DILI, 22 janeiru 2020 (TATOLI) – Governu liuhusi Sekretária Estadu Protesaun Sivíl (SEPS) hahú halo verifikasaun ba família afetadu husi inundasaun, horikalan, iha Bairru Kuarentena, Aldeia Terra Santa, Suku Madohi, Postu Administrativu Don Aleixo, Munisípiu Dili.
Notísia Relevante : Udan Horikalan, Lori Inundasaun ba Uma 60-resin iha Bairru Kuarentena
“Ami observa hela iha fatin no ha’u orienta ona ekipa pontu fokál sira hala’o hela identifikasaun, hafoin ne’e bele hala’o intervensaun apoiu emerjénsia tuir prosesu ne’ebé iha,” hateten Diretór Nasionál Jestaun Risku Dezastre, Agostino Gomes de Jesus, hodi responde Ajénsia TATOLI, ohin, via telefone.
Nia rekoñese udan boot, horikalan, halo bee tama duni povu nia uma no governu iha obrigasaun atu distribui apoiu emerjénsia. Alein nee, Diresaun Nasional Jestaun Risku Dezastre halo hela levantamentu dadus ba vítima dezastre no inundasaun iha munisípiu seluk.
Jornalista : Nelson de Sousa
Editór : Francisco Simões
