Komandante Jeral PNTL Komisariu, Faustino da Costa ho nia Adjuntu Komisariu Mateus Fernandes. Imajen/Antonio Goncalves

DILI, 04 marsu 2020 (TATOLI) – Komandante Jerál Polisia Nasionál Timor-Leste (PNTL), Komisáriu Polisia Faustino da Costa, hamutuk ho Segundu Komandante PNTL, Komisáriu Mateus Fernandes, ohin, halo klarifikasaun ba públika katak, lider Karizmátiku Kay Rala Xanana Gusmão ho Brigadeiru Jenerál F-FDTL, Cornélio Ximenes “Mau-Nana” la envolve iha kazu prodús osan dolar falsu ne’ebé haklaken husi autór Bruno Magalhães ne’ebé viral ona iha rede sosiál Facebook.

Notísia Relevante :  PN Husu Loke Investigasaun Ba Video “Osan Falsu” Ne’ebé Viral iha Rede Sosiál

Komisáriu Faustino da Costa, afirma, informasaun kona-ba gravasaun vídeo ne’ebé viral iha Facebook  iha investigasaun entre autoridade Indonézia nian halo ba grupu Bruno Magalhães hodi temi naran Xanana- ho Mau-Nana ne’e nu’udar propaganda polítika hodi hafo’er lider sira nia naran.

“Publikasaun vídeo ne’ebé mensiona Maun Boot, Kay Rala Xanana Gusmão no Maun Veteranu, Brigadeiru Jenerál “Mau-Nana” nia naran ne’ebé temi iha vídeo ne’ebé públika husi konfirmasaun no informasaun ne’ebé iha husi parte autoridade PNTL no mós autoridade seguransa Indonézia ne’ebé prosesa hela kazu ne’e deteta katak, informasaun ne’ebé hato’o husi Bruno Magalhães  iha média ne’e laloos. Tanba ho intensaun ida atu hetan influensia, konfiansa no kredibilidade ba vítima sira ne’ebé lansa propaganda ne’e,” afirma Komisáriu Faustino  da Costa ba jornalista liuhosi konferénsia imprensa iha Kuartél Jerál PNTL, Caicoli, Dili.

Notísia Relevante : CNRT Rejeita Akuzasaun Falsa Kona-ba Prodús Osan Falsu

Autór sira agora daudaun Polisia Indonézia sei investiga no ema sira ne’ebé autór ne’e hasoru sempre temi lider Timor-Leste nia naran para bele hetan influensia hodi hadau konfiansa ba autoridade seguransa atu liberta sira.

“Autór sira ne’e lori lider sira nia naran, fotografia hanesan prova ida katak, nia iha relasaun di’ak no hetan autorizasaun no aprovasaun hodi hetan konfiansa ba nia hahalok ne’ebé ikus mai laloos no bosok,” Komisáriu Faustino da Costa klarifika.

Kona-ba kazu ne’e rasik, Komandu PNTL simu informasaun husi Servisu Informasaun Polisia (SIP) iha loron 28 dezembru 2019 katak, iha informasaun indikasaun ema no grupu balun halo atividade hodi envolve sidadaun Timoroan balun ba iha atividade ne’ebé deskonfia hanesan burla. Nune’e, iha loron 6 janeiru 2020, Komandu PNTL liga ho informasaun ne’ebé iha tenta koordena no atualiza situasaun ne’e bazeia ba akordu ne’ebé PNTL halo ho Polisia Repúblika Indonézia maka Komandu PNTL husu Autorizasaun ba Governu Timor-Leste hodi dezloka ekipa investigasaun ba Indonézia hodi halo investigasaun ba kazu deskonfia prodús osan falsu ne’e.

Iha loron 19 janeiru 2020, ekipa ba hasoru malu ho POLRI hodi hahú halo identifikasaun no rekolla kazu burla ne’e rasik.

Komisáriu Faustino da Costa, hatutan, husi prosesu investigasaun hotu ne’ebé halo husi autoridade Indonézia identifikasaun duni iha dadus no gravasaun ne’ebé sira halo durante atividade investigasaun.

Kazu ne’e rasik sei iha hela prosesu investigasaun no seidauk konsidera nu’udar krime, maka PNTL nunka divulga informasaun saida de’it ba públiku liga ho lei ne’ebé iha. Nune’e, PNTL rasik sente hakfodak bainhira haree publikasaun informasaun vídeo iha média sosiál ne’e laloos.

Komandu PNTL mós hasai ona despaxu ida hodi orienta Inspetór Jerál PNTL ho ekipa Polisia Nasionál Servisu Investigasaun Kriminál (PNSIK) halo ona investigasaun no interrogasaun ida ba ekipa oknum membru PNTL ne’ebé fahe vídeo ne’e ba rede sosiál Facebook sei prosesu nia kazu ba Ministériu Públiku.

Relasiona ho kazu ne’e, Komandante PNTL rasik aprezenta ona dadus no informasaun ne’ebé deskonfia ba burla agravadu ba Prezidente Repúblika, Francisco Guterres Lú Olo no Primeiru Ministru, Taur Matan Ruak, hodi hetan koñesimentu.

Husi informasaun ne’ebé SIP rekolla, sempre halo koordenasaun no atualizasaun ba informasaun ho parte relevante hanesan, Zota Dois (Z2), Servisu Informasaun Militár F-FDTL, Servisu Intelijénsia Nasionál (SNI) no Kaza Militár Gabinete Prezidensiál da Repúblika.

Aproveita oportunidade ne’e, Komisáriu Faustino hato’o ba veteranu sira hotu katak, informasaun ne’ebé autór sira uza hodi temi lider sira nia naran ne’e laloos no bosok.

Atu Prodús Osan Falsu Ne’e La Loos

Iha parte seluk, Komisáriu Faustino dehan, bazeia ba investigasaun ne’ebé autoridade Indonézia sira halo ba suspeitu sira katak, sira atu prodús osan falsu iha Indonézia ne’e la loos.

“Iha publikasaun deteta katak, atu halo fabrika ba osan (dolar) falsu ida ne’e prosesu la deteta no laloos,” nia hatete.

Komandu PNTL mós alerta ba públiku, liu-liu militante no simpatizante partidu polítiku sira atu labele partilla informasaun falsu iha rede sosiál hodi afeta ba estabilidade polítika iha rai laran no hamosu konfuzaun entre lider istóriku, veteranu no lider partidu polítiku no Instituisaun PNTL no F-FDTL.

Komandu PNTL mós sei la tolera ba públiku no grupu sira ne’ebé kontinua fahe informasaun falsu ba públiku sei kaptura no prosesa kazu ne’e ba Ministériu Públiku.

Tuir informasaun ne’ebé Ajénsia Tatoli rekolla, autór sira hetan kaer husi Autoridade Seguransa Indonézia iha loron 13 janeiru 2020 iha área Jakarta Sentrál.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here