Autoridade seguransa lori kazál Timoroan JSP no AS ba Tribunál Atambua, segunda (10/02/2020). Imajen/Eugénio Pereira

ATAMBUA, 10 fevereiru 2020 (TATOLI)-Advogadu privadu ba kazál Timoroan, JSP ho AS, Jemmy Haekase, la simu desizaun ba akuzasaun husi prokuradór Atambua-Indonézia, ne’ebé kondena nia kliente ho ameasa pena prizaun tinan 17 no sulu multa ne’ebé defende ho osan montante Rp1,000,000.

Notísia Relevante : Provas Ba Proteje Kazál Timoroan Lori Droga Iha Ona 95%

Konsuladu Timor-Leste ba Atambua Indonézia, João Simão Sousa konversa hela ho Xefe Koordenadór Badan Narkotika Nasionál (BNN) Atambua, Komisáriu Polisia, Apolinário da Silva no Advogadu Jemmy Haekase iha Tribunál Atambua-Indonézia. Segunda (10/02/2020). Imajen/Eugénio Pereira

Jemmy Haekase aprofunda katak, rajaun fundamentál ne’ebé nia parte la simu akuzasaun iha prosesu julgamentu ba kazu ne’e tanba Prokuradór titular tuir loloos tenke solisita ba Tribunal atu fó sentensa pena prizaun ne’ebé diferente.

Kazál Timoroan ne’e hetan detensaun husi autoridade Atambua, Timor Osidentál (Kapaun), Indonézia, tanba hatama droga ho tipu pil extasi hamutuk 4.874 (rihun hat atus ualu hitu nulu resin hat) ba Atambua Indonézia, liu husi Motain, iha loron 29 maiu 2019.

“Prosesu julgamentu, ohin ne’e, tuir loloos atu rona ha’u nia deklarasaun atu defende ha’u nia kliente na’in rua nia  kazu. Maibé tanba akuzasaun husi prokuradór titulár  nian ne’e ha’u haree katak ladún justu fó pena prizaun ba sira na’in rua ho tinan 17 no multa ne’ebé diferente, tanba ne’e ha’u husu ba juis atu adia prosesu ne’e ba semana oin para ha’u bele prepara lai dokumentu ho razaun forte liután hodi aprezenta ba prokuradór no juis atu haree prosesu ho justu. Tanba auto defeza ita halo atu haree ema nia destinu, ita presiza baze legál forte para defende ema nia direitu,” dehan Jemmy Haekase ba jornalista sira  iha Tribunál Atambua.

Notísia Relevante : Xanana-Jokowi Bele Buka Solusaun Ba Kazál Timoroan Lori Droga

Advogadu, Jemmy Haekase. Imajen/Eugénio Pereira

Nia dehan, tuir loloos Ministériu Públiku tenke haree baze legál kazu droga la’ós ninia kliente mak na’in, tanba droga ne’e ninia kliente nia Patraun Arguido Jerry ne’ebé autoridade polisia Timor-Leste kaptura ona iha ninia servisu fatin iha Dili maka fó orientasaun hodi haruka sira lori tau iha mákina imprime conon ba Lippo Plaza, Kupaun – Indonézia.

“La justu se prokuradór akuza ha’u kliente AS tanba de’it nia fó ninia telefone ninia la’en JSP hodi kontaktu autór sira ne’ebé atu simu droga a iha Kupaun. Tanba JSP maka lori droga  husi ninia patraun ne’ebé fó servisu ba nia hanesan traballadór iha Ajénsia Espedisaun Filipina nian. Tanba ne’e ha’u husu ba prokuradór bainhira atu halo akuzasaun tenke haree ba kronolojia kazu ninia fundamentu no lójika,” Jemmy hateten.

Notísia Relevante : Embaixadór Alberto Carlos Vizita Kazál Timoroan iha POLRES Belu

Otimista Tribunál Redús Pena Prizaun

Iha parte seluk, Advogadu Jemmy mós otimista katak, ho razaun sira ne’ebé nia parte sei aprezenta, Tribunál sei tau konsiderasaun hodi hamenus pena prizaun tinan 17 ba kraik.

Iha parte seluk, Advogadu Jemmy mós apela ba parte família no Estadu Timor-Leste kontinua fó fiar ba nia hodi akompaña no defende kazu kazál Timoroan ne’e too hetan solusaun.

Antes ne’e, iha prosesu julgamentu ne’ebé hala’o ona loron 03 fevereiru 2020, Prokuradór, A.P Wicaksono, aprezenta akuzasaun hodi kondena kazál Timoroan ne’e ho pena prizaun tinan 17 no tuir lei Indonézia nian bazeia ba evidénsia ne’ebé iha.

Audensia  julgamentu ne’ebé hala’o ba dala-12 ona ne’e lidera husi Juis koletivu, A.A Gede Susila P, SH, M Hum, Gustav Bless Kupa, SH no Fauzi, SH.MH.

Notísia Relevante : Kazu Kazál Timoroan Lori Droga, Advogadu Husi Indonézia Halo Levantamentu Dadus iha TL

Tuir observasaun Ajénsia TATOLI nian iha Tribunal Atambua  nota katak kazál Timoroan ne’ebé durante ne’e detein iha sela Klase II B Atambua ohin lori ba Tribunál  akompaña direita husi Konsuladu Timor-Leste ba Atambua, João Simão Sousa ho ekipa protokolu akompaña mós husi parte Xefe Koordenadór Badan Narkotika Nasional (BNN) Atambua, Komisáriu Polisia, Apolinário da Silva ho ekipa BNN.

Kazál Timoroan daudaun  iha oan na’in tolu ne’ebé  hela ho família sira iha Dili, Timor-Leste.

Notísia Relevante : Governu Presiza Hatudu Seriedade Hodi Próteze Kazál Timoroan Lori Droga

Jornalista : Eugénio Pereira 

Editór       : Francisco Simões 

HAKEREK NO HATÁN

Please enter your comment!
Please enter your name here