Joven sira tuur iha bee-laran hodi halimar telefone iha area Tasi-Tolu hafoin udan-boot iha 22 kalan to'o 23 dadeer, janeiru 2019. Imajen/António Gonçalves.

DILI, 23 janeiru 2020 (TATOLI)-Dadus provizóriu hosi Autoridade Lokál Suku Comoro no Mahodi, relata, uma-kain 200-resin iha Aldeia Terra-Santa, Suku Madohi no Aldeia 12 Outobru Suku Comoro, maka afeta ba inundasaun, kuarta kalan ne’e tanba bee tama sira nia uma bainhira akontese udan boot.

Xefe Suku Comoro, Eurico de Jesus da Costa, hateten,  nia parte komunika ona ba Ministériu Obra Públika ho Sekretáriu Estadu Protesaun Sivíl ho seluk tan hodi verifika dadus atu fó apoiu emerjénsia.

Notísia Relevante:Laiha Ezgotu Hamosu Inundasaun iha Kampung Baru

“Komunidade hela iha ne’e rihun resin tanba ne’e persiza bee dalan nune’e bee la’o tuir  se la’ e  afeta tebes ba sira,” informa Xefe Suku Comoro, Eurico de Jesus da Costa, ohin, ba  jornalista sira iha Tasi-Tolu, Dili.

Problema inundasaun ne’e akontese tanba ezgotu iha área ne’ebá intupidu hodi afeta sirkulasaun bee bainhira akontese udan boot.

Notísia Relevante:Udan Horikalan, Lori Inundasaun ba Uma 60-resin iha Bairru Kuarentena

“Bee ne’ebé iha labele sulin tuir ezgotu, udan bo’ot sirkulasaun bee mai hotu komunidade nia uma,” tenik Eurico.

Iha parte seluk, komunidade afetadu, Justino Cabral, informa problema ne’e sempre akontese tanba ne’e MOP persiza buka solusaun.

Vise Ministru Obra Públika, Nicolau Lino Freitas Belo, to’o kedas iha fatin akontesimentu no dadaun ne’e fó ona orientasaun ba Diresaun Jerál  Obra Públika ho Institutu Jestaun Ekipamentu (IJE) hodi kee ona bee dalan atu evita mosu tan inundasaun ba komunidade.

Notísia Relevante:SEPS Hala’o Verifikasaun ba Vítima Inundasaun Kuarentena

“Ita haree ita nia sistéma drainajen sei iha problema, tanba konstrusaun ne’ebé iha seida’uk iha kontinuasaun ho nune’e prezudika bee labele la’o ho di’ak hodi hamosu intupidu iha ezgotu laran,” katak Governante.

Solusaun seluk, tuir nia, MOP sei buka kompaña lokál atu loke tan ezgotu foun metru 100 iha área Tasi-Tolu.

Ekipa servisu hosi SEPS dadaun ne’e halo levantamentu dadus ba vítima sira atu identifika loloos númeru afetadu hodi distribui apoiu emerjensia ba sira.

Jornalista : Nelson de Sousa

Editór       : Francisco Simões

1 KOMENTÁRIU

  1. 1. Inundasaun akontese tanba komunidade soe foer arbiru!
    2. Inudasaun akontese tanba sistema drainazen la kanaliza be foho ba to’o tasi!

HAKEREK NO HATÁN

Please enter your comment!
Please enter your name here