Primeiru-Ministru, Taur Matan Ruak, prezide Reuniaun Konsellu Ministru estraordinária iha Palásiu Governu, segunda (16/03). Imajen Tatoli/Egas Cristovão

DILI, 16 marsu 2020 (TATOLI) – Governu liuhosi desizaun Konsellu Ministru (KM) estraordinária, deside fó toleránsia pontu durante loron-rua, hahú hosi loron 17 to’o 18 marsu ba funsionáriu sira hodi bele partisipa iha asaun limpeza jerál no rekuperasaun ba estragu sira ne’ebé provoka husi inundasaun ne’ebé akontese iha loron sesta  (13/03).

“Toleránsia pontu ne’e la’ós feriadu tanba toleránsia pontu ne’e la aplika ba funsionáriu hirak ne’ebé presta servisu esensiál sira hanesan servisu fó seguransa, sira ne’ebé tau-matan ba área saúde nian, no protesaun sivíl”, informa Ministru Reforma Lejizlativa no Asuntu Parlamentár, Fidelis Manuel Leite Magalhães hafoin reuniaun ezekutivu iha Palásiu Governu, segunda ne’e.

Tuir governante ne’e, desizaun ezekutivu ne’e sei la aplika ba funsionáriu hotu.

“Sei aplika ba sira ne’ebé la mai servisu no labele fó servisu esensiál ba sira, liuliu iha situasaun sira hanesan agora. Situasaun ida ne’ebé ultrapasa hela hanesan situasaun emerjénsia tanba inundasaun no mós preokupasaun sira tanba Coronavírus ka COVID-19, ne’ebé servisu esensiál sira tenke kontinua no labele para”, nia akresenta.

Governante ne’e subliña, Membru Governu sira iha kada ministériu sei define didi’ak servisu sira ne’ebé konsidera hanesan servisu esensiál, ne’ebé hanesan unidade importante tebes atu mákina Estadu labele para, maka deside katak sira kontinua servisu, tanba ne’e desizaun sei foti husi ministériu idaidak.

“Funsionáriu sira ne’ebé la’ós konsidera hanesan halo servisu esensiál sira, tenke asegura katak sira nia telemóvel funsiona ho di’ak, nune’e bainhira ministériu presiza bele kontata sira, la’ós tanba toleránsia pontu ne’ebé ema hotu ba uma no hamate telemovel”, nia salienta.

Tanba ne’e, Governu husu funsionáriu sira halo esforsu atu rekopera kondisaun iha família inklui iha bairru sira.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here