Vise Ministra Kuidadu Saúde Primária, Elia dos Reis Amaral. Imajen Mídia MS

DILI, 11 jullu 2019 (TATOLI)– Jeremias L.M Haekase, nu’udár advogadu privadu ne’ebé sei fó asisténsia  legál ba kazál timoroan ne’ebé lori droga, vizita Timor Leste hodi halo levantamentu dadus ba família rasik iha Dili, inklui buka hatene informasaun relevante husi Prokuradór Jerál Repúblika (PJR) ho kompañia JVK atu defende  kazál timoroan ne’e iha prosesu julgamentu.

Timoroan na’in rua (2) fen-la’en ho inisiál JSP no AS ne’e, kuarta (29/05/2019), autoridade Indonézia prende iha fronteira Mota-Ain, Belu, Timor Osidentál bainhira lori droga atu ba fa’an iha Kupang.

Evidénsia ne’ebé autoridade Indonézia foti husi kazál timoroan ne’e, kompostu husi ai-moruk droga musan 4.874 ne’ebé tetu hamutuk grama 1,861.

“Ita hotu hatene kazu kazál timoroan lori droga tama territóriu Indonézia oras ne’e iha ona prosesu nia laran. Ha’u nu’udar advogadu privadu ne’ebé sei fó asisténsia legal ba sira na’in rua mai hasoru direita família, Prokuradór Jerál Timor Lest, kompañia JVK hodi buka dadus atu fórmika evidénsia balun hodi hein julgamentu,” tenik Jeremias L.M Haekase, ohin, liuhusi konferénsia imprensa iha Bairru-Pite, Dili.

Jeremias esplika, atu defende di’ak liu tan kazál timoroan lori droga presiza timoroan hotu nia kontribuisaun, liuliu apoiu husi Governu Timor Leste ho Prokuradór Jerál Repúblika Timor Leste nian.

Jeremias kontente ho sorumutuk ho PJR Timor Leste tanba nia parte ho governu Timor Leste mós iha interese no preokupa kona ba kazál timoroan lori droga tama Indonesia.

Hatán kona-ba kazál timoroan lori droga sala ka lae, nia salienta katak, ninia kliente na’in rua (fen-la’en) nee, la sala tanba sira na’in rua lori droga la’ós tanba sira na’in rua ninia hakarak, maibé halo de’it knaar hanesan traballadór iha kompañia internasionál JVK.

Advogadu husi Indonézia ne’e mós konfirma ona ho kompañia JVK katak, ninia kliente na’in rua nee, liuliu ninia mane  prova katak serbisu duni iha JVK no konvense duni katak kompañia JVK mak haruka duni sira na’in rua ba iha Indonesia hodi transporta sasán eletrónika nee.

Jeremias mós esplika tan katak sira na’in rua mós lahatene katak sasán ne’ebé mak sira na’in rua nee droga, maibé sira na’in rua hatene de’it mak sasán eletrónika.

Prova seluk, Jeremias hateten, iha prova teste urine hatudu negativu katak sira na’in mós la’ós sai konsumidór, maibé kumpre de’it mandadu husi patraun kompañia JVK .

Jeremias klarifika katak, timoroan na’in rua (fen-la’en) nee hetan akuzasaun tuir artigu 112, kapítulu  (1), no (2), artigu 114 kapítulu (1) no (2), artigu 132 (1) Lei Nu.35 tinan 2009 kona ba narkótika.

Jornalista  : Domingos Piedade Freitas

Editór        : Francisco Simões

 

HAKEREK NO HATÁN

Please enter your comment!
Please enter your name here