Komunidade afetadu inundasaun iha Bairru Kuarentena, Aldeia Terra Santa, Suku Madohi, Postu Don Aleixo, Munisípiu Dili. Imajen/Osória Marques

DILI, 22 janeiru 2020 (TATOLI)-Familia uma-kain 60-resin iha Bairru Kuarentena, Aldeia Terra Santa, Suku Madohi, Postu Don Aleixo, Munisípiu Dili, horikalan, tenke halo ezersísiu to’o fali rai loron hodi aguenta satan bee ne’ebé tama borus sira nia uma.

Notísia Relevante : Liña Ministeriais Koordena Malu Hodi Haree Vítima Dezastre Naturaís

Udan boot iha minutu balun nia laran, horikalan, purvolta tuku 0:0 Otl, halo komunidade uma-kain 60-resin iha Bairru Kuarentena, sofre tanba bee merak sulin sai husi ezgotu ne’ebé intupidu lori bee merak tama sira nia uma laran ho altura bee besik ema otas boot sira nia knotak.

Xefe Suku Madohi, Bernardino Ferreira. Imajen/Osória Marques

Xefe Suku Madohi, Bernardino Ferreira, ohin, informa ba Ajénsia TATOLI iha nia servisu fatin katak, nia parte koordena ona ho Xefe Aldeia  Terra Santa, halo ona levantamentu ba uma-kain 60-resin ne’ebé sofre husi inundasaun ne’e.

“Komunidade ne’ebé afetadu nia sasán la aproveita tanba udan been hoban hotu,” hateten Bernardino Ferreira.

Notísia Relevante : Prezidénsia Repúblika Apoiu Emerjénsia ba Vítima Inundasaun Manleuana

Tuir nia haree, bee nalihun tama ba komunidade nia horik fatin tanba valeta ho ezgotu balun ne’ebé kompañia husi Xina ne’ebé halo konstrusaun Estada Tasi Tolu nian la kuidadu haree valeta ho ezgotu ne’ebé intupidu tanba rai taka.

“Ha’u hamutuk ho Ofisiál Polisia Suku (OPS) Madohi nian ko’alia ona ho kompañia refere, maibé sira seidauk tua konsiderasaun atu loke ezgotu ho valeta sira ne’ebé rai taka metin. Ha’u husu ba ministériu relevante atu hola medida ba kompañia ne’e tanba halo servisu la tau konsiderasaun ba servisu sira ne’ebé afeta ba komunidade,” hateten Bernardino Ferreira.

Notísia Relevante : Mota Sobu Uma 50-Resin iha Manleuana

Lia fuan no lamentasaun hanesan mós hato’o husi responsavel ba Bairru Kuarentena, Tomas João de Deus, hodi dehan, kompañia husi Xina ne’ebé ezekuta projetu Estada Tasi Tolu tenke tau tensaun ba valeta ho ezgotu sira ne’ebé rai taka ona.

“Ami sente triste tanba udan horikalan afeta tebes ba ami-nia uma hodi estraga ami-nia sasán hotu,” tenik Tomas João de Deus.

Iha fatin hanesan Arão Vitorino Soares, nu’udar vítima ba inundasaun informa, inundasaun ida ne’e la’ós mak foin akontese, maibé dala hitu ona, mas parte kompetente laiha atensaun sériu ba komunidade afetadu.

Notísia Relevante : SEPS Fó Apoiu Emerjénsia ba Uma-Kain 119 iha Manleuana

“Ami sofre beibeik inundasaun. Ba dala ida ne’e kala dala hitu ona,  mas Governu seidauk mai haree ami-nia fatin,” Arão Vitorino Soares.

To’o notísia ne’e públika seidauk iha konfirmasaun husi parte relevante sira, liuliu Sekretaria Estadu Protesaun Sivíl (SEPS).

Jornalista : Osória Marques

Editór       : Francisco Simões

HAKEREK NO HATÁN

Please enter your comment!
Please enter your name here