Embaixadór Cuba iha Timor-Leste, Oscar Genaro Coet Blackstock. Imajen/Cipriano Colo

DILI, 28 outubru 2019 (TATOLI) – Embaixadór Cuba iha Timor-Leste, Oscar Genaro Coet Blackstock, hala’o enkontru ho Presidente Repúblika (PR), Francisco Guterres ‘Lú Olo, hodi hato’o andamentu kooperasaun bilaterál entre nasaun rua.

Iha biban ne’e, diplomátiku Kubanu ne’e informa rezultadu kooperasaun ne’ebé durante ne’e hala’o, liliu kona-ba ba médiku timoroan ne’ebé hala’o ona estudu iha Kuba ne’ebé atinji ona númeru boot no sira prontu atu fó asisténsia saúde ba populasaun iha territóriu Timor-Leste tomak.

“Enkontru ohin ho Prezidente Repúblika pozitivu tebes, ita ko’alia kona ba relasaun polítika bilaterál entre Kuba ho Timor-Leste. Onra bo’ot ba ha’u, tanba bele esplika ba Prezidente Repúblika kona-ba ha’u nia satisfasaun tanba Kuba forma ona médiku timoroan hamutuk 1.000”, nia tenik iha Palásiu Prezidensiál, Bairro Pité, Dili, segunda ne’e.

Reprezentante Estadu Kuba né’e hatutan, númeru médiku timoroan ne’e atinje tanba kompromisiu husi eis Prezidente Kuba, Saudozu Fidel Castro ho eis Prezidente Repúblika Demokrátika Timor-Leste (RDTL), Kay Rala Xanana Gusmão, iha enkontru ne’ebé hala’o iha Kuala Lumpur, Malázia iha tinan 2003.

Nune’e nia dehan, durante tinan 15 nia laran, Kuba forma ona médiku timoroan ne’ebé profisionál no prontu atu fó asisténsia saúde iha Timor Leste.

Oscar konsidera novidade ne’e iha impaktu boot ba saúde povu Timór nian, tanba ho prezensa médiku timoroan hirak ne’e konsege elimina moras oin-oin, liuliu moras malária ne’ebé antes ne’e ho númeru aas.

“Ha’u hanesan reprezentante Estadu Kuba nian iha Timor Leste, satizfás ho novidade ida ne’e. Kuba prontu nafatin atu kontinua aumenta no hakle’an kooperasaun bilaterál ho Timor-Leste hanesan país irmaun”, nia promete.

Nia dehan, iha enkontru ne’e, Xefe Estadu manifesta ninia alegria ho kooperasaun bilaterál entre nasaun rua.

Tanba ne’e, nia subliña, PR mós manifesta nia interese atu hakle’an liután relasaun bilaterál, liliu kontinua formasaun médiku timoroan.

Embaixadór ne’e mós fó hanoin katak, iha ona grupu médiku timoroan nu’udár grupu dahuluk ne’ebé hala’o hela formasaun iha Kuba atu sai profesór hodi hanorin kona-ba medisina nian, iha Universidade Nasionál Timor-Leste (UNTL).

Grupu ida ne’e, hamutuk médiku timoroan na’in-11, ne’ebé sei fila hikas mai Timór iha semana ida-ne’e nia laran.

Grupu seluk iha mellor estudante lubuk ida, ne’ebé forma husi médiku Kubanu iha UNTL, hodi hasai espesialista kardiolojia, ortopedia, no seluk tan iha Kuba.

“Husi númeru médiku hirak ne’e, ita iha esperansa katak iha futuru Timor-Leste sei iha primeiru espesialista kardiótika no sei atende moras ne’ebé oras ne’e daudaun difísil atu atende”, nia akresenta.

Jornalista : Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here