Embaixadór foun dezignadu Repúblika Kuba iha Timor-Leste, Omar Lauro Marerro Betancourt, bainhira entrega karta kredensiál ba Prezidente Repúblika, Francisco Guterres Lú Olo. Imajen/Mídia PR

DILI, 27 janeiru 2020 (TATOLI)–Embaixadór foun dezignadu Repúblika Kuba iha Timor-Leste, Omar Lauro Marerro Betancourt, husu Governu Timor-Leste, atu tau-matan ba médiku kubanu sira ne’ebé servisu iha Timór tuir termu serbisu ne’ebé hatuur ona iha akordu.

Ministru Negósiu Estranjeiru no Kooperasaun, Dionísio Babo Soares, hato’o asuntu ne’e hafoin akompaña embaixadór foun Kuba entrega karta kredensiál ba Prezidente Repúblika (PR), Francisco Guterres Lú Olo, iha Palásiu Prezidente Nicolau Lobato, Bairru Pité, segunda ne’e.

“Embaixadór husu atu Governu bele haree didi’ak médiku kubanu sira ne’ebé oras ne’e daudaun mai serbisu iha ita-nia rain tuir termu ne’ebé mak konkorda tiha ona, nune’e bele serbisu ho didi’ak no bainhira ramata bele filafali ba sira-nia rain”, tenik Dionísio ba mídia sira.

Nia informa katak maski laiha problema ruma entre nasaun rua ne’e iha kooperasaun área medisina nian, maibé pedidu husi embaixadór foun atu oinsá bele hadi’a di’ak liután relasaun ne’e iha futuru.

“Oras ne’e daudaun, médiku kubanu ne’ebé servisu iha Timór hamutuk 157 no médiku hirak-ne’e servisu iha ospitál no sentru saúde ne’ebé la’ós iha Dili de’it, maibé iha mós munisípiu sira seluk”, Dionísio akresenta.

Nune’e, governante ne’e mós esplika kona-ba konteúdu karta kredensiál katak, ba dahuluk hato’o kumprimentu husi Prezidente Kuba, Raul Castro ba ninia omólogu Prezidente Lú Olo.

Aleinde ne’e, reinteira mós kompromisu Kuba nian atu serbisu hamutuk ho Timor-Leste liuliu ba formasaun médiku timoroan sira tuir akordu eis Prezidennte Repúblika Kuba, Fidel Castro ho eis Prezidente Repúblika, Kay Rala Xanana Gusmão, ne’ebé tenke eduka médiku timoroan to’o 1.000 maibé realidade hatudu katak liu tiha ona, hamutuk 1.018.

“Agora ita mós loke tan Fakuldade Medisina Universidade Nacional Timor Lorosa’e (UNTL) nian, ho nia formadór sira mai husi Kuba, tanba serbisu hamutuk ne’e kontinua nafatin no iha mós kooperasaun kontinua iha área sira seluk hanesan turizmu, agríkola no sira seluktan”, nia hateten.

Dionísio haktuir, embaixadór ne’e agradese ba Timor-Leste tanba apoiu Kuba iha fórum multilaterál sira, liuliu kona-ba buat ne’ebé mak sira hasoru iha mundu.

“Ita-nia Prezidente Repúblika mós hato’o ba embaixadór katak Timor-Leste hanesan país ki’ik no Kuba hanesan país irmaun, tanba ne’e Timor-Leste kompromete atu kontinua mantein kooperasaun hodi fortalese liután relasaun amizade entre país rua”, nia salienta.

Embaixadór foun Kuba, Omar Lauro Marerro Betancourt, troka eis embaixadór Oscar Genaro Coet Blackstock.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here