Kuba Kontinua iha Kompromisu Ajuda TL
DILI, 18 fevereiru 2020 (TATOLI)-Governu Kuba liuhosi ninia Embaixadór iha Timor-Leste, Omar Lauro Marerro Betancourt, hateten Kuba iha nafatin kompromisu atu ajuda Timor-Leste iha área hotu-hotu, liuliu kontinua oferese bolsu estudu ba timoroan atu estuda iha área medisina iha Kuba.
Embaixadór Omar Morreiro, hato’o prontidaun ne’e diretamente ba Primeiru-Ministru, Taur Matan Ruak, durante hasoru malu iha Palásiu Governu, Dili, tersa ne’e.
Notísia Relevante :Embaixadór Kuba Ko’alia Kooperasaun Bilaterál Ho PM
“Kuba sei mantein kooperasaun di’ak ho Timor-Leste iha área saida de’it nune’e bele ajuda Timor-Leste ninia dezenvolvimentu. Maibé Kuba mós kontinua loke dalan atu kapasita timoroan sira iha área médiku nian,” dehan Diplomata Kubanu ne’e ba Jornalista sira iha Palásiu Governu.
Notísia Relevante :Kuba Forma Ona Médiku Timoroan 1.000
Embaixadór Omar argumenta nasaun rua persiza hametin no reforsa liután lasu kooperasaun bilaterál nune’e bele dezenvolve di’ak liután Timor-Leste.
Notísia Relevante :Embaixadór Foun Kuba Husu Governu Tau-matan ba Médiku Kubanu
“Ha’u kontente loos hasoru malu ho Primeiru-Ministru, Taur Matan Ruak. Ami ko’alia liu mak ita-nia kooperasaun. Hatene ona nasaun rua amigu di’ak dezde uluk kedas, ami sempre ajuda nasaun Timor-Leste,” nia haktuir.
Entretantu, tuir dadus, bolseiru timoroan hamutuk ema na’in-1018 maka estuda ona iha Kuba iha área medisina no konsege hasai ona doutór jerál no doutór espesialista sira.
Notísia Relevante :TL-Kuba Kontinua Kooperasaun Bilaterál
Jornalista : Hortencio Sanchez
Editór : Agapito dos Santos
