Xefe Estadu Maiór Jenerál F-FDTL, Majór Jenerál, Lere Anan Timur. Imajen/ António Gonçalves

DILI, 04 marsu 2020 (TATOLI)–Xefe Estadu Maiór Jenerál FALINTIL Forsa Defeza Timor Leste (F-FDTL), Majór Jenerál Lere Anan Timur, fiar katak líder nasionál no karismátiku Kay Rala Xanana Gusmão ho Brigadeiru Jenerál Cornélio Ximenes ‘Mau-Nana’ la envolve iha kazu prodús osan falsu.

“Kona-ba Xanana, Mau-Nana, naran sai duni katak deskonfia envolve iha kazu ne’e. Maibé ita labele fiar katak, ita-nia maun na’in rua iha osan falsu nia okos. Xanana no Mau-Nana la’ós kualkér ema. Xanana ema líder nasionál karismátiku, Mau-Nana mós ema líder ida rezisténsia ninian no hanesan mós Jenerál ida. Tanba ne’e, ema ne’ebé ko’alia ne’e tenke iha evidénsia forte atu bele ko’alia, labele ko’alia arbiru de’it,” dehan Lere Anan Timur ba jornalista sira hafoin hasoru malu ho Prezidente Repúblika, Francisco Guterres “Lú Olo” iha palásiu Prezidensiál Bairru-Pité, Dili.

Nia hatutan, dalaruma iha ema balun ne’ebé hakarak hatun lider na’in rua ne’e nia kredibilidade hodi halo kampaña no halo propaganda falsu de’it.

“Maibé, ema ne’ebé halo ne’e, nia mós tenke kuidadu. Ó iha evidénsia ka naran ko’alia de’it,” Lere hateten.

Maske nune’e, Lere rekoñese katak produsaun ba osan falsu ne’e kuaze akontese iha fatin hotu la’os iha Timor de’it. Maibé, nia hateten, ba Timor iha impaktu negativu boot tebe-tebes tanba Timor-Leste nasaun ida ne’ebé foin ukun aan.

“Agora mak osan falsu mai duni, ne’e ita-nia ekonomia atu la’o oinsá. Aat liután mak ho ita-nia situasaun polítika atuál ne’ebé agora komplikadu hela,” nia subliña.

Entretantu, antes ne’e, Komandante Jerál Polísia Nasionál Timor Leste (PNTL), Komissáriu Faustino da Costa, klarifika katak líder karismátiku Kay Rala Xanana Gusmão ho Brigadeiru Jenerál F-FDTL Cornélio Ximenes ‘Mau-Nana’ la envolve iha kazu produsaun osan dolar falsu.

Notísia Relevante: Xanana ho Mau-Nana La Envolve iha Kazu Prodús Osan Falsu

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here