Imajen Tatoli/ Egas Cristóvão.

DILI, 02 marsu 2020 (TATOLI)—Reprezentante povu iha Parlamentu Nasionál (PN) husu ba órgaun kompetente atu loke investigasaun ba video ne’ebé viral kona-ba deskonfia timoroan balun prodús osan falsu iha Indonézia.

Deputadu Bankada Parlamentár PLP, Noé da Silva “Buka-Tuir” husu ba Governu atu klarifika osan falsu ne’ebé viral tebes iha rede sosiál.

“Ami husu klarifikasaun hosi Governu kona-ba osan falsu. Iha ne’ebá hateten organizasaun partidária balun utiliza ema halo osan falsu ne’e. Ami-nia preokupasaun hanesan reprezentante povu oinsá mak ita bele halo prevensaun ba ida-ne’e. Tanba, ita ta’uk bele afeta ba ita-nia nasaun, liuliu ita-nia sidadaun sira. Satán, isu ba Eleisaun Antesipada ne’e maka’as tebes,” dehan Deputadu Noé da Silva, liuhosi plenária Parlamentu Nasionál, ohin.

Deputadu PLP ne’e lakohi atu povu mak sai vítima ba osan falsu ida-ne’e. Tanba ne’e, nia husu ba polísia tenke halo investigasaun ba kazu refere.

“Se informasaun ida-ne’e mak loos, ami husu ba Polísia, Ministériu Públiku no instituisaun sira ne’ebé relevante ba setór justisa bele halo medida ruma. Tanba, ita ta’uk buat hirak ne’e akontese iha ita-nia rain ke bele prejudika rasik ita-nia sidadaun,” nia dehan.

Entretantu, Deputadu FRETILIN, Dario Madeira hateten, liga ba video ne’ebé oras ne’e viral ne’e husu ba Ministériu Justisa, Tribunál tenke tau atensaun másimu ba video ne’e.

“Karik video ne’e iha ninia lia-loos ruma tenke publika para povu bele hatene. Karik, la loos tenke publika para povu mós hatene kona-ba ema ne’ebé prodús osan falsu ne’e,” depuatdu FRETILIN ne’e hateten.

Nia hatutan se aktu hirak ne’e loos entaun prosesu investigasaun tenke nakloke ba públiku.

Iha fatin hanesan, Deputada FRETILIN, Helena Martins, husu ba òrgaun kompetente atu loke investigasaun ba video ne’ebé espalla iha rede sosiál.

“Tenke investiga tanba ita haree video ne’e atu estraga fali ita-nia líder sira. Ne’ebé, oinsá maka atu fó onra no Gloria nafatin ba sira-nia luta entaun labele lori aktu hanesan ne’e hodi estraga fali sira,” nia hateten.

Enretantu, Deputada CNRT, Lúcia Taeki, husu ba parte kompetente loke investigasaun ba video ne’ebé fó-sai osan falsu ne’e.

“Iha video ne’e dehan temi ami-nia Maun-Boot Xanana nia naran. Tanba ne’e, husu investiga hodi hatene lia-loos hosi kazu ne’e. Partidu CNRT mós sei la toba dukur ba kazu ne’e,” nia tenik.

Atu reforsa hanoin ida-ne’e, Xefe Bankada Parlamentár CNRT, Duarte Nunes, afirma Bruno Fernandes ne’ebé prodús osan falsu ne’e kle’ur ona  hela iha Indonézia.

“Kazu ne’e viral tebes. Ami-nia prezidente partidu naran boot iha ne’ebá ne’e. Dalaruma ita-boot sira mai iha Parlamentu halo viral liután, ita bele dehan hanesan ne’e. Ema balun preokupa tanba interese polítiku ba situasaun hanesan ne’e,” hateten Xefe Bankada CNRT ne’e.

Duarte Nunes fiar katak polísia mós daudaun ne’e halo hela investigasaun ba kazu refere atubele hetan faktu no lia-loos ruma.

“Parlamentu bele husu ba Komandante PNTL mai esklarese iha-ne’e para ita hotu hatene. Ami mós sei investiga situasaun ne’e to’o iha ne’ebé. Video ne’e viral tanba interese polítiku ka realmente preokupante ba nasaun. Ita espera investigasaun bele hatuur faktu ruma,” nia dehan.

Hatán ba preokupasaun hirak-ne’e, Ministru Reforma Lejizlativa no Asuntu Parlamentár, Fidelis Magalhães hateten, parte Governu lakohi komenta kona-ba kazu ne’e tanba autoridade investigasaun hosi polísia nian iha atu haree ba asuntu ne’e.

“Tanba autoridade investigasaun hosi polísia nian iha no ita mós iha adidu seguransa nian iha Indonézia, bele koordena ho parte ne’ebá nian. Atu aviza ba públiku katak ema ne’ebé akuzadu ema kaer iha tendénsia temi naran arbiru. Ne’ebé, iha faze investigasaun ne’e di’ak liu ita lalika fiar,” nia haklaken.

Nia salienta, kazu ne’e husik ba polísia halo serbisu hodi hatene lia-loos hosi kazu ne’e.

Notísia Relevante: CNRT Rejeita Akuzasaun Falsa Kona-ba Produs Osan Falsu

Jornalista : Evaristo Soares Martins

Editór      : Cancio Ximenes

1 KOMENTÁRIU

  1. Kualker ema kombina tia hakarak estraga ema nia naran ne fasil los para atu halo nè i buka maka ema ida hatama ne ho ema sira be koalia ne i para halo america nia osan tenke halo ho borboleta laos naran naran deit i fasil liu tan governo timor koalia ho governu indonesia para bele mos investiga iha indonesia nia laran sobre ema sira halo filmagem ne para clarifica kedas i nune labele halo ita timor nia naran foer .Obrigado

HAKEREK NO HATÁN

Please enter your comment!
Please enter your name here