunu, Hera no Eskola Portugés Dili.

Ministra Edukasaun Juventude no Desportu (MEJD), Dulce de Jesus Soares, hatete inundasaun ne’ebé akontese sesta liubá konsege estraga eskola sia, maibé eskola tolu maka hetan estragu grave.

Alende sskola sia ne’e, inundasaun ne’ebé akontese konsege tama mós edifísiu INFORDEPE Balide.

MEJD ho ekipa téknika tuun ona bá terenu hodi haree diretamente problema ne’ebé akontese iha eskola sia ne’e atu oinsá bele responde.

“Ami servisu besik liután ho Ministériu Obra Públika (MOP) atu haree uluk kondisaun mota  depois mak sei apoiu liután ba eskola sira ne’ebé afetadu”, dehan Dulce de Jesus Soares, ba jornalista sira iha Palásiu Governu Dili, segunda (16/3/2020).

MEJD ho MOP dadaun ne’e hamoos ona bee dalan no halo hela normalizasaun ba mota iha eskola 5 Maiu no seluktan hodi garante prosesu aprendijazen ba estudante atu bele funsiona hikas iha semana ne’e.

“Eskola sira ne’ebé afetadu dezastre naturál sei la’o hanesan baibain fali. Tanba iha eskola sira ne’e kuaze profesór sira, estudante no inan-aman sira balun mak apoiu ona limpeza ha eskola sira ne’e”, esplika Ministra.

MEJD ho Ministériu Administrasaun Estatál (MAE) informa ona situasaun ne’e ba Primeiru-Ministru, Taur Matan Ruak, atu oinsá aloka orsamentu hodi responde  ba problema ne’ebé akontese.

“Aban (17/03/2020) ita hamutuk ho MAE ne’ebé lidera asuntu emerjénsia sei halo aprezentasaun kona-ba nesesidade orsamentu ne’ebé MEJD presiza hodi normaliza fila-fali prosesu aprendijazen iha eskola sia ne’ebé afetadu,”tenik Dulce.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here