Diretór Jerál Prezidénsia Repúblika, Domingos Romualdo dos Santos Carmo Amaral oferese apoiu emerjénsia ba vítima inundasaun iha Suku Manleuana. Imajen TATOLI/Cipriano Colo

DILI, 07 janeiru 2020 (TATOLI)–Prezidénsia Repúblika oferese apoiu emerjénsia ba vítima inundasaun iha Aldeia Lesibutak, Laloran no Mauc, Suku Manleuana, Postu administrativu Dom Aleixo, Munisípiu Dili, tersa ne’e.

Xefe Suku Manleuana, Jacob Tilman Soares agradese ba Prezidente Repúblika nia laran luak ne’ebé la haluha ninia povu iha kualkér situasaun liuliu iha situasaun emerjénsia.

“Hanesan autoridade lokál lori vítima sira-nia naran, agradese ba Prezidente Repúblika ne’ebé oferese ajudu umanitária ho karaterístika emerjénsia, maski uitoan, maibé bele sustenta sira-nia moris iha tempu balun, hodi hein apoiu sira seluk husi Governu”, Jacob hateten.

Nia mós husu ba parte Prezidénsia Repúblika atu hato’o ba Governu hodi halo atendimentu lalais ba komunidade afetadu, liuliu sira ne’ebé uma estragu totál, atu bele apoiu hodi konstrui filafali, nune’e bele hela ho dignu tanba oras ne’e iha hela lona okos.

Iha fatin hanesan, Diretór Jerál Prezidénsia Repúblika, Domingos Romualdo dos Santos Carmo Amaral hateten, Xefe Estadu, Francisco Guterres Lú Olo sai Prezidente Repúblika ba ema hotu, tanba ne’e, hanesan aman nasaun banhira haree nia oan sira hetan susar, nia labele taka matan no tenke tau-matan maski ho apoiu ne’ebé ki’ik atu bele sustenta sira-nia moris iha loron balun.

“Sasán ne’ebé Prezidénsia Repúblika oferese, ho karaterístika emerjénsia, no Prezidente Repúblika la’ós hadau Governu nia kompeténsia, maibé Prezidente Repúblika iha responsabilidade morál ba nia povu atu fó apoiu iha kualkér situasaun, hodi hein Governu nia apoiu”, Diretór Jerál ne’e subliña.

Nia fó hanoin mós katak Prezidensia Repúblika la’ós foin primeiravez fó apoiu emerjénsia, maibé antes ne’e oferese ona ba vítima inséndiu sira iha Munisípiu Ermera, Liquiçá, Baucau no fatin sira seluk tan.

Kona-ba rekomendasaun sira ne’ebé vítima sira oferese, parte Prezidénsia Repúblika sei hato’o ba Xefe Estadu atu hatutan ba Governu hodi bele fó atendimentu di’ak liután.

Kona-ba apoiu emerjénsia ne’e, Prezidénsia Repúblika oferese de’it ba vítima sira ne’ebé konsideradu grave liu kompostu husi Aldeia Laloran ho nia totál uma-ka’in 27 no sira ne’ebé grave liu hamutuk uma-ka’in 6, Aldeia Lesibutak grave liu uma 1, no Aldeia Mauc ho nia númeru vítima hamutuk 16 maibé grave liu iha uma 4.

Inundasaun ne’e akontese iha domingu, 29 dezembru 2019, tuku 15.00, rezulta uma 54 hetan estragu.

Apoiu ne’ebé Prezidénsia Repúblika oferese mak hanesan Balde boot-ki’ik, foos, supermie, mina, tasu, bikan, sanan, kanuru, sabaun hariis, sabaun fase roupa no biti.

Totál populasaun husi Suku Manleuana hamutuk rihun sanulu resin.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here