Inundasaun nebe akontese iha Tasitolu hafoin udan boot iha 22-23 Janeiru 2020 tanba baleta intupidu alias bee dalan nakonu ho foer.Imajen/Antonio Goncalces

DILI,24 janeiru 2020 (TATOLI)-Ekipa hosi Diresaun Jerál Obra Públika no Institutu Jestaun Ekipamentu (IJE) to’o sexta lokraik ne’e, seidauk realiza asaun hamoos valeta no kee bee dalan iha área Tasi-Tolu hafoin akontese inundasaun hodi bee tama komunidade uma-kain 240 nia uma iha Suku Madohi no Suku Comoro, Postu Administrativu Dom Aleixo Munisípiu Dili, iha kinta horiseik.

Maske iha kinta horiseik, Ministru Obra públika Salvador Eugénio Soares dos Reis Pires, no Vise Ministru Obra Públika, Nicolau Lino Freitas Belo, fó ona orientasaun ba ekipa servisu hodi hamoos valeta no kee bee dalan hodi evita mosu tan inundasaun foun.

Notísia Relevante:Família 200-resin iha Tasi-tolu Afetadu ba Inundasaun

Entretantu, tuir observasaun Agência TATOLI, sexta lokraik ne’e,  nota laiha pesoál servisu hosi MOP no IJE maka koloka ho mákina pezada iha fatin ne’ebá hodi kumpre orientasaun governu nian ba hamoos valeta no kee bee dalan ne’ebé maka dadaun ne’e intipidu.

Notísia Relevante:Dadus SEPS: Sasán Família 240 Hetan Estragu

Durante akontesimentu inundasaun iha kinta (23/01/2020), ekipa MOP no instituisaun relevante balun hahú hamoos ona lixu iha valeta hanesan plastiku, botir mamuk, lata no plastíku maibé la efetivu tanba lixu barak sei namkari iha valeta no estrada ninin.

Hatan ba asuntu ne’e, Diretór Jerál Obra Públika, Rui Hernani, hateten ekipa MOP no IJE iha sexta ohin, desloka iha fatin ne’ebá hodi hamos valeta.

Notísia Relevante:Inundasaun Tasi-tolu, Uma Kain 37 Evakua ba Don Bosco ho Bombeiru

“Ohin lokraik mós ha’u liuhosi ne’ebá atuálmente sira (Ekipa MOP no IJE-red) hamoos hela iha ne’ebá,”Rui Hernani ba TATOLI, via telefone ohin.

Kona-ba planu kee valeta iha Tasi-Tolu, Diretór Jerál ne’e, esplika projetu ne’e sei tama iha pakote konstrusaun estrada foun kilometru rua hahú rotunda Comoro to’o Tasi-Tolu tanba tuir planu sei hahú implementa iha 2020 no remata iha 2021.

Notísia Relevante:Udan Horikalan, Lori Inundasaun ba Uma 60-resin iha Bairru Kuarentena

“Agora dadaun ami halo hela levantamentu dadus ba estrada killometru rua para liga mai ho rotunda, tanba obra ida ne’e kompleta mós projetu ida portu Tibar ne’e,”tenik tan.

Iha parte seluk, Rui Hernani husu ba komunidade atu so’e fo’er iha fatin lixu hodi labele so’e fo’er arbiru tanba sei hamosu inundasaun bainhira valeta sira intipidu ho fo’er.

Jornalista : Agapito dos Santos

Editór        : Francisco Simões

HAKEREK NO HATÁN

Please enter your comment!
Please enter your name here