Bruno Magalhães ho Nia Grupu iha Hela Sela POLDA Metro Jaya
DILI, 05 marsu 2020 (TATOLI) – POLDA (Polisia Daerah) Metro Jaya, Jakarta, Indonézia, to’o oras ne’e detein hela suspeitu Bruno Magalhães ho nia maluk balun, kompostu husi ema na’in tolu (3) ka haat (4) ne’ebé envolve iha kazu prodús osan falsu.
Notísia Relevante : Xanana ho Mau-Nana La Envolve iha Kazu Prodús Osan Falsu
Embaixadór Timor-Leste ba Indonézia iha Jakarta, Alberto X.P. Carlos, ohin, informa ba Ajénsia Tatoli liuhosi mensajen WhatsApp katak, bainhira ekipa konjunta Polisia Nasional Timor-Leste (PNTL) ho Polisia Repúblika Indonézia (POLRI) halo kapturasaun ba Bruno Magalhães ho nia grupu, kompostu husi timoroan balun no sidadaun Indonézia balun, nia parte nu’udar Embaixadór haruka Adidu Seguransa, Julio Hornai, eis komandante Jerál PNTL ho Segundu Sekretáriu Embaixada TL nian ba haree sira iha sela detensaun POLDA Metro Jaya dala rua atu bele hatene sira nia kondisaun no mós fó asisténsia ruma bainhira presiza (protesaun konsulár & legal).
Embaixadór Alberto X.P. Carlos haktuir katak, iha POLDA Metro Jaya maka Adidu Seguransa, Julio Hornai, hetan informasaun katak Bruno Magalhães, além de uza pasaporte TL nia mós kaer KTP (Kartu Tanda Penduduk/Billete Identidade) Indonézia.
“To’o agora Embaixada seidauk hetan tan asesu ba ko’alia ho sira tamba prosesu investigasaun la’o hela,” hateten Embaixadór Alberto Carlos.
Notísia Relevante : Lere Fiar, Xanana ho Mau-Nana La Envolve iha Kazu Produsaun Osan Falsu
Hosi Jakarta, Embaixadór Alberto X. P. Carlos, informa katak, iha segunda semana fulan janeiru 2020, Embaixada simu duni informasaun katak ekipa a PNTL atu mai Jakarta hodi hamutuk ho ekipa POLRI halo operasaun hodi kaer grupu ida, balun Timoroan, tamba halo osan falsu.
Ekipa PNTL to’o iha Jakarta komesa kedan halo operasaun ne’ebé dura kuaze loron 10 no Hosi Embaixada autoriza Adidu Seguransa, Júlio Hornai, atu extende apoiu nesesáriu maibé diskretu.
Embaixadór Alberto Carlos hatutan, depois de operasaun hotu, ekipa PNTL hamutuk ema na’in tolu (3) ho sira nia kolaboradór ida (emprezáriu Timoroan) husu audiénsia atu hasoru Embaixadór hodi relata rezultadu operasaun.
“Sira informa katak ekipa konjunta PNTL-POLRI kaer ona Sr. Bruno Magalhães ho nia maluk nain 3 ka 4, balun ema Timoroan ne’ebé hela iha Indonézia) i submete ona ba prosesu investigasaun POLRI,” haktuir Alberto Carlos.
Notísia Relevante : PN Husu Loke Investigasaun Ba Video “Osan Falsu” Ne’ebé Viral iha Rede Sosiál
Nia lia tun tan dehan, fotografia ka videos husi rezultadu operasaun nian dokumentu konfidensiál ne’ebé ekipa PNTL de’it maka iha no mós sira share limitadamente ho autoridade kompetente balun iha TL.
“Kona-ba Sr. Bruno Magalhães, dezde tinan 2016 Embaixada buka halo hela monitorizasaun ba nia atividade negativa iha Indonézia, tamba embaixada hatene katak nia ema la loos, bosok-ten no mós ko’alia arbiru de’it,” afirma Embaixadór Alberto Carlos.
Nia fó sasin mós katak, Timoroan sira iha Jakarta lakohi atu hasoru nia tamba bainhira nia ko’alia lójika laiha hodi inventa buat barak, no dalan ikus mak nia husu fali osan (i por fim/ujung-ujungnya husu fali osan).
“Iha ne’e ha’u hakarak deklara katak, buat sira ne’ebé sai ona iha rede sosiál (Facebook) bainhira prosesu investigasaun sei lao hela, com certeza sai husi ema sira ne’ebé iha asesu ba dokumentu sira ne’e (foto/videos),” nia hateten.
To’o agora, Embaixadór Alberto Carlos, informa, Embaixada TL iha Indonézia buka ko’alia ho autoridade Indonézia nian kona-ba situasaun ida ne’e.
Jornalista : Eugénio Pereira
Editór : Francisco Simões
