Adjuntu Sekretáriu Jerál Federasaun Futeból Timor-Leste (FFTL), Frederico Martins

DILI, 27 janeiru 2020 (TATOLI)–Adjuntu Sekretáriu Jerál Federasaun Futeból Timor-Leste (FFTL), Frederico Martins hateten tinan ne’e sira-nia planu haree liubá kompetisaun nível lokál.

“Tinan ne’e ita sei kontinua de’it ho kompetisaun lokál hanesan sei kontinua U-18 iha jogu Telekomcel Cup, jogu eskolár nian. U-16 mós ita sei kontinua feto ho mane,” Frederico ba Agência Tatoli iha edifísiu FFTL, Bairru Formosa, Dili, segunda ne’e.

Nia dehan, kompetisaun ba feto ho mane U-16 sei hala’o iha Dili, Suai, Baucau no Maliana ne’ebé tékniku hosi FFTL rasik tun diretamente hodi haree ona.

“Ida-ne’e mak FFTL nia planu no programa sei realiza iha tinan ne’e, liuliu kompetisaun ki’ik sira ne’ebé sei hala’o iha munisípiu hanesan ami ba identifika ona fatin ida mak Suai, Baucau no Bobonaro ba jogu U-16 feto no mane,” Frederico informa.

Nia subliña, iha kompetisaun internasionál 2020, selesaun nasionál sei la partisipa barak tanba 2019 Timor-Leste la konsege pasa iha kualifikasaun Asian Football Confederation (AFC).

“Kompetisaun internasionál ita sei la partisipa tanba kualifikasaun AFC nian ita la liu hotu. Entaun, ita sei la partisipa. Ita partisipa de’it jogu Asian Football Confederation,” nia esplika.

Entretantu, orsamentu hodi tulun kompetisaun sira-ne’e sei haraik hosi Federation International Football Association (FIFA) no AFC.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here