Kondisaun Estrada protokolu Tasi tolu, kinta (23/01/2020). Imajen/Antonio Goncalves

DILI, 24 janeiru 2020 (TATOLI)-Vítima inundasaun iha Bairru Kuarentena ho BTN I&III Tasi-tolu hamutuk uma kain 37 evakua ona ba salaun Don Bosco ho Edifísiu Bombeiru, Comoro,   tanba sira nia uma laran nakfilak  ba debu boot.

Notísia Relevante : Estrañu! Eipah, Joven Millenial Halimar PUBG?

Husi uma kain lubun ne’e, uma kain 17 mak evakua ba iha Edifisiu Bombeiru no uma kain 20 mak ba hela provizóriu iha Salaun Don Bosco, Comoro.

“Ita-nia komunidade afetadu sira ne’e hetan asisténsia ai-han husi Timor Plaza no seluk tan,” informa Xefe Suku Comoro, Eurico de Jesus da costa, ohin, ba Ajénsia TATOLI.

Tuir nia observasaun, bee nalihun hodi tama borus komunidade sira horik fatin la’ós de’it tanba ezgotu sira intupidu, maibé ladún iha konsiénsia mútua ida husi komunidade sira atu hamoos sira ezgotu ho valeta sira. Piór liu tan, soe lixu arbiru de’it.

Notísia Relevante : Hamoos Uma Ninin ho Valeta, Suku Tolu “Livre Inundasaun”

Xefe Suku Eurico aprofunda mós katak, negosiante roupa uzadu sira  (obralan) mós fó kontribuisaun lixu iha dalan no valeta hodi hamosu inundasaun hodi afeta ba ema nia uma no sasán iha área Tasi-tolu nian.

“Komunidade husi Suku Comoro ho Suku Madohi ne’ebé sofre inundasaun ne’e presiza iha konsiénsia atu hamoos uma ninin semana-semana no hamoos ezgotu ho valeta sira atu la bele intupidu no tempu udan halo bee nalihun. Labele buat hotu Governu no Governu de’it,” afirma Xefe Suku Eurico de Jesus da Costa.

Xefe Suku Eurico halo ona komunikasaun ho Vise Ministru Obras Públika (MOP), Nicolau Freitas Belo, atu buka solusaun urjente ba valeta ho ezgotu sira ne’ebé intupidu, inklui valeta balun ne’ebé la iha ona iha Bairru Kampung Baru, Comoro.

Notísia Relevante : IJE, EDTL, DNAS no Bombeiru Foti Solusaun Urjente ba Inundasaun iha Tasitolu

Husi sorin seluk, negosiante roupa uzadu (Obralan) Comoro, Martinha Soares, informa, sira sempre hamoos valeta loron-loron, maibé kuandu udan mai lori fo’er husi foho lolon tama mai komunidade sira nia uma.

Ministériu Obras Públika fó ona orientasaun ba departamentu sira ne’ebé tutela ba MOP atu hamoos valeta ho ezgotu sira ne’e.

Jornalista : Osória Marques

Editór       : Francisco Simões

HAKEREK NO HATÁN

Please enter your comment!
Please enter your name here