Membru F-FDTL ajuda hela kee tahu nurak no fo’er ne’ebé nakonu intupidu iha povu sira nia uma iha área Santu Krús, Dili. Imajen/Eugénio Pereira

DILI, 16 marsu 2020 (TATOLI)- Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timur, ohin, hamutuk ho komandante F-FDTL no soldadu-sira na’in 500-resin tuun ba terrenu hodi apoia halo limpeza jerál iha bairru no eskola sira ne’ebé sofre inundasaun.

Notísia Relevante : PN Husu Governu Atu Esplika Orsamentu Ba Vítima Inundasaun

Lare Anan Timur hateten, hahú ohin komandu  suspende provizóriu servisu membru F-FDTL sira hodi tun ajuda povu hamoos fo’er iha área Eskola 5 de Maiu, Becora,  Ospitál Nasionál Guido Valadares (HNGV), Eskola Portuguesa Balidi  no komunidade sira nia uma iha área Becora, Santa Krús  no iha parte Taibesi, Becusi no Bidau  too moos.

Jenerál Lere dehan, F-FDTL kaer metin sira nia slogan rezisténsia katak, “Povu Mak Bee, FALINTIL Maka Ikan” no ohin povu hasoru susar, FALINTIL tenke tuun direita hodi ajuda.

“Ohin ha’u suspende imi nia servisu hotu para ita mai konsentra fó apoiu ba ita nia populasaun ne’ebé afetadu iha inundasaun dezde sesta feira too agora,”  afirma Lere Anan Timur.

Lere dehan, bainhira sidade Dili-laran inklui povu-nia uma no eskola-sira seidauk moos, forsa F-FDTL-sira seidauk bele fila ba sira nia kuartél.

Notísia Relevante : “Governu La Konsidera Ami Nu’udar Nia Povu”

“Bainhira Dili seidauk moos imi seidauk bele fila ba imi nia fatin, tanba ajuda urjénsia ba povu nia uma ne’e importante-liu,” afirma Lere Anan Timur ba nia soldadu ho komandante sira.

Nia dehan, ohin loron funu la iha ona no misaun servisu F-FDTL nian maka ajuda povu sai hosi sofrimentu nu’udar asaun sosiál umana ne’ebé iha valór boot liu ba povu no nasaun.

Tuir observasaun Ajénsia Tatoli nota, komunidade iha área Santa Krús sente kontente ho prezensa forsa F-FDTL ne’ebé tun direita ajuda sira kee sai rai henek no fo’er ne’ebé mota lori nakonu tama sira  nia-uma.

PNTL Halo Limpeza iha Palásiu Prezidensiál

Iha fatin hanesan, Komandante Jerál PNTL, Komisáriu Faustino da Costa, ohin, orienta mós membru PNTL unidade hotu-hotu halo limpeza hodi hamoos tahu nurak iha área Palásiu Prezidénsia Repúblika.

Membru PNTL sira kontinua hamoos nafatin tahu nurak no fo’er ne’ebé nakonu iha jardín Palásiu Prezidente sai too estrada públiku area Ai-Tarak-Laran.

Jornalista : Eugénio Pereira

Editór       : Francisco Simões

1 KOMENTÁRIU

HAKEREK NO HATÁN

Please enter your comment!
Please enter your name here