Embaixadór Kuba ba Timor-Leste, M. Oscar Genaro Cet Blackstock hasoru malu ho Primeiru-Ministru, Taur Matan Ruak, iha Pálasiu Governu, Dili, tersa (02/07/2019). Imajen Tatoli/Egas Cristóvão

DILI, 2 jullu 2019 (TATOLI)–Embaixadór Kuba ba Timor-Leste, M. Oscar Genaro Coet Blackstock hasoru malu ho Primeiru-Ministru (PM), Taur Matan Ruak hodi ko’alia kona-ba kooperasaun bilaterál.

Ami ko’alia kona-ba relasaun bilaterál entre Kuba no Timor-Leste. Espera iha tempu badak sei ko’alia tan kona-ba kooperasaun ba kapasitasaun rekursu umanu iha área saúde no edukasaun,” tenik Embaixadór Kuba ba jornalista sira iha Palásiu Governu, tersa ne’e.

Tuir diplomátiku ne’e, to’o agora Kuba forma ona médiku timoroan hamutuk 984, ne’ebé koloka ona ba suku sira iha territóriu Timor-Leste.

“Kuba sei kontinua halo akordu ho Governu Timor-Leste atu fó kapasitasaun ba médiku timoroan sira. Relasaun entre nasaun rua la’o di’ak. Iha relasaun iha área edukasaun no saúde, iha timoroan ne’ebé hanesan profesór halo estudu iha Kuba no ba médiku sira foti espesializasaun iha Kuba, no iha médiku kubanu mak iha Timor-Leste para forma médiku timoroan,” nia esplika.

Oscar akresenta,  agora dadauk iha médiku timoroan hamutuk 30 mak foti espesialidade durante tinan haat ka lima iha área kardiolojia, onkolojia no orpedia iha Kuba.

“Timor-Leste la presiza ba rai li’ur kuandu atu halo tratamentu espesializada tanba iha ona médiku espesializada timoroan. Ne’e hanesan rezultadu hosi koopeasaun bilaterál entre Kuba no Timor-Leste ne’ebé pozitivu tebes, maibé nia kontinuidade depende ba autoridade Timor-Leste,” nia katak.

Tuir nia, Kuba hanesan nasaun ki’ik maibé avansadu iha área medisina no forma ona médiku barak, aleinde ne’e esperansa vida iha Kuba iha tinan 78.

 Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here