Lider karizmatiku, Kaya Rala Xanana Gusmão hasoru malu ho Prezidente Repúblika Indonézia, Joko Widodo. Imajen/Dok.Espesiál

DILI, 15 jullu 2019 (TATOLI) – Lider Karizmátiku, Kay Rala Xanana Gusmão, iha belun di’ak no barak ho autoridade Indonéziu, inklui Prezidente Repúblika Indonézia nian, Joko Widodo (Jokowi).  Tanba ne’e, jurista timoroan Manuel Tilman, espera, ho Xanana nia relasaun di’ak sira ne’e bele konvense autoridade Indonézia hodi buka solusaun ba kazál timoroan lori droga.

Jurista, Manuel Tilman

“Ha’u hanoin urjente liu mak diplomata iha Indonézia no konsuladu sira tenke book aan ona, maibé ha’u haree  mós katak maun Xanana belun di’ak tebes ho Prezidente Repúblika, Joko Widodo, ne’ebé bele koalia ba malu hodi buka dalan di’ak ba salva kazál timoroan ne’e husi pena morte ou pena perpétua,” hateten Manuel Tilman, Ajénsia TATOLI, iha nia serbisu fatin, Dili, sábadu (13/07/2019).

Manuel Tilman, fó lembra fali katak, kazu Xanana nian iha mementu ne’ebá (tempu Indonézia) nian, tribunal Indonézia mós hamonu pena perpétua (hukuman seumur hidup), infelizmente la to’o iha desizaun ne’e hodi ikus mai sira aplika pena tinan 20 kadeia, tun ba  tinan 7 no ikus mai Xanana livre.

“Ho esperiénsia no kooperasaun husi polítiku na’in rua; Xanana ho Jokowi, inklui mós maun José Ramos Horta, bele dezvia sira na’in rua (kazál timoroan) husi pena perpétua ou pena morte,” hateten Manuel Tilman.

Tilman fiar katak,  lider diplomátiku José Ramos Horta, mós la nonook ba kazu kazál lori droga, tanba nia ema ida ne’ebé mak defende direitu umanu iha mundu internasionál no amigu di’ak ho Prezidente Repúblika Indonézia Joko Widodo, inklui lider Indonéziu nian sira seluk, ne’ebé luta ba direitu umanus.

Advogadu nee mós preokupa tebes ba destinu kazál timoroan lori droga,  tanba nee mak, nia sujere uza meius ne’ebé di’ak liu mak liu husi maun boot sira no husu estadu tenke buka advogadu husi Indonézia ne’ebé mak hatene di’ak liu kona ba investigasaun kriminál iha area droga nian.

Hatán kona ba  posibilidade envolve  advogadu TL iha prosesu nee,  Manuel Tilman, hatán dehan, labele tanba laiha lei estradisaun no kooperasaun judisiál.

Notísia Relevante: http://www.tatoli.tl/2019/07/embaixador-alberto-carlos-vizita-kazal-timoroan-iha-polres-belu/

Jornalista          : Domingos Piedade Freitas

Editór                 : Francisco Simões

HAKEREK NO HATÁN

Please enter your comment!
Please enter your name here